ວັນທີ 22 ພຶດສະພາ 2020 ແຟນເພສ ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ ໄດ້ລາຍງານວ່າ: ໄດ້ມີການຈັດກອງປະຊຸມປຶກສາຫາລື ເລື່ອງສໍາມະໂນພຣະສົງ -ສາມະເນນ ຂຶ້ນຢູ່ທີ່ສູນກາງອົງການພຸດທະສາສະໜາສັມພັນແຫ່ງ ສປປ ລາວ ໃນກັມມາທິການ ການຕ່າງປະເທດ.

ເຂົ້າຮ່ວມກອງປະຊຸມຝ່າຍພຣະສົງ ປະກອບມີ: ພຣະຍອດຄໍາ ປອ. ດໍາຣົງ ພິມມະຈັກ ຫົວໜ້າຫ້ອງການບໍລິຫານງານສູນກາງ ອພສ, ພຣະຍອດຄໍາ ປອ. ພວງປະເສີດ ພູມາວົງ, ພຣະຍອດຄໍາ ສີທົນ ໄຊຍະວົງສອນ, ພຣະຍອດຄໍາ ຄໍາວັນ ວໍຣະເດດ ພ້ອມດ້ວຍຄະນະ

ຝ່າຍຄະຣາວາດ ນໍາພາໂດຍ: ທ່ານ ພັທ ປອ. ອາຄົມ ວົງພະຈັນ ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ເຂົ້າຮ່ວມ.

ໃນທີ່ປະຊຸມໄດ້ເຫັນດີເປັນເອກະພາບນໍາກັນຫຼາຍບັນຫາກ່ຽວກັບການເຮັດສໍາມະໂນ ແລະ ບັດປະຈໍາຕົວ ພຣະສົງ ສາມະເນນ ທີ່ຈະສືບຕໍ່ເຮັດໃຫ້ສອດຄ່ອງກັບນິຕິກໍາ ທີ່ໄດ້ກໍານົດໄວ້ ແລະ ໄດ້ເຫັນດີ ນໍາກັນເຊັ່ນ:

  1. ພຣະສົງ ສະເໜີ ໃຫ້ ກະຊວງ ປກສ ໃຫ້ຄົງປຶ້ມສໍາມະໂນພຣະສົງໄວ້ຄືເກົ່າ ແຕ່ມີການປ່ຽນແປງເນື້ອໃນ ຄືປ່ຽນ ເປັນປຶ້ມບັນທຶກພຣະສົງສາມະເນນ ຫຼື ປຶ້ມສະຖິຕິພຣະສົງ ແທນ
  2. ພຣະສົງສະເໜີໃຫ້ທາງ ກະຊວງ ປກສ ເຮັດສໍາມະໂນພຣະສົງ ໂດຍການລວມກັນໄວ້ໃນຫົວດຽວກັນພາຍໃນວັດ ບໍ່ອະນຸຍາດໃຫ້ເຮັດເປັນລາຍບຸກຄົນ ພາຍໃນວັດ,
  3. ສໍາມະໂນ ແລະ ບັດປະຈໍາຕົວ ແບບໃໝ່ ຈະມີຂະໜາດນ້ອຍລົງ ແລະ ມີອາຍຸ ຂອງບັດ 5 ປີ,
  4. ສ່ວນໜັງສືສຸດທິ ພຣະສົງສາມະເນນ ແມ່ນຍັງມີຢູ່ຄືເກົ່າ ແຕ່ມີການເພີ່ມໃຫ້ພຣະສົງສາມະເນນ ຖືບັດປະຈໍາຕົວ ຫຼື ID card   (ພຣະສົງ ສາມະເນນ ຈະໄດ້ຖືບັດທັງສອງຢ່າງ) ເພື່ອສະດວກໃນການຕິດຕໍ່ວຽກງານລາດຊະການຕ່າງໆ ແລະ ເປັນການບັນທຶກປະຫວັດຂອງຜູ້ກ່ຽວໄວ້ ເຊິ່ງ ສໍາມະໂນ ແລະ ບັດປະຈໍາຕົວ ແບບໃໝ່ ແມ່ນ ກະຊວງ ປກສ ໂດຍມີ ປກສ ຂັ້ນເມືອງ ເປັນຜູ້ອອກໃຫ້,
  5. ໃນທີປະຊຸມ ຝ່າຍ ກະຊວງ ປກສ ກໍໄດ້ເຫັນດີ ຕາມຄໍາສະເໜີຂອງຝ່າຍພຣະສົງ ແລະ ຈະນໍາໄປຈັດຕັ້ງປະຕິບັດ ແລະ ຈະເຮັດແຈ້ງການລົງໄປຫາພາກສ່ວນທີ່ກ່ຽວຂ້ອງ ໃນແຕ່ລະຂັ້ນ ໃນຂອບເຂດທົ່ວປະເທດ ເພື່ອຈັດຕັ້ງປະຕິບັດ.

ທັງສອງຝ່າຍໄດ້ໃຫ້ຄໍາໝັ້ນໝາຍຢ່າງໜັກແໜ້ນນໍາກັນວ່າ ຈະໃຫ້ໄດ້ນໍາໃຊ້ສໍາມະໂນ ແລະ ບັດປະຈໍາຕົວ ແບບໃໝ່ ໃນໄວໆນີ້ ແລະ ໃນຂະນະດຽວກັນນັ້ນ ພາຍຫຼັງອັດກອງປະຊຸມ ທາງສູນກາງ ອພສ ກໍໄດ້ມອບໜັງສືກ່ຽວກັບພຣະພຸດທະສາສະໜາ ແລະ ພິທີກັມຕ່າງໆ ລວມທັງທັມມະນູນສົງ ໃຫ້ແກ່ ກະຊວງ ປກສ ນໍາໄປຄົ້ນຄວ້າ ແລະ ມອບໃຫ້ຫ້ອງມູນເຊື້ອຂອງກະຊວງ ປກສ.

ທີ່ມາ: ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ

ຮູບພາບ ແລະ ຂ່າວໂດຍ: Lion Thv ສິງໂຕ ຄຳລາມ Hongsa Boriboun  ປອ ຫົງສາ ບໍຣິບູນ

LEAVE A REPLY

Please enter your comment!
Please enter your name here