ວັນທີ 20 ພຶດສະພາ 2020, ໄດ້ມີການຈັດກອງປະຊຸມຫາລືເລື່ອງ “ການຈັດຫາງານ ໃຫ້ຜູ້ທີ່ໄດ້ຮັບຜົນກະທົບຈາກການແພ່ລະບາດຂອງເຊື້ອພະຍາດໂຄວິດ-19”

ໂດຍຫົວໜ້າກົມພັດທະນາສີມືແຮງງານ ກະຊວງແຮງານ ແລະ ສະຫວັດດີການສັງຄົມ ໄດ້ໃຫ້ຮູ້ວ່າ: ແຮງງານລາວ ພົບຄວາມຫຍຸ້ງຍາກຫຼາຍຫຼັງຈາກມີການລະບາດຂອງພະບາດໂຄວິດ-19 ເນື່ອງຈາກ ບັນດາໂຮງຈັກ ໂຮງງານ ຫລາຍແຫ່ງມີການໂຈະ ແລະ ປິດກິດຈະການ ສົ່ງຜົນເຮັດໃຫ້ຜູ້ອອກປະເຊີນກັບການວ່າງງານ. 

ອີງຕາມການຄາດຄະເນຂອງ ອົງການແຮງງານສາກົນ ອັດຕາການວ່າງງານຈະເພີ່ມຂຶ້ນປະມານ 25% ຢູ່ ສປປ ລາວ. ຄຽງຄູ່ກັນນັ້ນ, ປະຊາຊົນລາວ ທີ່ອອກແຮງງານຢູ່ປະເທດໄທ ແບບຖືກຕ້ອງ ແລະ ບໍ່ຖືກຕ້ອງຕາມກົດໝາຍ ໄດ້ຫລັ່ງໄຫລກັບຄືນປະເທດ ເປັນຈຳນວນຫລວງຫລາຍໂດຍຜ່ານຊ່ອງທາງຕ່າງໆ ຊຶ່ງມີການລາຍງານສະເພາະຕົວເລກຂອງແຮງງານລາວ ທີ່ກັບມາຈາກປະເທດໄທ ໂດຍຜ່ານດ່ານສາກົນ ມີຈຳນວນຫລາຍກວ່າ 80.000 ຄົນ.

ພາບປະກອບ

ຜ່ານມາ, ກະຊວງ ຮສສ ໄດ້ມີກົນໄກ ແລະ ແຈ້ງການຈຳນວນໜຶ່ງເພື່ອແນະໃຫ້ເຈົ້າໜ້າທີ່ກ່ຽວຂ້ອງທຸກຂັ້ນໃນທົ່ວປະເທດ ຈະຕ້ອງເຮັດວຽກໜັກຂຶ້ນໃນການສືບຕໍ່ປະສານງານກັບນັກລົງທຶນ ແລະ ຜູ້ປະກອບການໃນທົ່ວປະເທດ ເພື່ອແນະນຳໃຫ້ພວກເຂົາຮັບເອົາແຮງງານ ເພື່ອຫລຸດຜອ່ນຜົນກະທົບຕໍ່ຊີວິດການເປັນຢູ່ປະຈຳວັນຂອງຜູ້ອອກແຮງງານລາວ ຈາກການແພ່ລະບາດຂອງພະຍາດໂຄວິດ-19.

ພາບປະກອບ

ທ່ານຍັງໃຫ້ຮູ້ຕື່ມວ່າ: ເຖິງແມ່ນວ່າຈະພົບຄວາມຫຍຸ້ງຍາກຫລາຍ ແຕ່ກະຊວງແຮງງານ ແລະ ສະຫວັດດີການສັງຄົມ ລວມທັງບັນດາຂະແໜງການທີ່ກ່ຽວຂ້ອງຈະສືບຕໍ່ຕິດຕາມສະພາບການຕ່າງໆ, ເກັບກຳຂໍ້ມູນ ແລະ ລາຍງານສະພາບຢ່າງປົກກະຕິ; ພະແນກແຮງງານແລະ ສະຫວັດດີການສັງຄົມ ຂັ້ນແຂວງ ແລະ ນະຄອນຫລວງ, ສູນບໍລິການຈັດຫາງານ ແລະ ບໍລິສັດຈັດຫາງານ ຈະໄດ້ເຄື່ອນໄວເພື່ອຕິດຕາມ ແລະ ເກັບຂໍ້ມູນຂອງຜູ້ອອກແຮງງານເພື່ອສະເໜີຕໍ່ລັດຖະບານໃຫ້ພິຈາລະນາການຊ່ວຍເຫລືອຕາມຄວາມເໝາະສົມ.

ຂໍ້ມູນ: ຂ່າວສານປະເທດລາວ

LEAVE A REPLY

Please enter your comment!
Please enter your name here