ຫຼັງຈາກທີ່ລັດຖະບານໄດ້ຜ່ອນຜັນມາດຕະການລົງ ເນື່ອງຈາກສະຖານະການ ການລະບາດຂອງພະຍາດໂຄວິດ-19 ຜ່ອນຄາຍລົງ, ການບິນລາວກໍ່ໄດ້ອອກມາປະກາດ ເປີດເສັ້ນທາງບິນຄືນພາຍໃນປະເທດ ໂດຍໄດ້ເລີ່ມເປີດໃຫ້ຈອງຕັ້ງແຕ່ວັນທີ 18 ພຶດສະພາ 2020 ແລະ ຈະບິນຖ້ຽວທຳອິດໃນວັນທີ 22 ພຶດສະພາ 2020 ໂດຍຖ້ຽວບິນທຳອິດ ແມ່ນຈະບິນໄປທີ່ນະຄອນປາກເຊ ແຂວງຈໍາປາສັກ

ນອກຈາກນີ້, ການບິນລາວ ຍັງໄດ້ກຳນົດມາດຕະການ ອອກມາ 7 ຂໍ້ ເພື່ອເພິ່ມຄວາມຫມັ້ນໃຈໃນການເດີນທາງຂອງຜູ້ໂດຍສານ ດັ່ງນີ້:

1.ພະນັກງານລັດວິສາຫະກິດການບິນລາວທຸກຄົນຕ້ອງຖືກວັດອຸນຫະພູມຮ່າງກາຍກ່ອນປະຕິບັດໜ້າທີ່.

2. ພະນັກງານແຈ້ງປີ້ຕ້ອງລ້າງມືດ້ວຍ ສະບູ ຫຼື ເຫຼົ້າ 70, ໃສ່ຜ້າອັດປາກ, ໃສ່ຖົງມື ກ່ອນໃຫ້ບໍລິການທຸກຄັ້ງ.

3. ກ່ອນທີ່ຈະເຂົ້າແຈ້ງປີ້ ແລະ ຂຶ້ນເຮືອບິນ,ຜູ້ໂດຍສານທຸກທ່ານຕ້ອງຜ່ານການວັດອຸນຫະພູມຮ່າງກາຍທຸກໆຄັ້ງ ແລະ ຕ້ອງຂຽນແບບຟອມສອບຖາມເລື່ອງສຸຂະພາບ.

4. ມີການອະນາໄມເຮືອບິນດ້ວຍນໍ້າຢາຂ້າເຊື້ອພິເສດທຸກໆຄັ້ງກ່ອນປະຕິບັດຖ້ຽວບິນ.

5. ງົດການເສີບອາຫານ, ຈະມີການຈັດກຽມນໍ້າດື່ມໄວ້ໃຫ້ບັນດາຜູ້ໂດຍສານຂອງພວກເຮົາກ່ອນທີ່ຈະຂື້ນເຮືອບິນ.

6. ເພື່ອຄວາມປອດໄພ ຜູ້ໂດຍສານຕ້ອງສວມໃສ່ຜ້າອັດປາກຕະຫຼອດການເດີນທາງ.

7. ກະເປົາຂອງຜູ້ໂດຍສານຈະຖືກພົ່ນຂ້າເຊື້ອທຸກໆຄັ້ງຫຼັງລົງຈາກ ເຮືອບິນ.

LEAVE A REPLY

Please enter your comment!
Please enter your name here