ໂຄງການ​ກໍ່ສ້າງ​ເສັ້ນທາງ​ເບ​ຕົງ​ສີ່​ແຍກ​ໄຟ​ອຳນາດ​ຕານ​ມີ​ໄຊ ຫາ​ສາມ​ແຍກ​ສີ​ເກີດ ນະຄອນຫຼວງ​ວຽງ​ຈັນ ເປັນ​ເສັ້ນທາງ​ທີ່​ມີ​ປະລິມານ​ການ​ສັນຈອນ​ໜາ​ແໜ້ນ ແລະ ເປັນ​ເສັ້ນທາງ​ທີ່​ບໍ່​ມີ​ທາງ​ເວັ້ນ ເຮັດ​ໃຫ້ການ​ກໍ່ສ້າງ​ຂອງ​ບໍລິສັດ​ຜູ້​ຮັບ​ເໝົາ​ພົບ​ຄວາມ​ຫຍຸ້ງຍາກ ປັດຈຸບັນ ໂຄງການ​ດັ່ງກ່າວ​ໄດ້​ດຳເນີນ​ການ​ກໍ່ສ້າງ​ມີ​ຄວາມ​ຄືບ​ໜ້າ 85% ແລະ ຄາດ​ວ່າ​ຈະ​ສຳເລັດ 100% ໃນ​ເດືອນ​ກໍລະກົດ 2020.

ທ່ານ ຫຸມພັນ ພະ​ດວງ​ເດດ ຫົວໜ້າ​ຄະນະ​ວິຊາ​ການ​ໂຄງການ​ກໍ່ສ້າງ​ເສັ້ນທາງ​ເບ​ຕົງ​ສີ່​ແຍກ​ໄຟ​ອຳນາດ​ຕານ​ມີ​ໄຊ​ຫາ​ສາມ​ແຍກ​ສີ​ເກີດ ໄດ້​ລາຍ​ງານ​ຕໍ່​ ທ່ານ ພູ​ຂົງ ບັນນະ​ວົງ ຮອງ​ເຈົ້າ​ຄອງ ນວ ຫົວໜ້າ​ພະ​ແນກ​ແຜນການ ແລະ ການ​ລົງທຶນ​ນະຄອນຫຼວງ​ວຽງ​ຈັນ ໃນ​ໂອກາດ​ທີ່​ລົງ​ໄປ​ຕິດຕາມ​ໂຄງການ​ກໍ່ສ້າງ​ເສັ້ນທາງ​ດັ່ງກ່າວ ວັນ​ທີ 15 ພຶດ​ສາ​ພາ 2020 ວ່າ: ເສັ້ນທາງ​ດັ່ງກ່າວ​ມີ​ຄວາມ​ຍາວ 9,37 ກິໂລແມັດ ກວ້າງ 28 ແມັດ ມີ 6 ເລນ​ລົດ​ແລ່ນ ມີ​ດອນ​ກາງ​ທາງ ມີ​ທາງ​ຄົນ​ຍ່າງ​ສອງ​ເບື້ອງ ມີ​ລະບົບ​ລະບາຍ​ນ້ຳ ໄຟ​ເຍືອງ​ທາງ ແລະ ໜ້າ​ທາງ​ປູ​ດ້ວຍ​ເບ​ຕົງ ມີ​ມູນ​ຄ່າ​ການ​ກໍ່­ສ້າງ​ທັງ​ໝົດ 45.110.661 ໂດ​ລາ​ສະຫະລັດ ຫຼື ປະມານ 405 ຕື້​ກີບ  ພະ​ແນກ​ໂຍທາ​ທິ​ການ ແລະ ຂົນສົ່ງ​ນະຄອນຫຼວງ​ວຽງ​ຈັນ​ ເປັນ​ເຈົ້າ​ຂອງ​ໂຄງການ ກຸ່ມ​ບໍລິສັດ ຕັງ​ຈະເລີນ ຈຳກັດ​ຜູ້​ດຽວ​ ເປັນ​ຜູ້​ຮັບ​ເໝົາ​ກໍ່ສ້າງ ແລະ ການ​ກໍ່ສ້າງ​ຕາມ​ສັນຍາ​ໃຫ້​ສຳເລັດ​ພາຍ​ໃນ 24 ເດືອນ

(13/9/2016-13/9/2018) ພາຍຫຼັງ​ໝົດ​ອາຍຸ​ສັນຍາ​ສະບັບ​ຕົ້ນ ບໍລິສັດ​ໄດ້​ຕໍ່​ສັນຍາ​ຄັ້ງ​ທີ 1 ເພີ່ມ​ອີກ 9 ເດືອນ ນັບ​ແຕ່​ເດືອນ​ຕຸລາ 2018 ຮອດ​ເດືອນ​ກໍລະກົດ 2019 ໂຄງການ​ຄືບ​ໜ້າ 71,06% ທຽບໃສ່​ແຜນການ​ຫຼ້າ​ຊ້າ 28,94% ເພື່ອ​ສືບຕໍ່​ໜ້າ​ວຽກ​ໃຫ້​ສຳເລັດ ບໍລິສັດ​ຮັບ​ເໝົາ​ກໍ່ສ້າງ​ຈຶ່ງ​ສະເໜີ​ຂໍ​ຕໍ່​ສັນຍາ​ຄັ້ງ​ທີ 2 ເພີ່ມ​ອີກ 12 ເດືອນ ຮອດ​ເດືອນ​ກໍລະກົດ 2020 ເພື່ອ​ຈະ​ປະຕິບັດ​ໃຫ້​ສຳເລັດ 100%.

ຜົນສຳເລັດ​ການ​ຈັດການ​ກໍ່ສ້າງ​ຮອດ​ເດືອນ​ກຸມພາ 2020 ບໍລິສັດ​ຮັບ​ເໝົາ​ປະຕິບັດ​ບັນດາ​ໜ້າ​ວຽກ​ທີ່​ລະບຸ​ໄວ້​ໃນ​ສັນຍາ​ຄື: ວຽກ​ທົ່ວ​ໄປ​ປະຕິບັດ 100% ວຽກ​ດິນ​ປະຕິບັດ​ໄດ້ 125,5% ວຽກ​ໂຄງ​ສ້າງ​ທາງ ປະຕິບັດ​ໄດ້ 81,23% ວຽກ​ລະບົບ​ລະບາຍ​ນ້ຳ ປະຕິບັດ​ໄດ້ 93,48% ວຽກ​ຕົບແຕ່ງ ແລະ ວຽກ​ອື່ນໆ ປະຕິບັດ​ໄດ້ 32,47% ທຽບໃສ່​ແຜນການ​ປະຕິບັດ​ໄດ້  85,01% ທຽບໃສ່​ແຜນການ​ລວມ​ແມ່ນ​ຫຼ້າ​ຊ້າ 14,99%.

ເຊິ່ງ​ສາເຫດ​ທີ່​ພາໃຫ້​ຊັກ​ຊ້າແມ່ນ

  • ຍ້ອນ​ການ​ຍົກຍ້າຍ​ສິ່ງ​ກີດຂວາງ​ຢູ່​ໃນ​ຂອບ​ເຂດ​ກໍ່ສ້າງ ເປັນຕົ້ນ​ລະບົບ​ນ້ຳ​ປະປາ ສາຍ​ໄຍ​ແກ້ວ ຕາ​ຂ່າຍ​ໄຟຟ້າ
  • ການຍົກຍ້າຍສິ່ງ​ປຸກ​ສ້າງ​ຂອງ​ປະຊາຊົນ​ມີ​ຄວາມ​ຫຼ້າ​ຊ້າ ໃຊ້​ເວລາ​ດົນ​ໃນ​ການ​ໄກ່​ເກ່ຍ ເຮັດ​ໃຫ້ການ​ກໍ່ສ້າງ​ພົບ​ຄວາມ​ຫຍຸ້ງຍາກ
  • ການ​ສະໜອງ​ທຶນຮອນ​ເຂົ້າ​ໃນ​ການຈັດຕັ້ງ​ປະຕິບັດ​ກໍ່ສ້າງ ບາງ​ຄັ້ງ​ຊັກ​ຊ້າ ບໍ່​ສາມາດ​ຕອບ​ສະໜອງ​ຕາມ​ແຜນການ​ໜ້າ​ວຽກ​ຕົວ​ຈິງ​ທີ່​ວາງ​ໄວ້ ເປັນຕົ້ນ ວັດ​ສະ​ດຸ ກົນ​ຈັກ ແຮງ​ງານ ແລະ ງົບປະມານ​ທີ່​ໄດ້​ຮັບ​ການ​ແບ່ງປັນ​ຈາກ​ລັດຖະບານ ເພື່ອ​ຊຳລະ​ໃຫ້​ຜູ້​ຮັບ​ເໝົາ​ແມ່ນ​ມີ​ໜ້ອຍ ບໍ່​ສາມາດ​ຕອບ​ສະໜອງ​ໄດ້​ຕາມ​ສັນຍາ​ທີ່​ກຳນົດ​ໄວ້.

ທີ່ມາ: Vientiane Mai (ຂັນທະວີ)

LEAVE A REPLY

Please enter your comment!
Please enter your name here