ວັນທີ 6 ພຶດສະພາ 2020 ນີ້, ຄະນະສະເພາະກິດການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ກະຊວງປ້ອງກັນປະເທດ ນຳໂດຍ ສະຫາຍ ພົນຕີ ແອສະໄໝ ເລືອງວັນໄຊ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າຄະນະສະເພາະກິດການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ກະຊວງປ້ອງກັນປະເທດ ພ້ອມຄະນະ ໄດ້ລົງເຄື່ອນໄຫວເຮັດວຽກຢູ່ ວິທະຍາຄານກົມມະດຳ ແລະ ວິທະຍາຄານພາລາທິການກອງທັບ ເພື່ອເກັບກຳສະພາບການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ເພື່ອກະກຽມການເປິດການຮຽນ-ການສອນໃຫ້ພະນັກງານ-ນັກຮົບ ໃນວັນທີ 18 ພຶດສະພາ 2020 ນີ້.

ໃນການເຄື່ອນໄຫວເຮັດວຽກຄັ້ງນີ້ຫົວໜ້າການທະຫານທັງສອງວິທະຍາຄານກໍ່ໄດ້ລາຍງານຫຍໍ້ກ່ຽວກັບການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ວ່າ: ພາຍຫຼັງໄດ້ຮັບຄຳສັ່ງແຈ້ງການຂອງ ນາຍຍົກລັດຖະມົນຕີເລກທີ 06/ນຍ ກໍຄືຄໍາສັ່ງແຈ້ງການຂອງກະຊວງປ້ອງກັນເທດ ວ່າດ້ວຍການປ້ອງກັນການແຜ່ລລະບາດຂອງເຊື້ອພະຍາດໂຄວິດ- 19 ເຊິ່ງຄະນະພັກ – ຄະນະບັນຊາກົມກອງ ໄດ້ຊີ້ນໍາໃຫ້ບັນດາອົງການ, ກົມກອງ, ຫ້ອງການ, ພະແນກການ, ກອງຮ້ອຍ ເອົາໃຈໃສ່ສຶກສາອົບຮົມພະນັກງານ – ນັກຮົບຂອງຕົນ ກ່ຽວກັບໄພອັນຕະລາຍຂອງເຊື້ອພະຍາດດັ່ງກ່າວ. ຈາກນັ້ນກໍຕ້ອງມີມາດຕະການຢ່າງເຂັ້ມງວດໃນການຈຳກັດການເຂົ້າ-ອອກຄ້າຍ, ການໄປ-ມາຂອງພະນັກງານໃນເວລາເຂົ້າ-ອອກ ແມ່ນໄດ້ປະຕິບັດເປັນລະບົບປະຕູດຽວ ເພຶ່ອສະດວກໃນການກວດກາອຸນຫະພູມ, ລ້າງມື, ຊີດຢາຂ້າເຊື້ອພາຫະນະເຂົ້າ-ອອກຄ້າຍ ແລະ ຈຳກັດການເຂົ້າຄ້າຍ-ອອກຄ້າຍໃນໂມງການ ສ່ວນບັນດາພະນັກງານ – ນັກຮົບໂສດ ແມ່ນໃຫ້ຢູ່ໃນຄ້າຍບໍ່ໃຫ້ອອກເຄື່ອນໄຫວນອກຂອບເຂດກົມກອງຮັບຜິດຊອບ ຖ້າມີວຽກຈຳເປັນຕ້ອງຂໍອະນຸຍາດຈາກຄະນະກອງ, ແພດປະຈຳການຈີ່ງສາມາດອອກຄ້າຍໄດ້, ແຕ່ຕ້ອງກວດກາລະອຽດຕາມມາດຕະການ ການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດດັ່ງກ່າວ.

ຮອດປັດຈຸບັນຍັງບໍ່ມີກໍນີສົງໄສຜູ້ທີ່ຕິດເຊື້ອ ແລະ ຈະຍັງສືບຕໍ່ກວດກາຄັດກອງຈົນກວ່າວິກິດການນີ້ຈະຜ່ານພົ້ນໄປ. ໂອກາດນີ້ ສະຫາຍ ພົນຕີ ແອສະໄໝ ເລືອງວັນໄຊ ກໍ່ໄດ້ກ່າວຍ້ອງຊົມເຊິຍຕໍ່ຄະນະພັກ-ຄະນະບັນຊາ ທັງສອງວິທະຍາຄານທີ່ໄດ້ພ້ອມກັນເອົາໃຈໃສ່ປະຕິບັດຕາມຄຳແນະນຳຂອງຄະນະສະເພາະກິດ ແລະ ພາກສ່ວນກ່ຽວຂ້ອງ, ພວກເຮົາສາມາດຄວບຄຸມ ແລະ ຈຳກັດການແຜ່ລະບາດໄວ້ໄດ້ແຕ່ຕ້ອງສືບຕໍ່ປະຕິບັດຢ່າງເຂັ້ມງວດບັນດາມາດຕະການປ້ອງກັນການຕິດເຊື້ອ ເປັນຕົ້ນແມ່ນການຮັກສາໄລຍະຫ່າງ 01 ແມັດຂຶ້ນໄປ, ລ້າງມືໃສ່ສະບູ ແລະ ນ້ໍາສະອາດ ຫຼື ເຈວລ້າງມື, ໃສ່ຜ້າອັດປາກ-ດັງ, ວັດແທກອຸນຫະພູມ ແລະ ອະນາໄມສະຖານທີ່ຕາມຄໍາແນະນໍາຂອງຄະນະສະເພາະກິດວາງອອກ.

ຈາກນັ້ນຄະນະສະເພາະກິດການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ກະຊວງປ້ອງກັນປະເທດ ກໍ່ໄດ້ມອບວັດຖຸອຸປະກອນການປ້ອງກັນການແຜ່ລະບາດຂອງພະຍາດ COVID-19 ທີ່ໄດ້ຮັບການຊ່ວຍເຫຼືອຈາກບັນດາຫ້າງຮ້ານ, ບໍລິສັດ ແລະ ປະເທດເພື່ອນບ້ານ ເປັນຕົ້ນແມ່ນເຈວລ້າງມື, ໃສ່ຜ້າອັດປາກ-ດັງ ແລະ ອື່ນໆ ໃຫ້ທັງສອງວິທະຍາຄານເພື່ອນຳໃຊ້ເຂົ້າໃນການປ້ອງກັນການແຜ່ລະບາດຂອງພະຍາດ ໃນຊວງເປິດການຮຽນ-ການສອນ ໃນວັນທີ 18 ພຶດສະພາ 2020 ນີ້. ພ້ອມນັ້ນ ຄະນະສະເພາະກິດການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ກະຊວງປ້ອງກັນປະເທດ ກໍ່ໄດ້ລົງກວດກາເບິ່ງຄວາມພ້ອມໂຮງໝໍ, ຫ້ອງຮຽນ, ເຮືອນນອນ, ເຮືອນຄົວ ຂອງທັງສອງວິທະຍາຄານຕື່ມອີກ.

ທີ່ມາ: Lao People’s Army News

LEAVE A REPLY

Please enter your comment!
Please enter your name here