ພາຍຫຼັງໄດ້ເກີດເຫດມີຝົນຕົກແຮງ ແລະ ມີໝາກເຫັບຕົກ ເປັນເວລາ 1-2 ຊົ່ວໂມງຕິດຕໍ່ກັນ ຂອງວັນທີ 24 ເມສາ 2020 ຢູ່ເຂດບ້ານກິ່ວຕະລູນ1 ເມືອງຊຽງເງິນ ແຂວງຫຼວງພະບາງ ເຮັດໃຫ້ມີນໍ້າປ່າໄຫຼ ພັດເອົາປະຊາຊົນ ທີ່ໄປເຮັດໄຮ່ຢູ່ສະນໍາທັງໝົດ 11 ຄົນ ແລະ ມີ 7 ຄົນສູນຫາຍໄປກັບສາຍນໍ້າ ບໍລິເວນຫ້ວຍລົມເບື້ອງລົງໄປທາງບ້ານນໍ້າມິ່ງ,ໃນນັ້ນມີຄອບຄົວຢ່າຮື່ເຮີ  5 ຄົນ,ຍິງ 4 ຄົນ ແລະ ຄອບຄົວຈົ່ວກົ່ວເຮີ 2 ຄົນເປັນຍິງທັງ 2 ຄົນ ຈົມຫາຍໄປກັບສາຍນໍ້າ.ໂຊກດີລອດຢ່າງວຸດວິດ 4 ຄົນ,ໃນນີ້ມີເດັກອາຍຸ 5 ເດືອນ.ເຊິ່ງຜູ້ເປັນເອື້ອຍອາຍຸ 8 ປີ ໄດ້ເຈ່ຍໃສ່ທັງຫຼັງແລ້ວກອດກັບຕົ້ນກ້ວຍຢ່າງແໜ້ນເລີຍລອດມາຢ່າງປາຕິຫານ.

ພາຍຫຼັງນໍ້າລົງອົງການປົກຄອງບ້ານແບ່ງກໍາລັງ 20ກວ່າຄົນຄົ້ນຫາ ໃນເວລານັ້ນແມ່ນຊອກໄດ້ 3 ຄົນ,ເຊິ່ງເສຍຊີວິດແລ້ວ.ມາຮອດປະຈຸບັນອົງການປົກຄອງບ້ານ ກໍ່ໄດ້ສືບຕໍ່ ອອກຊອກຄົ້ນຫາ ແລະ ພົບທັງໝົດແລ້ວ 4 ຄົນ,ເຊິ່ງພົບຫ່າງຈາກຈຸດເກີດເຫດໄປປະມານ 2 ກິໂລແມັດພ້ອມທັງຈັດພິທີສົ່ງສະການໃຫ້ຕາມຮີດຄອງຂອງເຜົ່າສົມຄວນ.

ຕໍ່ກັບເຫດການດັ່ງກ່າວນັ້ນທ່ານ ວົງສະຫັວນ ເທບພະຈັນ ຮອງເຈົ້າແຂວງ ພ້ອມດ້ວຍທ່ານ ສຸລິສັກ ພົມມາລີ ຫົວໜ້າພະແນກແຮງງານແລະ ສະຫວັດດີການສັງຄົມ,ທ່ານ ຮອງເຈົ້າເມືອງຊຽງເງິນ ລວມທັງສື່ມວນຊົນແຂວງ ກໍໄດ້ລົງພື້ນທີ່ ເພື່ອກັບກໍາສະພາບການ ແລະ ໃຫ້ການຢຽວຢາ ໃນເບື້ອງຕົ້ນ.

ມາຮອດວັນທີ 29 ເມສາ ທ່ານ ວົງສະຫວັນ ເທບພະຈັນ ຮອງເຈົ້າແຂວງ ພ້ອມດ້ວຍທ່ານ ສຸລິສັກ ພົມມາລີ ຫົວໜ້າພະແນກແຮງງານ ແລະສະຫວັດດີການສັງຄົມ,ທ່ານ ຄໍາຄ່ອງ ພົມມະປັນຍາ ເຈົ້າເມືອງຊຽງເງິນ ກໍ່ໄດ້ໄປຮ່ວມພິທີຈັດງານສົ່ງສະການ ແລະ ໄດ້ມອບເງິນ ແລະ ອາຫານຈໍານວນໜຶ່ງໃຫ້ແກ່ຄອບຄົວຜູ້ຖືກເຄາະຮ້າຍຄັ້ງນີ້.ເງິນທີ່ມອບປະກອບມີຄອບຄົວ ຢ່າຮື່ເຮີ່ ເສຍຊີວິດ 5 ຄົນ 7.500.000ກີບ ແລະ ຄ່ານົມຕື່ມ 500.000ກີບ ແລະ ທ່ານ ວົງສະຫວັນ ເທບພະຈັນ ໄດ້ລະດົມເພີ່ມສໍາຫຼັບຄ່ານົມ ຈໍານວນໜຶ່ງ ລວມ 8.000.000ກີບ ແລະ ຄອບຄົວຈົ່ວກົ່ວ ເຮີ່ ເສຍຊີວິດ 2 ຄົນ 3.000.000ກີບ.ລວມເປັນເງິນທີ່ມອບໃນຄັ້ງນີ້ 11.000.000ກີບ.

ທີ່ມາ: MediaLaos (ເພັດສາຄອນ ສິມມະວົງ)

LEAVE A REPLY

Please enter your comment!
Please enter your name here