ຈາກມະຕິກອງປະຊຸມປຶກສາຫາລືກ່ຽວກັບການປະເມີນຄວາມພ້ອມໃນການເປີດຮຽນຄືນໃໝ່ຂອງຂະແໜງການສຶກສາ ແລະ ກີລາ  ໃນກາງເດືອນເມສາທີ່ຜ່ານມາ ໂດຍກອງປະຊຸມໄດ້ເຫັນດີວ່າ: ຖ້າຫາກຜົນປະເມີນການລະບາດຂອງພະຍາດໂຄວິດ-19 ຫຼັງຈາກວັນທີ 3 ພຶດສະພາ 2020 ສາມາດຄວບຄຸມໄດ້ ບໍ່ມີຄວາມສ່ຽງຕໍ່ການຕິດເຊື້ອ ແລະ ລັດຖະບານອະນຸມັດໃຫ້ສາມາດເປີດການຮຽນການສອນ ໃນອາທິດຕໍ່ໄປ ຄືວັນທີ 11 ພຶດສະພາ 2020 ນັ້ນ

ມື້ນີ້ອິນໄຊລາວຈື່ງໄດ້ສອບຖາມຄວາມຄິດເຫັນຂອງນ້ອງໆນັກສຶກສາ ຈາກຫຼາຍໆພາກສ່ວນ ວ່າເຂົາເຈົ້າຮູ້ສືກແນວໃດ ທີ່ຈະໄດ້ກັບມາຮຽນຄືນ:

ນາງ ທິບພະຈັນ  ນັກສຶກສາຈາກ ຄະນະຊັບພະຍາກອນນໍ້າ ມະຫາວິທະຍາໄລແຫ່ງຊາດ ໄດ້ບອກວ່າ: ຕົນເອງຮູ້ສຶກດີໃຈຫຼາຍທີ່ຈະໄດ້ກັບມາຮຽນຄືນ ແຕ່ກໍ່ຍັງຮູ້ສຶກກັງວົນເລື່ອງຂອງພະຍາດໂຄວິດ-19 ຢູ່ ເຊິ່ງຕົນເອງກໍ່ຈະໄດ້ປະຕິບັດຕາມາດຕະການ ການປ້ອງກັນຕ່າງໆ ເປັນຕົ້ນແມ່ນ: ການໃສ່ໜ້າກາກອະນາໄມ, ລ້າງມືເປັນປະຈໍາ, ຮັກສາໄລຍະຫ່າງ ແລະ ອຶ່ນໆ ເຊິ່ງນ້ອງເອງກໍ່ຢາກໃຫ້ທາງຄະນະມີການຈັດຈຸດລ້າງມື ແລະ ມີຈຸດກວດອຸນຫະພູມຢູ່ຕາມແຕ່ລະຕຶກ

ທ້າວ ທະນາກອນ ນັກສຶກສາ ຈາກຄະນະອັກສອນສາດ ມະຫາວິທະຍາໄລແຫ່ງຊາດ ກໍ່ໄດ້ສະແດງຄວາມຄິດເຫັນຕຶ່ມວ່າ: ຮູ້ສຶກດີໃຈທີ່ໂຮງຮຽນເຂົ້າຄືນເປັນປົກກະຕິ ເພາະວ່າການຮຽນການສອນຈະໄດ້ເປັນໄປຕາມຫລັກສູດ (ຈົບຕາມໄລະຍະເວລາທີ່ກຳນົດ) ສຳລັບການປ້ອງກັນພະຍາດໂຄວິດ-19 ແມ່ນຈະຕ້ອງໄດ້ໝັ່ນລ້າງມືດ້ວຍສະບູ ໃຊ້ເຈລລ້າງມືເລື້ອຍໆ ແລະ ໃສ່ຜ້າປິດປາກເວລາເຂົ້າໄປໃນສະຖານທີ່ ທີ່ມີຄົນຫລາຍ ຫລີກຫລ່ຽງການສຳພັດກັບຄົນອື່ນຖ້າບໍ່ຈຳເປັນ ແລະ ຢາກໃຫ້ຄະນະມີຄວາມເຂັ້ມງວດໃນການໃຫ້ຄຳແນະນຳ ແລະ ຄວບຄຸມການເຮັດກິດຈະກຳຕ່າງໃນໂຮງຮຽນ ທີ່ມີຄວາມສ່ຽງ ເປັນຕົ້ນແມ່ນ: ການແຂ່ງຂັນລິລະປະ-ກິລາ

ນາງ ນ້ອຍນ່າ ນັກສຶກສາ ຈາກຄະນະນິຕິສາດ-ລັດຖະສາດ ມະຫາວິທະຍາໄລແຫ່ງຊາດ ໄດ້ບອກວ່າ: ແມ່ນຄວາມຮູ້ສຶກຄືກັບຕອນຈະເປີດເທີມໃໝ່ອີກຄັ້ງ ແລະ ຮູ້ສຶກດີໃຈທີ່ຈະໄດ້ພົບໝູ່, ໄດ້ກັບໄປຮຽນໃນບົດຮຽນທີ່ຍັງຄ້າງຢູ່, ໄດ້ກັບໄປຫ້ອງສະໝຸດເພື່ອຊອກຂໍ້ມູນມາຂຽນບົດລາຍງານໃຫ້ສຳເລັດ, ແລະ ນ້ອງກໍ່ຄິດວ່າ ການປ້ອງກັນພະຍາດໂຄວິດ-19 ກໍ່ຍັງສາມາດປະຕິບັດໄດ້ຢູ່ ໂດຍການໃສ່ໜ້າກາກອະນາໄມ, ລ້າງມືເປັນປະຈໍາ, ຢູ່ຫ່າງກັນ 2 ແມັດ

ທ້າວ ອ່າງຄໍາ ນັກສຶກສາຈາກສະຖາບັນການເງິນດົງຄໍາຊ້າງ ໄດ້ບອກວ່າ: ທາງສະຖາບັນແມ່ນຍັງບໍ່ມີແຈ້ງການເລື່ອງການເປີດຮຽນຄືນ ແຕ່ຫຼັງຈາກເຫັນຂ່າວເລື່ອງມະຕິກອງປະຊຸມປຶກສາຫາລືກ່ຽວກັບການປະເມີນຄວາມພ້ອມໃນການເປີດຮຽນຄືນໃໝ່ຂອງຂະແໜງການສຶກສາ ແລະ ກີລາ ກໍ່ຮູ້ສຶກດີໃຈຫຼາຍ ເພາະຈະໄດ້ກັບໄປຮຽນຄືນ,​ ແຕ່ກ່ອນໜ້ານີ້ ຕົນເອງກໍ່ໄດ້ຮຽນອອນລາຍ ເຊິ່ງມັນກໍ່ເປັນວິທີທີ່ດີໃນຊ່ວງນີ້, ຖ້າຖາມວ່າກັບໄປຮຽນຄືນແລ້ວ ບໍ່ຢ້ານຕິດພະຍາດໂຄວິດບໍ່ ຕອບເລີຍວ່າຢ້ານ ແຕ່ກໍ່ຕ້ອງໄດ້ຈໍາເປັນ ເພາະການສຶກສາກໍ່ເປັນສິ່ງທີ່ສຳຄັນ ແຕ່ເຮົາເອງ ກໍ່ຕ້ອງໄດ້ປະຕິບັດຕາມມາດຕະການ ການປ້ອງກັນຢ່າງເຂັ້ມງວດ ເປັນຕົ້ນແມ່ນ ການໃສ່ໜ້າກາກອະນາໄມ, ຖືເຈວລ້າງມືຕິດໂຕ, ຮັກສາໄລຍະຫ່າງກັບໝູ່ເພື່ອນ ແລະ ເມື່ອກັບມາຮອດເຮືອນແລ້ວ ຈະຕ້ອງໄດ້ຮີບອາບນໍ້າທັນທີ

ແນວໃດກໍ່ຕາມ, ເຖິງວ່າສະຖານະການ ການລະບາດຂອງພະຍາດໂຄວິດ-19 ໃນບ້ານເຮົາຈະຜ່ອນຄາຍລົງ ແຕ່ກໍ່ຍັງມີຄວາມສ່ຽງທີ່ຈະກັບມາລະບາດໃນຮອບໃໝ່ ເຊິ່ງທຸກຄົນກໍ່ຕ້ອງໄດ້ເປັນເຈົ້າການຮ່ວມກັນ ໂດຍການປະຕິບັດ ການປ້ອງກັນດ້ວຍວິທີຕ່າງໆ ເປັນຕົ້ນແມ່ນ: ການໃສ່ໜ້າກາກອະນາໄມ,​ ລ້າງມືເປັນປະຈໍາ, ກິນອາຫານທີ່ປຸງສຸກໃໝ່ໆ ແລະ ອຶ່ນໆ ເພື່ອສະກັດກັ້ນບໍ່ໃຫ້ພະຍາດດັ່ງກ່າວກັບມາລະບາດຮອບສອງ ເພາະມັນອາດຈະຮ້າຍແຮງກວ່າເກົ່າ

LEAVE A REPLY

Please enter your comment!
Please enter your name here