ດຽວນີ້ ຫຼາຍໆຄົນກໍ່ມັກຈະຊື້ເຄື່ອງອອນລາຍ ເພາະມັນທັງສະດວກສະບາຍ ບໍ່ຕ້ອງເສຍເວລາອອກໄປຊື້ເອງ, ແຕ່ໃນຄວາມສະດວກສະບາຍກໍ່ຍັງສາມາດພາດໄດ້ ເພາະອາດຈະໄດ້ເຄື່ອງບໍ່ກົງກັບປົກ ຫຼື ຊື້ເຄື່ອງມາແລ້ວ ແຕ່ໃຊ້ບໍ່ໄດ້,​ ມື້ນີ້ອິນໄຊລາວຈື່ງໄດ້ໃຫ້ສາວໆພະນັກງານຫ້ອງການ ຜູ້ມັກຊອ໋ບປີ້ງອອນລາຍເປັນປະຈໍາ ມາເລົ່າປະສົບການ ໃນການຊື້ເຄື່ອງອອນລາຍ ໃຫ້ທຸກຄົນໄດ້ຟັງ

ມຸກດາ ພະນັກງານຫ້ອງການແຫ່ງໜຶ່ງໄດ້ເວົ້າວ່າ: ຕົນເອງໄດ້ເລີ່ມຊື້ເຄື່ອງອອນລາຍມາຫຼາຍກວ່າ 4 ປີແລ້ວ ເຊິ່ງສິນຄ້າສ່ວນໃຫ່ຍທີ່ຊື້ແມ່ນຈະເປັນປະເພດທີ່ບໍ່ມີຂາຍໃນໜ້າຮ້ານທົ່ວໄປ ໂດຍຊ່ອງທາງທີ່ເລືອກຊື້ແມ່ນ ວິແຊັດ ແລະ ເຟສບຸກ ເຊິ່ງກ່ອນຈະຕັດສິນໃຈຊື້ແມ່ນຈະໄດ້ມີການເບິ່ງຣິວິວຮ້ານ ຣິວິວສິນຄ້າກ່ອນ ເພື່ອຄວາມໝັ້ນໃຈ ສຳລັບສິ່ງທີ່ຄິດວ່າຈະບໍ່ຊື້ຜ່ານອອນລາຍເລີຍ ໜ້າຈະເປັນປະເພດເກີບ ເພາະເຄີຍພາດມາຫຼາຍເທື່ອແລ້ວ ຊື້ມາຕາມຂະໜາດທີ່ເຮົາໃສ່ ແຕ່ເກີບພັດໃສ່ບໍ່ໄດ້ ແລະ ທາງຮ້ານກໍ່ບໍ່ປ່ຽນໃຫ້, ເຖິງວ່າຈະເຄີຍພາດ ແຕ່ກໍ່ຍັງໄດ້ເລືອກຊື້ເຄື່ອງຜ່ານອອນລາຍຢູ່ ເພາະມັນສະດວກສະບາຍດີ  

ນາລີ ພະນັກງານບໍລິສັດເອກະຊົນ ຜູ້ທີ່ບໍ່ມີເວລາອອກໄປຊື້ເຄື່ອງຢູ່ຕະຫຼາດ ໄດ້ເວົ້າໃຫ້ທີມງານເຮົາຟັງວ່າ: ເຫດຜົນທີ່ເລືອກຊື້ເຄື່ອງອອນລາຍ ຍ້ອນວ່າຕົນເອງເປັນຄົນບໍ່ມີເວລາອອກໄປຊື້ເຄື່ອງຢູ່ຕະຫຼາດ ແລະ ສິນຄ້າບາງອັນກໍ່ແມ່ນບໍ່ມີຂາຍໃນຕະຫຼາດ,​ ໂດຍການຊື້ເຄື່ອງອອນລາຍແມ່ນຈະຊື້ຜ່ານເຟສບຸກເທົ່ານັ້ນ ເພາະຕົນເອງໃຊ້ເຟສບຸກຫຼາຍກວ່າສື່ອອນລາຍອຶ່ນໆ. ຖາມວ່າສິນຄ້າໃດທີ່ຈະບໍ່ເລືອກຊື້ຜ່ານອອນລາຍເລີຍ ກໍ່ໜ້າຈະເປັນເກີບ ແລະ ປະເພດເຄື່ອງສໍາອາງ ເພາະບໍ່ໝັ້ນໃຈໃນແບຣນຜະລິດຕະພັນ  ໂດຍກ່ອນຈະເລືອກຊື້ແຕ່ລະຄັ້ງ ຕົນເອງຈະໃຊ້ເວລາຄິດ ແລະ ເບິ່ງຣິວິວຈາກຫຼາຍໆຄົນທີ່ເປັນລູກຄ້າຂອງຮ້ານນັ້ນກ່ອນ ຖ້າມີຄົນຄອມເມັ້ນໃນທາງບໍ່ດີ ກາຍ 4-5 ຄົນຂຶ້ນໄປ ແມ່ນຈະບໍ່ຊື້ເລີຍ ເພາະສະແດງວ່າສິນຄ້າໃນບໍ່ມີຄຸນນະພາບແລ້ວ

ຢູຢີ້ ພະນັກງານບໍລິສັດເອກະຊົນອີກຄົນໜຶ່ງກໍ່ໄດ້ເວົ້າວ່າ ຕົນເອງເປັນຄົນມັກຊື້ເຄື່ອງຢູ່ແລ້ວ ແຕ່ເມື່ອມີການຂາຍຜ່ານສື່ອອນລາຍແບບນີ້ ມັນກໍ່ສ້າງຄວາມສະດວກສະບາຍຂຶ້ນຕຶ່ມ ໂດຍສ່ວນໃຫ່ຍຕົນເອງຈະຊື້ຢູ່ເຟສບຸກ ຕາມໄລສົດຂອງແມ່ຄ້າຕ່າງໆ, ແຕ່ເຖິງຈະມີປະສົບການໃນການຊື້ເຄື່ອງອອນລາຍເທົ່າໃດ ແຕ່ກໍ່ຍັງເຄີຍພາດ ເຊິ່ງລ່າສຸດ ແມ່ນສັ່ງສະຕໍເບີຣິນຳແມ່ຄ້າທີ່ໄລສົດຜ່ານເຟສບຸກ ເຊິ່ງສິນຄ້າທີ່ໄດ້ແມ່ນບໍ່ເປັນຄືໃນຮູບ ແມ່ຄ້າຫົວໃສ ໄດ້ຍັດໃບຕອງໄວ້ດ້ານລຸ່ມ ແລະ ໝາກສະຕໍເບີຣິ ກໍ່ບໍ່ແດງຄືກັບແມ່ຄ້າໄດ້ເອົາມາໂຄສະນາຂາຍເລີຍ.​ ສໍາລັບສິນຄ້າທີ່ບໍ່ຄິດວ່າຈະຊື້ຜ່ານອອນລາຍເລີຍ ໜ້າຈະເປັນປະເພດໂທລະສັບ ເພາະເຮົາຈະໝັ້ນໃຈກວ່າເມື່ອໄດ້ໄປຊື້ກັບສູນທີ່ມີຮັບປະກັນຄັກແນ່

ພ່ວງສະບາ ຜູ້ມັກຊື້ເຄື່ອງອອນລາຍ ອີກຄົນໜື່ງໄດ້ກ່າວໄວ້ ສ່ວນຫຼາຍແມ່ນຊື້ເຄື່ອງປະເພດເສື້ອຜ້າ ເພາະຕົນເອງມັກແຕ່ງໂຕ ແຕ່ກໍ່ມີບາງຄັ້ງທີ່ຊື້ມາແລ້ວບໍ່ກົງປົກ ຫຼື ຂະໜາດບໍ່ຖືກກັບທີ່ເຮົາສັ່ງໄປ ແລະ ທາງຮ້ານກໍ່ບໍ່ຮັບປ່ຽນຄືນ ເຮົາກໍ່ຕ້ອງໄດ້ທຳໃຈວ່າການຊື້ເຄື່ອງອອນລາຍແມ່ນມີຄວາມສ່ຽງເລື່ອງນີ້ຫຼາຍຢູ່ແລ້ວ

“ການຊື້ເຄື່ອງອອນລາຍ ທຳໃຈໄວ້ເລີຍວ່າອາດຈະໄດ້ເຄື່ອງບໍ່ກົງປົກ” ພ່ວງສະບາ ໄດ້ກ່າວໄວ້

ແນວໃດກໍ່ຕາມ, ການຊື້ເຄື່ອງອອນລາຍກໍ່ຍັງຖືວ່າສ້າງຄວາມສະດວກສະບາຍໄດ້ຫຼາຍ ແຕ່ກໍ່ຍັງມີຄວາມສ່ຽງໃນຄຸນນະພາບຂອງສິນຄ້ານັ້ນໆ ຫຼື ບາງກໍລະນີ ອາດຈະຖືກຕົ້ມໄດ້ ສະນັ້ນ,​ ກ່ອນຊື້ເຄື່ອງອອນລາຍ ຄວນຈະມີການສຶກສາຮ້ານ ແລະ ສິນຄ້າໃຫ້ຊັດເຈນກ່ອນ

LEAVE A REPLY

Please enter your comment!
Please enter your name here