ໜັງສືພິມສະຫວັນພັດທະນາ ລາຍງານວ່າ: ຮອງເຈົ້າແຂວງເນັ້ນໃຫ້ກະສິກໍາ ເປັນຜູ້ສົ່ງເສີມ, ໃຫ້ການຄ້າ ເປັນຜູ້ຄວບຄຸມ ເພື່ອຜົນປະໂຫຍດລະຫວ່າງຜູ້ຊື້-ຜູ້ຂາຍ ໄດ້ສະທ້ອນໃຫ້ເຫັນຢ່າງຈະແຈ້ງວ່າ:ຖ້າແຕ່ລະຂະແໜງການເຮັດໜ້າທີ່ໃຜລາວຢ່າງມີປະສິດທິຜົນ ຈະເຮັດໃຫ້ການຜະລິດເປັນສິນຄ້າແຂງແຮງ ແລະ ຜູ້ຜະລິດໄດ້ຮັບຜົນປະໂຫຍດ.

ທ້າຍອາທິດຜ່ານມາ, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງ,ປະທານຄະນະສະເພາະກິດ ຕິດຕາມຜົນກະທົບທາງເສດຖະກິດ ເພື່ອຮັບມືກັບການລະບາດຂອງເຊື້ອພະຍາດໂຄວິດ-19 ແຂວງສະຫວັນນະເຂດ ພ້ອມດ້ວຍພະແນກກະສິກຳ-ປ່າໄມ້, ແຜນການ-ການລົງ ທຶນ ແລະ ພະແນກອຸດສາຫະກຳ ແລະ ການຄ້າແຂວງ ໄດ້ລົງສຳຫລວດພື້ນຖານການຜະລິດ, ການປູກ-ການລ້ຽງຂອງປະຊາຊົນເມືອງໄຊບູລີ, ນະຄອນໄກສອນພົມວິຫານ ແລະ ເມືອງໄຊພູທອງເພື່ອຊຸກ ຍູ້ການຜະລິດສະບຽງອາຫານ, ພືດຜັກໃຫ້ພຽງພໍຕາມຄວາມຕ້ອງການຂອງຕະຫລາດ ແລະ ການບໍລິ ໂພກ ຊຶ່ງຫລັງສຳຫລວດຕົວຈິງພົບວ່າ: ກຸ່ມປູກພືດຢູ່ເຂດປາກເຊບັ້ງໄຟເມືອງໄຊບູລີ ເປັນຕົ້ນ ກຸ່ມປູກ ພືດຢູ່ເຂດຫາດຊາຍແຄມຂອງບ້ານບົວໄຂ ແລະ ບ້ານເຊບັ້ງໄຟ ປະຊາຊົນຜະລິດໄດ້ຫລາຍຢ່າງ ເຊັ່ນ: ຜັກຫອມຊະນິດຕ່າງໆ, ໝາກແຕງ, ໝາກເຜັດ, ໝາກເຂືອ, ສາລີ, ໝາກເລັ່ນ ແລະ ອື່ນໆ ພຽງພໍຕໍ່ຄວາມຕ້ອງການຂອງຕະຫລາດ, ແຕ່ຈຳເປັນຕ້ອງໄດ້ເພີ່ມການບໍລິຫານຄຸ້ມຕອງຢ່າງເປັນລະບົບ, ພ້ອມທັງຈັດຕັ້ງກຸ່ມຜະລິດໃຫ້ເຂັ້ມແຂງຂຶ້ນຕື່ມອີກ.

ແນວໃດກໍ່ດີ,​ ເພື່ອບັນລຸເປົ້າໝາຍ ພາກລັດຕ້ອງໄດ້ສົ່ງເສີມຄວບຄຸມລາຄາສິນຄ້າ, ຈຳກັດການນຳເຂົ້າລວມທັງດຶງຕາໜ່າງໄຟຟ້າເພື່ອປະຊາຊົນນຳໃຊ້ເຂົ້າສູ່ການຜະລິດ. ນອກນີ້, ຄະນະດັ່ງກ່າວ ຍັງໄດ້ຕິດຕາມເບິ່ງຟາມລ້ຽງໄກ່ລາດບ້ານນ້ຳບໍ່, ຟາມລ້ຽງໝູ CP ບ້ານທ່າອຸດົມ ແລະ ຟາມລ້ຽງໝູທົ່ວໄປເຂດບ້ານນາແກ, ພ້ອມທັງສອບຖາມເຈົ້າຂອງໂຮງຂ້າສັດທ່າຊະໂນ ແລະ ໂຮງຂ້າສັດດອນເຊັງນະຄອນໄກສອນ ພົມວິຫານ ໂດຍເຫັນວ່າ: ທັງຟາມໝູ ແລະ ໄກ່ ສາມາດສະໜອງໃຫ້ຕະຫລາດໄດ້ພຽງພໍ. ແນວໃດກໍ່ດີ,ເຈົ້າຂອງໂຮງຂ້າສັດ ຕ້ອງເອົາໃຈໃສ່ປັບປຸງຄຸນ ນະພາບ ຄວາມສະອາດເພື່ອຄວາມປອດໄພຂອງຜູ້ບໍລິໂພກພ້ອມທັງໃຫ້ຈັດຕັ້ງກຸ່ມຜູ້ຂາຍຢູ່ຕະຫລາດຕ່າງໆ ເພື່ອຄວາມເປັນລະບຽບ ແລະ ສາມາດຄວບຄຸມໄດ້ ທັງເພື່ອຫລີກເວັ້ນການຂ້າສັດຊະຊາຍບໍ່ຜ່ານການກວດກາທີ່ຈະສົ່ງຜົນກະທົບຕໍ່ສຸຂະພາຂອງຜູ້ບໍລິໂພກ. ສ່ວນຟາມລ້ຽງງົວຢູ່ບ້ານທ່າໂພ ແລະ ບ້ານຫົວຫາດ ເມືອງໄຊພູທອງ ກໍ່ສາມາດສະໜອງຊີ້ນສັດໃຫ້ຕະຫລາດໄດ້ພຽງພໍເຊັ່ນດຽວກັນ.

ຮອງເຈົ້າແຂວງ, ປະທານຄະນະສະເພາະກິດ ຕິດຕາມຜົນກະທົບທາງເສດຖະກິດ ໄດ້ເນັ້ນໃຫ້ພະແນກກະສິກຳ-ປ່າໄມ້ ຈົ່ງເອົາໃຈໃສ່ສົ່ງເສີມການຜະລິດຂອງປະຊາຊົນໃຫ້ຖືກຕາມເຕັກນິກວິຊາການເພື່ອ ຕອບສະໜອງສະບຽງອາຫານໃຫ້ພຽງພໍຕາມຄວາມຕ້ອງການ. ຂະນະທີ່ພະແນກອຸດສາຫະກຳ ແລະ ການຄ້າຈົ່ງເອົາໃຈໃສ່ຄວບຄຸມລາຄາສິນຄ້າຕາມຕະຫລາດໃຫ້ເໝາະສົມລະຫວ່າງຜູ້ຊື້ ແລະ ຜູ້ຂາຍທັງຕ້ອງຊຸກຍູ້ການຕັ້ງກຸ່ມຜະລິດການປູກ, ການລ້ຽງ ແລະ ກຸ່ມຊື້-ຂາຍເພື່ອຄວາມເຂັ້ມແຂງ ແລະຜົນປະໂຫຍດ ຂອງທຸກຝ່າຍ.

LEAVE A REPLY

Please enter your comment!
Please enter your name here