ປະຈຸບັນ ຫຼາຍໆຄົນໄດ້ Work From Home ຫຼື ເຮັດວຽກຢູ່ເຮືອນແທນການໄປນັ່ງເຮັດວຽກຢູ່ຫ້ອງການ ລວມທັງມາດຕະການຕ່າງໆທີ່ລັດຖະບານໄດ້ກຳນົດໄວ້ ເພື່ອຄວບຄຸມການລະບາດຂອງພະຍາດໂຄວິດ-19 ເຮັດໃຫ້ລົດໃຫ່ຍ ທີ່ເຄີຍເປັນພາຫະນະທີ່ຕ້ອງໄດ້ໃຊ້ວຽກຢູ່ທຸກມື້ຕ້ອງໄດ້ຈອດຢູ່ເຮືອນລ້າໆ ບາງຄອບຄົວມີລົດຈັກ ກໍ່ໃຊ້ລົດຈັກໃນການອອກຕະຫຼາດແທນ ເພາະສະດວກກວ່າ 

ເຖິງແນວໃດກໍ່ຕາມ, ໃນສະຖານະການທີ່ບໍ່ຮູ້ວ່າ ການລະບາດຂອງພະຍາດໂຄວິດ-19 ຈະຈົບລົງມື້ໃດ ດັ່ງນັ້ນຄວນມີວິທີເບິ່ງແຍງລົດໃຫ່ຍ ໃຫ້ຢູ່ໃນສະພາບພ້ອມໃຊ້ວຽກຢູ່ສະເໝີ, ມື້ນີ້ອິນໄຊລາວ ຈຶ່ງໄດ້ນຳວິທີການເບິ່ງແຍງລົດໃຫ່ຍທີ່ຕ້ອງຈອດປະໄວ້ດົນໆ ມາແນະນຳ

1. “ລ້າງລົດ” ເຖິງວ່າຈະບໍ່ໄດ້ໃຊ້ລົດ ແຕ່ກ່ອນຈະຈອດລົດປະໄວ້ດົນໆ ເຮົາກໍ່ຕ້ອງໄດ້ລ້າງລົດໃຫ້ສະອາດ ເພື່ອທີ່ຈະບໍ່ໃຫ້ຄາບ ຫຼື ຝຸ່ນຕິດດົນໆເພາະຈະເຮັດໃຫ້ລ້າງອອກຍາກພາຍຫຼັງ ທັງນີ້, ນອກຈາກພາຍນອກແລ້ວ ຍັງຕ້ອງໄດ້ອະນາໄມພາຍໃນພ້ອມ ເພື່ອໃຫ້ປาສะຈາກໄວຣັສທີ່ເປັນສາເຫດຂອງພະຍາດໂຄວິດ-19 ນຳ 

2. “ໝໍ້ໄຟລົດ” ບັນຫາທີ່ຜູ້ຈອດລົດປະໄວ້ດົນໆມັກພົບພໍ້ ກໍ່ຄືໝໍ້ໄຟເສື່ອມ ໝໍ້ໄຟໝົດບໍ່ມີປະຈຸ ເພາະເຖິງວ່າເຮົາຈະບໍ່ໄດ້ໃຊ້ລົດ ແລະ ໃຊ້ລະບົບໄຟຕ່າງໆຂອງລົດ ແຕ່ຕາມປົກກະຕິແລ້ວ ໝໍ້ໄຟກໍ່ຍັງສົ່ງໄຟເພື່ອໄປລ້ຽງການເຮັດວຽກຕ່າງໆຂອງລົດ ສະນັ້ນ, ຄວນສະຫຼະເວລາຈາກການຢູ່ສະເພາະໃນເຮືອນ ມາສະຕາສລົດໄວ້ຈັກ 10 ນາທີ ອາທິດລະ 2 ເທື່ອ ຫຼື ຖ້າມີເວລາເຮັດທຸກມື້ໄດ້ແຮງດີ ເພາະຈະຍຶດເວລາການໃຊ້ງານຂອງໝໍ້ໄຟໄດ້

3. “ລົມລົດ-ລໍ້ລົດ” ເມື່ອຮູ້ວ່າຈະບໍ່ໄດ້ໃຊ້ລົດດົນ ຄວນເຕີມລົມຢ່າງໃຫ້ຫຼາຍກວ່າປົກກະຕິປະມານ 5-10 ປອນ  ຫຼື ຄວນຫາເວລາຂັບລົດອອກໆເຂົ້າໆໃນບໍລິເວນເຮືອນ ເພື່ອໃຫ້ລໍ້ໄດ້ໝຸນ ເພາະຖ້າຈອດດົນ ຈະເຮັດໃຫ້ມີບັນຫາເລື່ອງຢາງລົດບໍ່ຄືນຕົວ ເນື່ອງຈາກເກີດການຍຸບຂອງໂຄງຢາງ ສ່ວນໜ້າທີ່ສຳພັດກັບພື້ນ ເພາະນໍ້າໜັກທັງໝົດຂອງລົດຕົກລົງໄປຢູ່ຈຸດດຽວໄດ້ ເຊິ່ງຈະເຮັດໃຫ້ໂຄງສ້າງເສຍຮູບ ບໍ່ກົມ ເມື່ອນຳລົດໄປຂັບ ຈະຮູ້ສັ່ນ ເຕັ້ນ ແລະ ມີສຽງດັງຜິດປົກກະຕິ 

4. “ຂັບລົດອອກໄປນອກບາງເວລາ” ເພາະນອກຈາກ ຈະຕິດລົດໄວ້ 10 ນາທີ ລວມທັງການເຄື່ອນທີ່ໃນບໍລິເວນເດີນເຮືອນແລ້ວ ຄວນຂັບໄປຕະຫຼາດ ເພື່ອຍຶດເສັ້ນຍຶດສາຍແນ່ ເພາະລົດໃຫ່ຍມີຫຼາຍກົນໄກທີ່ເປັນຈຸດໝຸນ ຖ້າບໍ່ມີການຂັບດົນໆກໍ່ຈະເກີດການເປເພໄດ້ງ່າຍກ່ວາລົດທີ່ຖືກໃຊ້ເປັນປະຈຳ 

5. “ຂອງແຫຼວໃນລົດ” ຄວນມີການກວດສອບເບິ່ງ ເປັນຕົ້ນແມ່ນ ນໍ້າໃນໝໍ້ນໍ້າ ຫຼື ນໍ້າມັນເຄື່ອງ ໂດຍບໍ່ຄວນປ່ອຍໃຫ້ແຫ້ງດົນ ເພາະອາດເຂົ້າໝ້ຽງໄດ້ 

6. “ເຕີມນໍ້າມັນໃຫ້ເຕັມຖັງ” ການເຮັດແບບນີ້ ບໍ່ພຽງແຕ່ເພື່ອໃຫ້ພ້ອມສຳລັບການໃຊ້ວຽກເທົ່ານັ້ນ ແຕ່ເມື່ອນໍ້າມັນບໍ່ເຕັມຖັງ ມີບ່ອນວ່າງໃຫ້ເກີດການຄວບແໜ້ນຂອງຄວາມຊຸ່ມ ກາຍເປັນອາຍນໍ້າຢູ່ຕາມພື້ນຜິວທີ່ວ່າງໃນຖັງນ້ໍາມັນ ເຊິ່ງເມື່ອຈອດໄວ້ດົນໆຈະເຮັດໃຫ້ເຂົ້າໝ້ຽງ ແລະສົ່ງຜົນໃຫ້ລະບົບນ້ໍາມັນຕັນໄດ້ 

7. ເລືອກບ່ອນຈອດລົດ ຄວນຈອດລົດໄວ້ນໍາຮົ່ມ ຫຼື ຫາຜ້າມາປົກລົດໄວ້ ບໍ່ຄວນຈອດໄວ້ຮົ່ມຕົ້ນໄມ້ ເພາະອາດຈະມີງ່າໄມ້ຫັກມາໃສ່ ເຮັດໃຫ້ເສຍຫາຍໄດ້ ແລະ ກໍ່ບໍ່ຄວນຈອດໄວ້ໃກ້ກັບບ່ອນຖິ້ມຂີ້ເຫຍື້ອ ເພາະໜູ ຫຼື ແມງກະສາບອາດຈະມາອາໄສຢູ່ໃນລົດໄດ້ 

ທີ່ມາ: grandprix

ຮຽບຮຽງ: ອິນໄຊລາວ

LEAVE A REPLY

Please enter your comment!
Please enter your name here