ພາຍຫຼັງສະພາບການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກ ສາຍພັນໃໝ່ ຫຼື ໂຄວິດ 19 ໄດ້ແຜ່ລະບາດເປັນວົງກ້ວາງ ຢູ່ບັນດາຫຼາຍປະເທດໂດຍສະເພາະແມ່ນຢູ່ໃນ ສປປລາວ ກໍໄດ້ມີການກວດພົບເຫັນຜູ້ຕິດເຊື້ອ ດັ່ງນັ້ນທາງຕະນະສະເພາະກິດຂັ້ນເມືອງ ກໍໄດ້ພ້ອມກັນຈັດຕັ້ງປະຕິບັດຕາມຄຳສັ່ງຂອງນາຍຍົກລັດຖະມົນຕີ ແລະ ແຈ້ງການຂອງຫ້ອງການກະຊວງສາທາລະນະສຸກກໍຄືຄຳສັ່ງແນະນຳຂອງປະທານຄະນະກຳມະທິການຕ້ານ ແລະ ຄວບຄຸມພະຍາດຕິດຕໍ່ຂັ້ນເມືອງ.

ທ່ານ ສົມຫວັງ ລອຍວັນໄຊ ຮອງຫົວໜ້າຫ້ອງການສາທາລະນະສຸກເມືອງຕະໂອ້ຍ ທັງແມ່ນກອງເລຂາຄະນະສະເພາະກິດເພື່ອປ້ອງກັນຄວບຄຸມແລະແກ້ໄຂການລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ໂຄວິດ 19 ຂັ້ນເມືອງໄດ້ໃຫ້ສຳພາດຕໍ່ສື່ຂ່າວມວນຊົນ: ໃນວັນທີ 6 ເມສາ 2020 ນີ້ວ່າ: ປະຈຸບັນນີ້ທາງໂຮງໝໍເມືອງຕະໂອ້ຍແລະສະຖານທີ່ບໍລິການດ້ານສາທາລະນະສຸກແຕ່ລະແຫ່ງພາຍໃນເມືອງຕະໂອ້ຍຂອງພວກເຮົາ,ຊຶງມີຫ້ອງແຍກປ່ຽວກໍລະນີສົງໃສຕິດເຊື້ອພະຍາດໂຄວິດ 19 ກຳນົດເອົາ 4 ຈຸດຄື: ໂຮງໝໍເມືອງມີ 1 ຫ້ອງ,2ຕຽງ,ໂຮງໝໍນ້ອຍຫ້ວຍງົວມີ 1 ຫ້ອງ, 2ຕຽງ, ໂຮງໝໍນ້ອຍປະຈູດອນມີ 1 ຫ້ອງ, 2ຕຽງ,ໂຮງໝໍນ້ອຍໂບ້ງນ້ຳມີ1ຫ້ອງ,2ຕຽງ,ໃນນັ້ນມີອຸປະກອນທີ່ທັນສະໄຫມເພື່ອຊ່ວຍກັ່ນກ່ອງພະຍາດໂຄວິດ19ເປັນຕົ້ນແມ່ນ:ເຄື່ອງສະແກນອຸນຫະພູມໃນຮ່າງກາຍແລະອຸປະກອນອື່ນໆທີ່ກ່ຽວພັນການປ້ອງກັນພະຍາດໂຄວິດ19ຢ່າງພຽງພໍ,ສຳລັບພະນັກງານແພດໝໍກໍໄດ້ຮັບການຝຶກອົບຮົມເປັນຢ່າງດີແລະມີທີມງານຕອບໂຕ້ໄວຂອງໂຮງໝໍ ເພື່ອຮັບມືກັບພະຍາດດັ່ງກ່າວ.

ທ່ານ ຮອງຫົວໜ້າຫ້ອງການສາທາລະນະສຸກເມືອງຕະໂອ້ຍ, ຍັງຮຽກຮອງມາຍັງພະນັກງານ,ທະຫານ,ຕຳຫຼວດຕະຫຼອດເຖີງພໍ່ແມ່ປະຊາຊົນທຸກພາກສ່ວນ ຖ້າຫາກເຫັນວ່າຕົນເອງມີອາການໃກ້ຄຽງກັບອາການຂອງພະຍາດໂຄວິດ19ກໍສາມາດເຂົ້າມາກວດກາ,ປຶກສານຳແພດໝໍຢູ່ທີ່ໂຮງໝໍເມືອງຫຼືໂຮງໝໍນ້ອຍໃກ້ບ້ານທ່ານກໍໄດ້,ທັງນີ້ກໍເພື່ອເປັນການຮັກສາໃຫ້ທັນເວລາແລະປ້ອງກັນການແຜ່ເຊື້ອໄປສູ່ຄົນອື່ນ,ເອົາໃຈໃສ່ໃນການຮັກສາອະນາໄມແລະຫຼີກລຽງການອອກຈາກເຮືອນ ເພື່ອປ້ອງກັນການຕິດເຊື້ອຈາກພະຍາດດັ່ງກ່າວອີກດ້ວຍ.

ທີ່ມາ:ນັກຂ່າວເມືອງຕະໂອ້ຍ ແຂວງສາລະວັນ

LEAVE A REPLY

Please enter your comment!
Please enter your name here