ສະພາບການລະບາດຂອງພະຍາດໂຄວິດ-19 ໃນທົ່ວໂລກຍັງມີໂຕເລກຜູ້ຕິດເຊື້ອເພີ່ມຂຶ້ນເລື້ອຍໆ ລວມທັງ ສປປ ລາວ ເຮົາທີ່ປະຈຸບັນ (6 ເມສາ 2020) ກໍ່ໄດ້ມີຍອດຜູ້ຕິດເຊື້ອທັງໝົດ 12 ຄົນ. ເຊິ່ງກ່ອນໜ້ານີ້ ທ່ານນາຍົກລັດຖະມົນຕີ ກໍ່ໄດ້ອອກຄຳສັ່ງສະບັບເລກທີ 06/ນຍ ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ ການລະບາດ ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19

ໂດຍໃນນັ້ນຄຳສັ່ງຂໍ້ 3 ແມ່ນຫ້າມປະຊາຊົນອອກຈາກເຮືອນ ຫຼື ທີ່ພັກຂອງຕົນ ຍົກເວັ້ນກໍລະນີຈໍາເປັນ ເລີ່ມແຕ່ວັນທີ 1 ເມສາ-19 ເມສາ 2020 ແລະ ໃນຫຼາຍໆເມືອງທົ່ວປະເທດແມ່ນມີການປິດເມືອງ ເຂັ້ມງວດໃນການເຂົ້າອອກເມືອງຂອງປະຊາຊົນ ເພື່ອສະກັດກັ້ນບໍ່ໃຫ້ພະຍາດໂຄວິດ-19 ລະບາດອອກເປັນວົງກ້ວາງ

ແລ້ວໃນສະຖານະການແບບນີ້, ດາລາ ເຊເລັບ ຄົນບັນເທິງລາວ ຈະພາກັນເຮັດຫຍັງຢູ່ເຮືອນ. ມື້ນີ້ເຮົາຈະພາມາເບິ່ງກິດຈະກໍາຢູ່ເຮືອນຂອງ ດາລາ ເຊເລັບ ຄົນບັນເທິງລາວ ວ່າຈະມີຫຍັງແດ່

ເລີ່ມຕົ້ນທີ່ ພູມສະນະ ສີຣິວົງສາ ຫຼື ເຈ້ຍ ປາຊີຟິກ ປະທານແຂ້ວແຫ້ງ ໂປຣດັກຊັນ, ຜູ້ກຳກັບຮູບເງົາ, ນັກສະແດງ, ນັກຮ້ອງ ທີ່ກ່ອນໜ້ານີ້ໄດ້ໂພສຜ່ານເຟສບຸກສ່ວນໂຕວ່າ: ໃຫ້ພະນັກງານໂຈະເຮັດວຽກ ຈົນກວ່າສະຖານະການການລະບາດຂອງໂຄວິດ-19 ຈະດີຂຶ້ນ ແລະ ລ່າສຸດເຈົ້າຂອງເອງ ກໍ່ໄດ້ຜັນໂຕເອງໄປເປັນຊາວໄຮ່ຊາວສວນ ໂດຍເຈ້ຍ ໄດ້ອອກໄປເກັບຜົນລະປູກ ເປັນຕົ້ນແມ່ນ: ໝາກມ່ວງ ໝາກເງາະ ໝາກສີດາ ເຂົ້າມາຂາຍຢູ່ໜ້າເຮືອນຂອງຕົນເອງ ພ້ອມກັບມີບໍລິການສົ່ງຮອດເຮືອນອີກດ້ວຍ

ມາຕໍ່ກັບ ດຣ. ອິນລືຊາ ບາເເສງຄໍາ  ເມື່ອນາງງາມ ຕ້ອງຢູ່ເຮືອນເພື່ອຕ້ານການລະບາດຂອງໂຄວິດ-19 ເຮັດໃຫ້ນາງງາມຜູ້ຫລາກຫລາຍຄວາມສາມາດ ຕ້ອງໄດ້ລຸກຂຶ້ນມາ ນັ່ງຈັບໃບຕອງຫໍ່ໝົກໜໍ່ໄມ້ ທີ່ໄດ້ຕົ້ນສະບັບຈາກແມ່ຂອງຕົນເອງ ແລ້ວເປີດອໍເດີ້ຂາຍຜ່ານເຟສບຸກສ່ວນໂຕ ພ້ອມກັບມີບໍລິການຈັດສົ່ງເອງ ຮອດໜ້າເຮືອນເລີຍ, ນອກຈາກນີ້ແລ້ວ ຍັງໄດ້ສອນພາສາອັງກິດແບບອອນລາຍ ຖືໄດ້ວ່າເຖິງຈະຢູ່ເຮືອນ ແຕ່ກໍ່ຍັງສາມາດສົ່ງຕໍ່ຄວາມຮູ້ໃຫ້ບັນດາລູກສິດໄດ້ນໍາ

ຖືໄດ້ວ່າເປັນນາງງາມສາຍບຸນກໍ່ວ່າໄດ້ ສຳລັບ ລູກນໍ້າ ທິດາລັດ ວົງສີຣິ ໃນຊ່ວງທີ່ຕ້ອງຢູ່ເຮືອນແບບນີ້ ລູກນໍ້າກໍ່ບໍ່ໄດ້ຢູ່ເຮືອນລ້າໆ ເພາະໄດ້ລະດົມທຶນ ເພື່ອຊື້ອຸປະກອນທາງການແພດ ເປັນຕົ້ນແມ່ນ: ໜ້າກາກອະນາໄມ, ເຈວລ້າງມື ແລະ ອຶ່ນໆ ເພື່ອມອບໃຫ້ແພດໝໍ ແລະ ເຈົ້າໜ້າທີ່ ທີ່ໄດ້ປະຕິບັດໜ້າທີ່ຕ້ານໂຄວິດ-19, ເຖິງວ່າລູກນໍ້າຈະບໍ່ໄດ້ໄປມອບເອງກໍ່ຕາມ ແຕ່ລູກນໍ້າກໍ່ໄດ້ລົງແຮງແພັກເຄື່ອງເອງທັງໝົດ ແລ້ວສົ່ງໄປມອບໃຫ້ກັບເຈົ້າໜ້າທີ່ທີ່ກ່ຽວຂ້ອງນໍາໄປມອບຕໍ່ໃນແຕ່ລະຈຸດ

ຢຸ້ຍ ສັນທະນີ ໃສມະນີວັນ ນາງງາມສາຍບຸນອີກໜຶ່ງຄົນ ທີ່ຢູ່ເຮືອນລ້າໆບໍ່ໄດ້ ຕ້ອງໄດ້ລຸກຂຶ້ນມາຈັບຈັກຫຍິບຜ້າ ລົງແຮງຫຍິບໜ້າກາກຜ້າ 3 ຊັ້ນ ໂດຍໄດ້ໃຊ້ຜ້າໄຕ ແຜນກອງ ຜ້າຝ້າຍ  ທັງສີຂາວ ແລະ ສີເຫລືອງ ຈໍານວນ 230 ອັນ  ເພື່ອຖວາຍແກ່ ພຣະສົງ ສຳມະເນນ ແລະ ແມ່ຂາວ ໃນແຂວງສາລະວັນ ແລະ ວັດເຂດຫ່າງໄກສອກຫຼີກ. ນອກຈາກຈະລົງແຮງຫຍິບຜ້າອັດປາກເອງແລ້ວ ຍັງໄດ້ລະດົມທຶນກັບໝູ່ ເພື່ອຊື້ໜ້າກາກອະນາໄມ ເຈວລ້າງມື ເພື່ອບໍລິຈາກຄັ້ງນີ້ດ້ວຍ

ມາຕໍ່ກັບອີກໜຶ່ງຄົນ ໝໍແນ່ງ ຈັນດາລີ ສິດພະໄຊ ທີ່ໄດ້ເປັນສື່ກາງໃນການລະດົມທຶນ ສົມທົບອຸປະກອນທາງການແພດ ເພື່ອຕ້ານພະຍາດໂຄວິດ-19 ໂດຍສະເພາະກໍ່ແມ່ນ ໜ້າກາກອະນາໄມ ເຈວລ້າງມື ທີ່ຈໍາເປັນໃນການຕ້ານພະຍາດດັ່ງກ່າວ ມອບໃຫ້ກັບຫຼາຍໆພາກສ່ວນ ເປັນຕົ້ນກໍ່ແມ່ນໜ່ວຍງານທີ່ກໍາລັງປະຕິບັດໜ້າທີ່ໃນກ່ຽວກັບການປ້ອງກັນ ຄວບຄຸມ ແລະ ສະກັດກັ້ນພະຍາດໂຄວິດ-19

ສຸດທ້າຍກັບ ໜຸ່ມ ຕ່າຍ ອາກາດ ທີ່ໄດ້ມອບຄວາມມ່ວນຊື່ນໃຫ້ກັບແຟນເພງຜ່ານສຽງເພງຂອງຕົນເອງ ໂດຍການຈັດ Home Music ຢູ່ເຮືອນ ແລ້ວຖ່າຍທອດສົດຜ່ານເຟສບຸກສ່ວນຕົວ ເປີດໂອກາດໃຫ້ແຟນເພງໄດ້ເຂົ້າມາຂໍເພງ ແລ້ວຮ້ອງໃຫ້ຟັງສົດໆເລີຍ

ແນວໃດກໍ່ດີ, ອິນໄຊລາວ ຂໍຮ່ວມເປັນສ່ວນໜຶ່ງ ໃນການຢູ່ເຮືອນ ຢຸດເຊື້ອເພື່ອຊາດ ແລະ ຂໍທຸກໆຄົນຜ່ານຊ່ວງເວລານີ້ໄປໂດຍໄວ

LEAVE A REPLY

Please enter your comment!
Please enter your name here