ສະຖານະການພະຍາດໂຄວິດ-19 ທີ່ກຳລັງລະບາດຢູ່ໃນຂະນະນີ້ ມີຫຼາຍບໍລິສັດອອກນະໂຍບາຍໃຫ້ພະນັກງານເຮັດວຽກຢູ່ເຮືອນ ແລະ ຫຼາຍໆຄົນອາດຮູ້ສຶກວ່າເວລາເຮົາຢູ່ເຮືອນດົນໆ ອາດເຮັດໃຫ້ເຮົາຮູ້ສຶກໝົດໄຟ ຫຼື ບໍ່ຮູ້ຈະເຮັດຫຍັງດີ

ມື້ນີ້ ອິນໄຊລາວ ໄດ້ນຳວິທີເບິ່ງແຍງໂຕເອງ ໃນຂະນະທີ່ຢູ່ເຮືອນ ເພາະເວລານີ້ແລະ ເປັນເວລາທີ່ຄວນເບິ່ງແຍງໂຕເອງເປັນທີ່ສຸດ

1.     ອອກກຳລັງກາຍ

ຮອດເວລາແລ້ວ ທີ່ເຮົາຕ້ອງອອກກຳລັງກາຍ ເບິ່ງແຍງຕົນເອງ ເລີ່ມງ່າຍໆ ໂດຍການເປີດຢູທູບ ເຕັ້ນຫຼືເຮັດຕາມວິດີໂອໃນຢູທູບ ຫຼື ຈະເປັນການອອກກຳລັງການແບບງ່າຍໂດຍທີ່ບໍ່ຕ້ອງມີອຸປະກອນ

2.     ນັ່ງສາມະທິ

ຈາກເຫດການໂຄວິດ ຄົງເຮັດໃຫ້ຫຼາຍໆຄົນຮູ້ສຶກຄຽດ ມື້ນີ້ເຮົາຈື່ງຢາກຊວນທຸກໆຄົນ ມານັ່ງສາມະທິ ເຊິ່ງສາມາດປະຕິບັດໄດ້ງ່າຍໆ ແຕ່ສາມາດຊ່ວຍຫຼຸດຄວາມຄຽດໄດ້ເປັນຢ່າງດີ ເຮັດໃຫ້ໃຈເຢັນຂຶ້ນ ມີສະຕິກັບສິ່ງຕ່າງໆໄດ້ຫຼາຍຂຶ້ນ ພຽງມື້ລະ 5-10 ນາທີ ຫຼັງຈາກນັ້ນກໍ່ຄ່ອຍໆເພີ່ມເວລາຂຶ້ນ

3.     ຕັ້ງເວລາໃນການຫຼີ້ນໂຊຊຽວ

ປະຕິເສດບໍ່ໄດ້ເລີຍວ່າ ຂ່າວສານສ່ວນໃຫ່ຍແມ່ນມັກຢູ່ໃນໂລກອອນລາຍ ແຕ່ຖ້າເຮົາເສບຂ່າວຫຼາຍເກີນໄປ ອາດເຮັດໃຫ້ເຮົາຈິດຕົກ ແລະ ນັ້ນກໍ່ບໍ່ແມ່ນສິ່ງທີ່ດີສຳລັບເຮົາແນ່ນອນ ດັ່ງນັ້ນ, ເຮົາຄວນກຳນົດເວລາໃນການຫຼີ້ນໂຊຊຽວ ເປັນມື້ລະ 3 ເທື່ອ ເທື່ອລະໜຶ່ງ 1 ຊົ່ວໂມງ ແລະ ເວລາທີ່ຫ້າມແມ່ນ ກ່ອນເຂົ້ານອນ ຈະເຮັດໃຫ້ເຮົາຜ່ອນຄາຍ ແລະ ບໍ່ຄຽດເກີນໄປຈາກການເສບຂ່າວ

4.     ອາບນໍ້າໃຫ້ຜ່ອນຄາຍ

ການອາບນໍ້າຖືໄດ້ວ່າເປັນການຜ່ອນຄາຍທີ່ດີທີ່ສຸດວິທີໜຶ່ງ ເຊິ່ງເປັນວິທີທີ່ງ່າຍ ແລະໄດ້ຜົນດີ ຖ້າຫາກຮູ້ສຶກເມື່ອຍ ລອງອາບນໍ້າເບິ່ງເດີ້ ແລ້ວຈະຮູ້ສຶກສະບາຍຂຶ້ນ

5.     ຂຽນເລື່ອງລາວດີໆ

ທີ່ເຮົາຢາກຂອບໃຈ ຫຼາຍເທື່ອທີ່ເຮົາຮູ້ສຶກຄຽດ ແຖມຍັງມີກິດຈະກຳທີ່ຕ້ອງເຮັດອີກຫຼາກຫຼາຍ ຈົນເຮົາເບິ່ງຂ້າມສິ່ງດີໆ ທີ່ເກີດຂຶ້ນໃນແຕ່ລະມື້ໄປ  ການທີ່ເຮົາໄດ້ເຮັດວຽກຢູ່ເຮືອນ ຖືວ່າເປັນເລື່ອງດີ ເຮັດໃຫ້ເຮົາໄດ້ເຂົ້າໃຈຕົວເອງຫຼາຍຂຶ້ນ ແລະ ຖ້າມີເວລາວ່າງເລັກນ້ອຍ ຢາກໃຫ້ທ່ານລອງຂຽນສິ່ງທີ່ຢາກຂອບໃຈ ອາດຈະເປັນເລື່ອງເລັກໆນ້ອຍໆ ຕົວຢ່າງ: ຂອບໃຈມື້ນີ້ທີ່ໄດ້ກິນເຂົ້າທີ່ແຊບ ຫຼື ຂອບໃຈທີ່ມື້ນີ້ອາກາດບໍ່ຮ້ອນຫຼາຍ

6.     ລອງເຮັດແນວກິນ

ໃນເວລານີ້ ທີ່ເຮົາບໍ່ສາມາດອອກຈາກເຮືອນໄດ້ ຢາກໃຫ້ທຸກຄົນລອງເຮັດອາຫານເບິ່ງ ໂດຍເລີ່ມຕົ້ນຈາກເມນູງ່າຍໆ ຫຼື ເມນູທີ່ມັກ ແຕ່ເຮັດບໍ່ເປັນກ່ອນ ເຊິ່ງມັນຈະຊ່ວຍໃຫ້ເຮົາໄດ້ຜ່ອນຄາຍ ແລະ ໄດ້ກິນອາຫານທີ່ມີປະໂຫຍດອີກດ້ວຍ

7.     ຈັດເຮືອນໃຫ້ເປັນລະບຽບຫຼາຍຂຶ້ນ

ລອງແນມເບິ່ງພາຍໃນເຮືອນ ວ່າມີຫຍັງທີ່ຍັງບໍ່ເປັນລະບຽບຢູ່ຫຼືບໍ່ ອາດຈະເລີ່ມຈາກຈັດມຸມຫ້ອງ ຈັດຊັ້ນວາງປື້ມ ຫຼື ຈັດຕູ້ເຄື່ອງ ໃຫ້ເປັນລະບຽບຮຽບຮ້ອຍຫຼາຍຂຶ້ນ

8.     ເປີດໂທລະພາບ

ເບິ່ງລາຍການຕ່າງໆທີ່ທ່ານມັກ ບາງຄົນອາດຈະບໍ່ມີເວລາເບິ່ງໂທລະພາບເລີຍ ຈົນລືມໄປແລ້ວວ່າເຮົາເບິ່ງໂທລະພາບລ່າສຸດມື້ໃດ. ມື້ນີ້ເຮົາເລີຍຢາກແນະນຳໃຫ້ທຸກຄົນລອງເປີດໂທລະພາບເບິ່ງລາຍການທີ່ໜ້າສົນໃຈ ແລະ ບາງທີ່ອາດຈະພົບເຫັນລາຍການໃໝ່ໆກໍເປັນໄດ້

9.     ໂທຫຼີ້ນນໍາໝູ່

ຖ້າມີເວລາວ່າງ ການທີ່ເຮົາຢູ່ເຮືອນດົນໆ ອາດເຮັດໃຫ້ເຮົາເຫງົາ  ແຕ່ເຮົາຢ່າລືມວ່າ ເຮົາສາມາດວິດີໂອຄໍຫາໝູ່ ບໍ່ວ່າຈະເປັນກຸ່ມຫຼືສ່ວນໂຕກໍ່ສາມາດເຮັດໄດ້

10.   ເຮັດສິ່ງຂັ້ນເວລາ

ຖືວ່າເປັນໂອກາດທີ່ດີ ທີ່ເຮັດໃຫ້ເຮົາໄດ້ມີໂອກາດເຮັດໃນສິ່ງທີ່ມັກ ເປັນຕົ້ນແມ່ນ: ການອ່ານໜັງສື ຟັງເພງ ແລະ ອື່ນໆ ທີ່ເຮົາຮູ້ສຶກມັກ ກໍ່ສາມາດເຮັດໄດ້ໃນຕອນນີ້ ເຊິ່ງມັນຈະຊ່ວຍໃຫ້ເຮົາບໍ່ເບື່ອ

ການເຮັດວຽກຢູ່ເຮືອນນັ້ນ ຊ່ວຍໃຫ້ເຮົາໄດ້ຮຽນຮູ້ສິ່ງໃໝ່ໆ ຫຼື ເຮັດໃນສິ່ງທີ່ເຮົາບໍ່ເຄີຍເຮັດ  ແລະ ຢ່າລືມວ່າຊ່ວງນີ້ ເຮົາຕ້ອງເບິ່ງແຍງສຸຂະພາບຕົນເອງໃຫ້ດີທີ່ສຸດ ຫາກບໍ່ຈໍາເປັນ ບໍ່ຄວນອອກຈາກເຮືອນ ເພື່ອຫຼຸດອັດຕາສ່ຽງໃນການຕິດເຊື້ອພະຍາດໂຄວິດ-19

LEAVE A REPLY

Please enter your comment!
Please enter your name here