ເພື່ອຕິດຕາມການເຝົ້າລະວັງ ແລະ ໂຕ້ຕອບການລະບາດຂອງພະຍາດອັກເສບປອດຍ້ອນເຊື້ອຈຸລະໂລກສາຍພັນໃໝ່ ໂຄວິດ-19 ບໍ່ໃຫ້ມີການແຜ່ລະບາດພາຍໃນແຂວງສະຫວັນນະເຂດ ດັ່ງນັ້ນໃນວັນທີ 23 ມີນາ 2020 ນີ້

ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ,ທ່ານ ດຣ ບົງສຸວັນ ພັນທະວົງສາ ຫົວໜ້າພະແນກສາທາລະນະສຸກແຂວງ,ພ້ອມດ້ວຍຫົວໜ້າພະແນກການຕ່າງໆຂອງແຂວງ ໄດ້ລົງເຄື່ອນໄຫວຕິດຕາມກວດກາແຮງງານລາວທີ່ເດີນທາງກັບຄືນປະເທດທີ່ດ່ານສາກົນຂົວມິດຕະພາບ 2 ສະຫວັນນະເຂດ-ມຸກດາຫານ ແລະ ລົງກວດກາເບິ່ງສູນກັກກັນຊົ່ວຄາວເພື່ອຮອງຮັບບຸກຄົນທີ່ມີຄວາມສ່ຽງດັ່ງກ່າວ ທີ່ນະຄອນໄກສອນ ພົມວິຫານ

ຊຶ່ງປະກອບມີ 2 ສູນຄື:

ສູນກັກກັນຊົ່ວຄາວມັດທະຍົມຕົ້ນຍາງສູງ,ສູນຫ້ອງການບ້ານສົ້ມປ່ອຍມີຈຳນວນຜູ້ທີ່ຖືກກັກກັນທັງໝົດ 21 ຄົນ,ຍິງ 8 ຄົນ ສຳລັບເມືອງໄຊພູທອງແມ່ນໄດ້ກຳນົດເອົາບ້ານທີ່ມີສຸກສາລາປະຈຳບ້ານເປັນບ່ອນກຳນົດສູນກັກກັນຊົ່ວຄາວຊຶ່ງປະກອບມີ 8 ສູນຄື:ໂຮງຮຽນໄຊພູທອງ,ໂຮງຮຽນນາຄຳ,ໂຮງຮຽນຫົວຫາດ,ໂຮງຮຽນທ່າໂພ,ໂຮງຮຽນເຮືອນຫີນ,ໂຮງຮຽນພູມມະເຈດີ,ໂຮງຮຽນມ່ວງໄຂ່,ໂຮງຮຽນນ້ຳພຸ,ໂຮງຮຽນບຸ່ງນາດີ ແລະ ໂຮງ ຮຽນນາໂມງເຊິ່ງລວມມີຜູ້ຖືກກັກກັນທັງໝົດ 446 ຄົນ,ຍິງ 248 ຄົນ.

ສຳລັບບຸກຄົນທີ່ຖືກກັກກັນໃນຄັ້ງນີ້ ແມ່ນຈະໄດ້ມີການຕິດຕາມກວດກາດ້ານສຸຂະພາບຢ່າງໃກ້ຊິດຈາກພະນັກ ງານແພດໝໍປະຈຳສູນຈົນກວ່າຈະເຖິງກຳນົດ 14 ວັນຖ້າຫາກວ່າບໍ່ພົບກໍລະນີສົງໃສ ຫຼື ເປັນໄຂ້ທາງສູນແມ່ນຈະອະນຸຍາດໃຫ້ບຸກຄົນດັ່ງກ່າວກັບຄືນບ້ານເຮືອນຂອງຕົນເອງໄດ້.

ໂອກາດລົງເຄື່ອນໄຫວຕິດຕາມກວດກາແຮງງານລາວທີ່ເດີນທາງກັບຄືນປະເທດທີ່ດ່ານສາກົນຂົວມິດຕະພາບ 2 ແລະ ສູນກັກກັນຊົ່ວຄາວຄັ້ງນີ້ ທ່ານເຈົ້າແຂວງກໍ່ໄດ້ເນັ້ນໜັກໃຫ້ເຈົ້າໜ້າທີ່ຂອງດ່ານສົມທົບກັບພະແນກໂຍທາທິການ ແລະ ຂົນສົ່ງແຂວງ.

ໃນການຈັດສັນລົດໂດຍສານເພື່ອຂົນສົ່ງແຮງງານລາວທີ່ມາຈາກປະເທດໄທ ນຳສົ່ງໄປຍັງສູນກັກກັນຊົ່ວຄາວຂອງແຕ່ລະເມືອງຕາມຄວາມເໝາະສົມ ແລະ ຍັງໄດ້ເນັ້ນໃຫ້ການນຳຂອງເມືອງພ້ອມດ້ວຍພາກສ່ວນທີ່ກ່ຽວ ຂ້ອງຕ້ອງໄດ້ເອົາໃຈໃສ່ ໂຄສະນາສຸຂະສຶກສາໃຫ້ປະຊາຊົນມີຄວາມຕື່ນຕົວເປັນເຈົ້າຕົນເອງໃນການເຝົ້າລະ ວັງ,ຮ່ວມກັນສືບຕໍ່ແກ້ໄຂທາງດ້ານຂໍ້ຫຍຸ້ງຍາກເປັນຕົ້ນແມ່ນອຸປະກອນການແພດ,ເຄື່ອງມືຮັບໃຊ້ຕ່າງໆໂດຍການແບ່ງໃຊ້ງົບປະມານຂອງທ້ອງຖິ່ນ ພ້ອມທັງປຸກລະດົມການຊ່ວຍເຫຼືອຈາກສັງຄົມ ແລະ ເອົາໃຈໃສ່ສືບຕໍ່ກຽມຮອງຮັບຕື່ມອີກ ເນື່ອງຈາກວ່າໄລຍະນີ້ຍັງມີຜູ້ເດີນທາງກັບຄືນປະເທດຢູ່ເລື້ອຍໆ.

ສໍາລັບແຮງງານລາວທີ່ເດີນທາງກັບຄືນປະເທດ ຜ່ານດ່ານສາກົນຂົວມິດຕະພາບ 2 ໃນຄັ້ງວັນທີ 23 ມີນາ 2020 ນີ້ ຈາກໂຕເລກລ່າສຸດແມ່ນ 4.000 ກວ່າຄົນ ໃນນີ້ມີຄົນຕ່າງແຂວງ 400 ກວ່າຄົນ.

ແຫຼ່ງຂໍ້ມູນ: ມີເດຍລາວ

LEAVE A REPLY

Please enter your comment!
Please enter your name here