ແຂວງໄຊສົມບູນ ​ເຄີຍ​ເປັນ​ເຂດ​ປົກຄອງ​ພິ​ເສດ ທີ່ຢູ່​ພາຍ​ໃຕ້​ຄວາມ​ຮັບຜິດຊອບ​ຂອງ​ ກອງທັບປະຊາຊົນ​ລາວ ​ໃນ​ຊ່ວງ​ປີ 1994-2006 ​ ແລະ ​ລັດຖະບານ​ລາວ​ໄດ້​ປະກາດ​ຍົກ​ເລີກ​ເຂດ​ພິ​ເສດ​ໄຊ​ສົມບູນດັ່ງກ່າວ​ໃນ​ປີ 2006 ​ແລ້ວ​ກໍ​ໄດ້​ໂອນ​ຍ້າຍ​ເມືອງ​ໄຊ​ສົມບູນ​ ແລະ​ ເມືອງ​ຮົ່ມ​ໄປ​ຢູ່​ພາຍ​ໃຕ້ ອໍານາດການປົກຄອງແຂວງວຽງຈັນ ແລະ ແຂວງຊຽງຂວາງ.

ການ​ສ້າງ​ຕັ້ງ​ແຂວງ​ໄຊ​ສົມບູນ ​ເປັນ​ແຂວງ​ທີ 18 ຂອງ ສປປ.ລາວ (ລວມ 1 ນະຄອນຫຼວງ) ພິທີການ​ປະກາດການ​ສ້າງ​ຕັ້ງ​ແຂວງ​ໄຊ​ສົມບູນ ​ເປັນ​ແຂວງ​ທີ 18 ຂອງ ສປປ.ລາວ ​ໄດ້​ມີ​ຂຶ້ນຢ່າງ​ເປັນ​ທາງ​ການ​ໃນວັນ​ທີ 13 ທັນວາ ປີ 2013 ທີ່​ຜ່ານ​ມາ ​ໂດຍ​ມີ​ທ່ານ​ທອງ​ສິງ ທໍາ​ມະ​ວົງ ນາຍົກລັດຖະມົນຕີ (ຂະນະນັ້ນ) ພ້ອມ​ດ້ວຍ​ການ​ນໍາ​ພັກ-ລັດ ອໍານາດ​ການ​ປົກຄອງ​ທ້ອງ​ຖິ່ນ ພະນັກງານ​ລັດຖະກອນ ​ແລະ​ປະຊາ​ຊົນ​ລາວ ​ເຂົ້າຮ່ວມ​ໃນ​ພິທີ​ດັ່ງ​ກ່າວ​.

ແຂວງໄຊສົມບູນ ເປັນແຂວງໜຶ່ງໃນ 18 ແຂວງຂອງ ສາທາລະນະລັດປະຊາທິປະໄຕປະຊາຊົນລາວ ຊຶ່ງມີທີ່ຕັ້ງຢູ່ໃນເຂດພາກກາງຂອງປະເທດ ຂອບເຂດຊາຍແດນດັ່ງນີ້:

  • ທິດເໜືອ ມີຊາຍແດນ ຕິດກັບ ເມືອງພູຄູນ ແຂວງຫຼວງພຣະບາງ, ເມືອງພູກູດ,ເມືອງຜາໄຊ ແລະ ເມືອງຄູນ ແຂວງຊຽງຂວາງ.
  • ທິດໃຕ້ ມີຊາຍແດນ ຕິດກັບ ເມືອງທຸລະຄົມ ແຂວງວຽງຈັນ ແລະ ເມືອງທ່າພະບາດ ແຂວງບໍລິຄໍາໄຊ
  • ທິດຕາເວັນຕົກ ມີຊາຍແດນ ຕິດກັບ ເມືອງກາສີ, ເມືອງວັງວຽງ, ແລະ ເມືອງແກ້ວອຸດົມ ແຂວງວຽງຈັນ
  • ທິດຕາເວັນອອກ ມີຊາຍແດນ ຕິດກັບ ເມືອງໝອກໃໝ່ ແຂວງ ຊຽງຂວາງ ແລະ ເມືອງບໍລິຄັນ ແຂວງບໍລິຄໍາໄຊ

ແຂວງ​ໄຊ​ສົມບູນ ປະກອບ​ມີ​ເຂດ​ການ​ປົກຄອງ 5 ​ເມືອງ​ດ້ວຍ​ກັນ​ກໍ​ຄື :​ເມືອງ​ຮົ່ມ ​ເມືອງ​ທ່າ​ໂທມ ​ເມືອງອະນຸວົງ ເມືອງ​ລ້ອງ​ຊານ ​ແລະ ເມືອງ​ລ່ອງ​ແຈ້ງ ຊຶ່ງ​ໃນ​ນີ້​ກໍ​ມີ​ຢູ່ 3 ​ເມືອງ ທີ່​ສ້າງ​ຕັ້ງ​ຂຶ້ນ​ໃໝ່ ກໍ​ຄື​ ເມືອງ​ລ້ອງ​ຊານ ທີ່ແຍກ​ອອກ​ຈາກ ​ເມືອງ​ຮົ່ມ ກັບ ເມືອງ​ລ່ອງ​ແຈງ ​ແລະ ​ເມືອງ​ອະນຸວົງ ທີ່​ສ້າງ​ຕັ້ງ​ຂຶ້ນມາ ​ແທນ ເມືອງ​ໄຊສົມບູນ​ນັ້ນ​ເອງ.

ຄົ້ນຫາປະຫວັດສາດເມືອງລ້ອງແຈ້ງ ແຍງຊົມທຳມະຊາດສັນພູໝອກ ຊອກຫາວິລະກໍາຖໍ້າເຈົ້າອານຸວົງ ລົງລ່ອງເຮືອຊົມທີວທັດທີ່ທ່າໂທມ ກິນເຂົ້າປ່າສາມັກຄີຕາດຜາແຊບລ້ອງຊານ ຊົມຕໍານານນໍ້າຕົກຕາດຜາແຈແລເມືອງຮົ່ມ ຄໍາຂວັນຂອງແຂວງໄຊສົມບູນ

ສໍາລັບສະຖານທີ່ທ່ອງທ່ຽວ ທັງທາງທໍາມະຊາດ ແລະ ປະຫວັດປະກອບມີຫຼາຍໆບ່ອນເຊັ່ນ: ພູເບ້ຍ, ຖໍ້າເຈົ້າອະນຸວົງ, ອ່າງນໍ້າງື່ມ 2, ຕາດຫ້ວຍນົກ, ສັນພູໝອກ, ເຮືອນເກົ່າວາງປາວ, ເຮືອນພັກຜ່ອນຂອງອາດີດເຈົ້າຊີວິດ, ສິມລ້ອງແຈ້ງ, ນໍ້າຕົກຕາດຜາແຈແລ, ດານຜາແຊບ ແລະ ຍັງມີອີກຫຼາຍໆສະຖານທີ ສໍາລັບອາຫານທ້ອງຖິ່ນຂອງແຂວງ ໄຊສົມບູນແມ່ນ ຕົ້ມໄກ່ໃສຢາມົ້ງ.

ສັນພູໝອກ ເປັນແຫຼ່ງທ່ອງທ່ຽວທາງທໍາມະຊາດ ເໝາະແກ່ການທ່ຽວຊົມ ແລະ ພັກຜ່ອນຕາກອາກາດສູບດົມເອົາອາກາດບໍລິສຸດເຢັນສົດຊື່ນ ໃນຍາມເຊົ້າຈະມີໝອກປົກຫຸ້ມບໍລິເວນພູໜ່ວຍນີ້ເບິ່ງແລ້ວຄ້າຍຄືກັບທະເລໝອກຫຼືສະຫວັນເທິງພື້ນດິນກໍວ່າໄດ້ ເປັນມົນສະເໝ່ອັນໜຶ່ງທີ່ດຶງດູດໃຫ້ຜູ້ຄົນທີ່ໄດ້ໄປເມືອງລ້ອງແຈ້ງແລ້ວຕ້ອງໄດ້ໄປສໍາຜັດກັບບັນຍາກາດເທິງສັນພູໝອກ ເຊິ່ງຕັ້ງຢູ່ໃກ້ໆກັບເທດສະບານເມືອງລອງແຈ້ງ.

ນໍ້າຕົກຕາດຜາແຈແລ ເປັນນໍ້າຕົກຕາດສູງປະມານ 100 ແມັດ ຕັ້ງຢູ່ບ້ານນໍ້າຄຽນ ຫ່າງຈາກເທດສະບານເມືອງຮົ່ມປະມານ 6 ກິໂລແມັດ ເປັນນໍ້າຕົກຕາດຈາກສາຍພູສູ່ຜາຊັນ ແລະ ມີນໍ້າໄຫຼຕະຫຼອດປີມີຄວາມອຸດົມສົມບູນໄປດ້ວຍຊີວະນານາພັນໆ ປ່າໄມ້ຂຽວງາມອາກາດກໍສົດຊື່ນເຢັນສະບາຍ ສ່ວນສາເຫດທີ່ມາຂອງຊື່ຜາແຈແລນັ້ນຕາມການບອກເລົ່າຂອງຊາວບ້ານໄດ້ໃຫ້ຮູ້ວ່າມີປະຊາຊົນໄດ້ພົບພະອົງໜຶ່ງທີ່ຢູ່ໃກ້ຕາດແຫ່ງນີ້ເປັນສີດໍາ ແລະ ມີຫຼາຍແຈ ຕໍ່ມາປະຊາຊົນເຂດນັ້ນຈຶ່ງໄດ້ເອີ້ນຜາແຫ່ງນີ້ວ່າ ຜາແຈແລ.

ສິມລ້ອງແຈ້ງ ສ້າງຂຶ້ນໃນປີ ຄ.ສ 1966 ສິມຫຼັງນີ້ເປັນສິມຫຼັງທໍາອິດ ແລະ ສິມດຽວທີ່ມີຢູ່ໃນເຂດລ້ອງແຈ້ງເຊິ່ງຢູ່ພາຍໃນສິມມີພຣະພຸດທະຮູບປະດິດສະຖານຫຼາຍອົງ ທັງອົງໃຫຍ່ອົງນ້ອຍເພື່ອໃຫ້ເປັນບ່ອນທໍາບຸນ ແລະ ສັກກາລະກາບໄຫວ້ບູຊາຂອງພຸດທະສາສະນິກະຊົນເຊິ່ງປັດຈຸບັນມີແຕ່ສິມແຕ່ບໍ່ມີພຣະສົງສາມມະເນນຈໍາພັນສາຢູ່.

ແນວໃດກໍ່ດີ, ແຂວງໄຊສົມບູນ ເປັນແຂວງໜຶ່ງທີ່ຕັ້ງຢູ່ພູສູງເນື້ອທີ່ສ່ວນໃຫຍ່ເປັນພູເຂົາ ເຊີ່ງປະຈຸບັນເມືອງນີ້ຍັງບໍ່ທັນເປັນທີ່ຮູ້ຈັກຂອງນັກທ່ອງທ່ຽວປານໃດ ແລະ ກຳລັງຢູ່ໃນການພັດທະນາພື້ນຖານໂຄງຮ່າງຫຼາຍໆດ້ານ

ຂໍຂອບໃຈຂໍ້ມູນຈາກ ແລະ ຮູບພາບຈາກ: Santi Backpackerlao

LEAVE A REPLY

Please enter your comment!
Please enter your name here