ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ໃນວັນທີ 17 ມັງກອນ 2020 ທີ່ນະຄອນຫຼວງວຽງຈັນ, ລັດຖະບານ ແຫ່ງ ສປປ ລາວ ຕາງໜ້າໂດຍ ກະຊວງການເງິນ, ໄດ້ລົງນາມເຊັນສັນຍາເງິນກູ້ຢືມເງິນຈາກອົງການຮ່ວມມືພັດທະນາເສດຖະກິດກັບປະເທດເພື່ອນບ້ານ (NEDA) ແຫ່ງລາຊະອານາຈັກໄທ, ສຳລັບໂຄງການກໍ່ສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ V (ແຂວງບໍລິຄໍາໄຊ-ບຶງການ)ໃນມູນຄ່າ 1,38 ຕື້ກວ່າບາດ.

ຕາງໜ້າລັດຖະບານແຫ່ງສປປ ລາວໂດຍແມ່ນທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນກັບທ່ານ ພິຣະເມດ ວຸດທິທອນເນຕິຣັກ ປະທານອົງການຮ່ວມມືພັດທະນາເສດຖະກິດກັບປະເທດເພື່ອນບ້ານ (NEDA) ແຫ່ງລາຊະອານາຈັກໄທ, ມີຄະນະນໍາຈາກກະຊວງໂຍທາທິການ ແລະ ຂົນສົ່ງ, ເອກອັກຄະລາຊະທູດໄທ ປະຈຳ ສປປລາວ, ຫົວໜ້າກົມ, ຮອງກົມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂຄງການກໍ່ສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ V (ແຂວງບໍລິຄໍາໄຊ-ບຶງການ) ແມ່ນແຜນຍຸດທະສາດລະດັບຊາດ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020) ຂອງ ສປປ ລາວ ພາຍໃຕ້ເປົ້າໝາຍເປີດກວ້າງການຮ່ວມມື ແລະ ເຊື່ອມຈອດກັັບພາກພື້ນ ແລະ ສາກົນ, ເນື່ອງຈາກຂົວຂ້າມນໍ້າຂອງມິດຕະພາບລາວ-ໄທ ແມ່ນຕັ້ງຢູ່ຈຸດທີ່ຕັ້ງຍຸດທະສາດທີ່ເຊື່ອມຈອດຕາມແລວທາງເສດຖະກິດຕາເວັນອອກ-ຕາເວັນຕົກທີ່ຜ່ານສປປ ລາວ ຕາມແລວປາກເຊ, ຜ່ານທາງຫຼວງແຫ່ງຊາດເລກທີ 8, ເຂົ້າສູ່ຫວຽດນາມໂດຍຜ່ານດ່ານນໍ້າພາວ-ເກົາແຈວ.

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ນອກຈາກນັ້ນ, ໃນໄລຍະຜ່ານມາລັດຖະບານ ແລະ ປະຊາຊົນໄທໄດ້ໃຫ້ການສະໜັບສະໜູນທຶນຮອນໃຫ້ແກ່ການພັດທະນາບັນດາໂຄງການກໍ່ສ້າງໂຄງລ່າງພື້ນຖານເຊື່ອມຈອດທີ່ສຳຄັນຕ່າງໆຢູ່ສປປ ລາວໂດຍສະເພາະການສ້າງເສັ້ນທາງ ແລະ ຂົວຂ້າມແມ່ນໍ້າຂອງຕາມແລວເສດຖະກິດ. ທັງນີ້, ກໍ່ເພື່ອເປັນການຊ່ວຍສ້າງເງື່ອນໄຂສຳຄັນໃນການເພິ່ມທະວີການອຳນວຍຄວາມສະດວກດ້ານຄົມມະນາຄົມ-ຂົນສົ່ງ, ຊຸກຍູ້ດ້ານການຄ້າ, ການລົງທຶນ ແລະ ການ ທ່ອງທ່ຽວຂອງສອງປະເທດໃຫ້ແໜ້ນແຟ້ນຍິງຂຶ້ນ.

ປັດຈຸບັນໂຄງການສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ V ໄດ້ມີການລົງນາມຮ່ວມມືກໍ່ສ້າງເປັນທີ່ຮຽບຮ້ອຍແລ້ວເມື່ອເດືອນມິຖຸນາ 2019 ຜ່ານມາ, ຊຶ່ງແຂວງບໍລິຄຳໄຊກຳລັງເລັ່ງຊຸກຍູ້ສົ່ງເສີມບັນດາໂຄງການລົງທຶນ ແລະ ນັກລົງທຶນທັງພາຍໃນ ແລະ ຕ່າງປະເທດສ້າງສິ່ງອຳນວຍຄວາມສະດວກຕ່າງໆລວມເຖິງການບໍລິການທີ່ຈະນຳມາເຊິ່ງຜົນປະໂຫຍດແກ່ປະເທດເຮົາກໍ່ຄືແຂວງບໍລິຄຳໄຊເອງ.

ອີງຕາມການລາຍງານຂອງທ່ານ ເລື່ອນວິໄລ ຈັນທະລາພັນ ຫົວໜ້າພະແນກແຜນການ ແລະ ການລົງທຶນແຂວງ ບໍລິຄໍາໄຊ ໃນຫວ່າງບໍດົນນີ້ໃຫ້ຮູ້ວ່າ: ແຂວງບໍລິຄໍາໄຊໄດ້ຈັດສັນລະບົບການລົງທຶນໃນເຂດສົ້ນຂົວຈຸດທີ່ຕັ້ງຂົວຂ້າມນໍ້າຂອງມິດຕະພາບລາວ-ໄທແຫ່ງທີ V ໄວ້ແລ້ວຈໍານວນໜຶ່ງເປັນຕົ້ນ: ລະບົບຄົມມະນາຄົມ, ເຂດອຸດສາຫະກໍາທີ່ເປັນມິດຕໍ່ສິ່ງແວດລ້ອມ ແລະ ເຂດການຄ້າການບໍລິການ.

ປັດດຈຸບັນມີ 2 ບໍລິສັດແຈ້ງຈຸດປະສົງເພື່ອສຶກສາຄວາມເປັນໄປໄດ້ໃນການພັດທະນາສາງຄ່ຽນຖ່າຍສິນຄ້າ ແລະ ສ້າງເປັນເຂດເສດຖະກິດພິເສດ, ສຶກສາຄວາມເປັນໄປໄດ້ໃນການພັດທະນາດ້ານການທ່ອງທ່ຽວພາຍໃນແຂວງ ແລະ ການປູກ-ການລ້ຽງ.ຢ່າງໃດກໍ່ຕາມອົງການປົກຄອງແຂວງໄດ້ຕົກລົງທຸກການລົງທຶນທີ່ຈະເຂົ້າມາລົງທຶນພາຍໃນແຂວງຫຼັງຈາກມີຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ V ຕ້ອງຕິດພັນກັບຜົນປະໂຫຍດຂອງປະຊາຊົນສ່ວນຫຼາຍ ໂດຍສຸມໃສ່ການລົງທຶນໃນຂະແໜງກະສິກໍາເປັນບຸລິມະສິດໃນຮູບແບບ 1+2+3 ( 1ລັດຕ້ອງຄຸ້ມຄອງຊ່ວຍນັກລົງທຶນ ແລະປະຊາຊົນ, 2 ປະຊາຊົນເປັນດິນ ແລະ ແຮງງານ, 3 ບໍລິສັດຕ້ອງເປັນທຶນ, ເຕັກນິກວິຊາການ+ແນວພັນ ແລະ ເປັນຫຼາດເພື່ອຈໍາໜ່າຍສິນຄ້າ).

ສົ່ງເສີມການລົງທຶນໃນໂຄງການປຸງແຕ່ງ ຫຼື ແປຮູບຜົນຜະລິດກະສິກໍາເຊັ່ນ: ໂຮງງານປຸງແຕ່ງຜົນຜະລິດກະສິກໍາພືດລົ້ມລຸກປະເພດຕ່າງໆ ເພື່ອສ້າງຕະຫຼາດທີ່ໝັ້ນຄົງໃຫ້ປະຊາຊົນ, ສົ່ງເສີມການລົງທຶນ ການ ທ່ອງທ່ຽວ ແລະການລົງທຶນເຂົ້າໃນການພັດທະນາພື້ນຖານໂຄງລ່າງທີ່ຕິດພັນກັບການບໍລິການທາງຜ່ານເຊັ່ນ: ລະບົບສາງ ແລະ ການບໍລິການຂົນສົ່ງທີ່ຕິດພັນກັບການນໍາເຂົ້າສິນຄ້າ ແລະ ການບໍລິການ, ການສົ່ງອອກ ແລະ ການນໍາເຂົ້າສິນຄ້າຜ່ານ, ເຮືອນພັກ, ໂຮງແຮມ ແລະ ການບໍລິການຈຸດພັກຂອງການຂົນສົ່ງ.

ໂຄງການກໍ່ສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ V ຈະສ້າງເຊື່ອມຕໍ່ກັນລະຫວ່າງເຂດບ້ານກ້ວຍອຸດົມຫາບ້ານຫາງຊີງສະຫວ່າງ ເມືອງປາກຊັນ ແຂວງບໍລິຄຳໄຊ ແລະ ເຂດບ້ານຫ້ວຍເຊືອມ ອຳເພີບຶງການ ປະເທດໄທ ໂມີຄວາມຍາວ 1.300 ກວ່າແມັດ, ມີມູນຄ່າໃນການກໍ່ສ້າງທັງໝົດ 3.900 ລ້ານບາດ (ສະກຸນເງິນໄທ) ຄາດໃຊ້ເວລາການກໍ່ສ້າງ 3 ປີໃຫ້ສຳເລັດ.

ທີ່ມາ: ກະຊວງການເງິນ

LEAVE A REPLY

Please enter your comment!
Please enter your name here