ການກະກຽມ ແລະ ຕົບແຕ່ງງານບຸນກອງເຂົ້າ ປະຈຳປີຂອງບ້ານໂພນທອນ ເມືອງເຟືອງ​ ແຂວງວຽງຈັນ ທີ່ຈະຈັດຂື້ນໃນລະຫວ່າງວັນທີ 17 ຫາ 19 ມັງກອນ 2020

“ບຸນກອງເຂົ້າ”ຫຼື ບາງທ້ອງຖິ່ນເອີ້ນວ່າ:“ຄູນເຂົ້າ”  ເຊິ່ງປະຊາຊົນລາວບັນດາເຜົ່າໄດ້ສືບທອດກັນມາແຕ່ສະໄໝບູຮານ. ປະເພນີ້ມີຂຶ້ນຫຼັງຈາກຊາວໄຮ່ນາເກັບກ່ຽວເຂົ້າໄຮ່,ເຂົ້ານາແລ້ວ ບຸນໃນເດືອນນີ້ມີຄວາມໝາຍຄື (ຄູນ) ແປວ່າ: ເຮັດໃຫ້ມີຫຼາຍຂຶ້ນ ທັງນີ້ກໍເພື່ອເຮັດໃຫ້ການເກັບກ່ຽວເຂົ້າ ໃນປີຕໍ່ໄປ ໄດ້ໝາກຜົນ ຫຼາຍຂຶ້ນນັ້ນເອງ.

ກ່ອນຮອດລະດູກ່ຽວເຂົ້າຊາວໄຮ່ນາພາກັນເຮັດລານເຂົ້າໄວ້ລ່ວງໜ້າ ແປງດິນຂອງລານເຂົ້າໃຫ້ ຮາບພຽງບາງຄົນກໍເອົາຂີ້ຕົມທາໃຫ້ກຽ້ງ ແລ້ວຕາກເເດດຈົນພື້ນທີ່ຂອງລານເຂົ້ານັ້ນແຫ້ງ ຫຼັງຈາກກ່ຽວ ເຂົ້າຕາກໄວ້ກັບຕໍເຟືອງ ປະມານສີ່-ຫ້າມື້ ເຫັນວ່າເຂົ້າແຫ້ງດີແລ້ວ ກໍເອົາເຂົ້າມາໄວ້ລານເຂົ້າ ເພື່ອຟາດ ເອົາເຂົ້າເປືອກ ກອງໃສ່ໃນລານ ກ່ອນທີ່ຈະຂົນເອົາເຂົ້າເປືອກມາໃສ່ເລົ້າໃສ່ສາງ ກໍຈັດງານບຸນຄູນເຂົ້າ ຕາມປະເພນີ.

ການເຮັດບຸນຄູນເຂົ້ານີ້ກໍແມ່ນພິທີລ້ຽງຜີໄຮ່-ນາ ທີ່ຖືວ່າເປັນເທວະດາ ຮັກສາໄຮ່ນາ ຮົ້ວສວນໃຫ້ ເຮົານັ້ນເອງ. ພິທີລ້ຽງຢ່າງນ້ອຍກໍມີການຂ້າໄກ່, ເຫຼົ້າຢາ, ປາແປ້ງ, ເຂົ້າດໍາ, ເຂົ້າແດງ, ເຄື່ອງຄາວຂອງຫວານ, ສານຕາແຫຼວ, ປັກໃສ່ສີ່ແຈ, ລານເຂົ້າເຮັດກະທົງ 9 ຫ້ອງສໍາລັບໃສ່ອາຫານລ້ຽງເທວະດາ  ຫຼື ຜີໄຮ່-ນາ ມີດອກໄມ້ທູບທຽນບູຊາ, ກວານຈໍ້າຈະເປັນຜູ້ເຮັດໜ້າທີ່ອັນເຊີນເທວະດາທີ່ຮັກສາໄຮ່-ນາ ຮົ້ວ ສວນນັ້ນມາກິນຈາກກະທົງ. ຊາວໄຮ່ນາບາງຄອບຄົວ ກໍທໍາພິທີບຸນຄູນເຂົ້າ ຢູ່ເຮືອນ ນິມົນພຣະສົງມາສັນເຂົ້າ ແລະ ສູດປະຣິຕະມຸງຄຸນ ເພື່ອຮັບເອົາຂັວນເຂົ້າມາສູ່ເລົ້າສູ່ສາງ ເພື່ອໃຫ້ເຂົ້າໄຮ່ເຂົ້ານາໃນລະດູເກັບກ່ຽວ ຕໍ່ໆໄປ ມີໝາກຜົນທະວີຍິ່ງໆຂຶ້ນ.

ນອກຈາກ ບຸນຄູນເຂົ້າ ຫຼື ບຸນກອງເຂົ້າ ນີ້ແລ້ວ ສະໄໝກ່ອນຊາວບ້ານຈະພາກັນໄປຊອກຫຼົວ (ຟືນ) ກາງປ່າມາໄວ້ດັງເພາະເປັນຍາມໜາວອາກາດແຫ້ງ.

“ຮີດໜຶ່ງນັ້ນ ພໍເມື່ອເດືອນຍີ່ຍ້າຍ ເຂົ້າເຂດລະດູໜາວ ເຫມັນຕ໌ ວາໂຍພັດ ເຍືອກເຢັນກາຍເນື້ອ ລາວມີບຸນຄູນເຂົ້າ ຫຼັງລະດູການເກັບກ່ຽວ ຟາດເຂົ້າເປືອກ ກອງໃສ່ໄວ້ ລານກ້ວາງໄຮ່ນາ ມີການບູຊາເຈົ້າ ອາຣັກຂານາໄຮ່ ປັກຕາແຫຼວສີ່ດ້ານ ລານເຂົ້າຮາບພຽງ ກວານຈ້ຳອັງເຊີນເຈົ້າ ເທວະດາເຈົ້າຖິ່ນ ຜີໄຮ່ນາພ່ຳພ້ອມ ເຊີນເຈົ້າພ່ຳສະເຫວີຍ ມີຂອງຫວານຄາວພ້ອມ ທັງສຸຣາແກ້ວໃຫຍ່ ຂ້າໄກ່ຄົບເຄື່ອງຫ້າງ ວາງໄວ້ຂອບນາ ຂົນເຂົ້ານາມາໄວ້ ໃນເຮືອນລົ້ນໄຖ່ ຂົນເຂົ້າໄຮ່ມາໃສ່ເລົ້າ ຄູນເຂົ້າໃສ່ສາງ ມວນບ່າວສາວໜຸ່ມນ້ອຍ ອອກປ່າພະນາເຂົາ ຊອກຫາຫຼົວຫາຟືນ ຊູເຮືອນກຽມໄວ້ ບໍ່ໄດ້ໄລລາປີ້ນ ປະເພນີລາວແຕ່ເກົ່າ” ຄຳກອນບູຮານກ່ຽວກັບບຸນຄູນເຂົ້າຕອນໜຶ່ງກ່າວໄວ້

LEAVE A REPLY

Please enter your comment!
Please enter your name here