ພິທີມອບ-ຮັບໂຄງການກໍ່ສ້າງເສັ້ນທາງບ້ານແດນສະຫວັນ ເມືອງເຊໂປນ ຈັດຂຶ້ນທີ່ເຂດໂຄງການກໍ່ສ້າງເສັ້ນທາງດັ່ງກ່າວ, ເຂົ້າຮ່ວມເປັນປະທານມີທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ທັງເປັນປະທານຊີ້ນຳໂຄງການຂັ້ນແຂວງ, ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ.
ທ່ານ ພົມມາ ວົງພະຈິດ ຫົວໜ້າໂຄງການພັດທະນາຕົວ ເມືອງຕາມແລວທາງເສດຖະ ກິດຕາເວັນອອກ-ຕາເວັນຕົກ ອະນຸພາກພື້ນແມ່ນ້ຳຂອງ ຫຼື ໂຄງການ GMS ລາຍງານວ່າ:
ໂຄງການດັ່ງກ່າວ ແມ່ນເງິນກູ້ຢືມ ແລະ ຊ່ວຍເຫຼືອຈາກທະນາ ຄານພັດທະນາອາຊີ (ADB) ພ້ອມທັງທຶນສົມທົບຂອງລັດ ຖະບານລາວ ລວມມູນຄ່າທັງ ໝົດ 47.740.000 ໂດລາ, ລວມມີ 7 ໜ້າວຽກໃນ 3 ເມືອງ ຂອງແຂວງສະຫວັນນະເຂດຄື: ນະຄອນ ໄກສອນພົມ ວິຫານມີ 5 ໂຄງການຍ່ອຍຄື:
ວຽກກໍ່ສ້າງຮ່ອງລະບາຍນ້ຳເປື້ອນ ແລະ ຕິດຕັ້ງໂປມສູບສົ່ງນ້ຳຫ້ວຍລົງກົງ, ກໍ່ສ້າງປັບປຸງຍົກລະດັບຖະໜົນໄກສອນ ພົມວິຫານ, ກໍ່ສ້າງປັບປຸງຍົກລະດັບຖະໜົນຟ້າງຸ່ມ, ປັບປຸງສະໜາມຂີ້ເຫຍື້ອທີ່ຖືກຫຼັກສຸຂະອະນາໄມ, ກໍ່ສ້າງສິ່ງອຳນວຍຄວາມສະດວກສຳລັບການແຍກຂີ້ເຫຍື້ອ ແລະ ໂຮງງານຝຸ່ນບົ່ມ-ຈັດຊື້ອຸປະກອນພາຫະນະໃຫ້ແກ່ສະໜາມຂີ້ເຫຍື້ອ, ການກໍ່ສ້າງຄັນຄູກັນເຈື່ອນແມ່ນ້ຳຂອງຍາວ 980 ແມັດ, ກວ້າງ 40 ຫາ 50 ແມັດ.
ເມືອງພີນ ມີ 1 ໂຄງການຄື:
ກໍ່ສ້າງຍົກລະ ດັບທາງປູຢາງ 2 ຊັ້ນ, ໃນເທດ ສະບານ ພ້ອມກັບຮ່ອງລະບາຍນ້ຳ, ທາງຍ່າງ ແລະ ໄຟເຍືອງທາງ, ຄວາມຍາວ 9 ກິໂລແມັດ ແລະ ກໍ່ສ້າງເສັ້ນທາງປູຢາງສອງຊັ້ນ, ຮ່ອງລະບາຍນ້ຳ, ທາງຍ່າງ ແລະ ໄຟເຍືອງທາງ ບ້ານແດນສະຫວັນ ເມືອງເຊໂປນ.
ຄວາມຄືບໜ້າທັງ 7 ໂຄງການ ໄດ້ 80%.
ສຳລັບໂຄງການກໍ່ສ້າງເສັ້ນທາງບ້ານແດນສະຫວັນ ໄດ້ເລີ່ມຕົ້ນສຶກສາຄວາມເປັນໄປໄດ້ແຕ່ປີ 2012 ຈາກນັ້ນກໍມີການອອກແບບຄິດໄລ່ລະອຽດ ແລະ ມີການປະມູນ ໂດຍແມ່ນບໍລິສັດ ໜູຄຳ ກໍ່ສ້າງຂົວ-ທາງຈຳກັດ ເປັນຜູ້ຮັບເໝົາ ໃນມູນ ຄ່າ 2.312.000 ກ່ວາໂດລາ ແລະ ເລີ່ມກໍ່ສ້າງມາແຕ່ວັນທີ 27 ພະຈິກ 2017 ຫາວັນທີ 27 ພະຈິກ 2019 ກໍໄດ້ສຳເລັດການກໍ່ສ້າງ ຊຶ່ງໃຊ້ເວລາກໍ່ສ້າງທັງໝົດ 24 ເດືອນ.
ນອກນີ້, ທາງໂຄງການຍັງໄດ້ກໍ່ສ້າງເສັ້ນທາງເຂົ້າບ້ານອາໂລນຕື່ມອີກ 1 ເສັ້ນ ຍາວ 637 ແມັດ, ມູນຄ່າ 284 ພັນກ່ວາໂດລາ. ທ່ານ ໜູຜາດ ທິລາວົງ ຜູ້ອຳນວຍການ ບໍລິສັດໜູຄຳ ກໍ່ສ້າງຂົວທາງ ຈຳກັດ ກໍໄດ້ລາຍງານວ່າ:
ໂຄງການກໍ່ສ້າງເສັ້ນທາງບ້ານແດນສະຫວັນ ລວມມີການກໍ່ສ້າງ 14 ຕອນທາງ ມີລວງຍາວທັງໝົດ 3.884 ແມັດ, ຄວາມກວ້າງໜ້າທາງ 5-7 ແມັດ, ປູຢາງ 2 ຊັ້ນ ສາມາດຮັບນ້ຳໜັກໄດ້ 9,1 ໂຕນຕໍ່ເພົາ ແລະ ຄວາມໄວອອກແບບ 40 ກິໂລແມັດຕໍ່ຊົ່ວໂມງ.
ສ້າງຮ່ອງລະບາຍນ້ຳ 2 ຂ້າງທາງແບບຮ່ອງປິດ ແລະ ເປີດ, ເຮັດດ້ວຍເບຕົງເສີມເຫຼັກ, ຕິດຕັ້ງລະບົບຄວາມປອດໄພ, ປ້າຍຈະລາຈອນ, ແຕ້ມຂອບທາງ, ແບ່ງຊ່ອງຈະລາຈອນຄົບຊຸດ, ຕິດຕັ້ງໄຟເຍືອງທາງລະບົບແສງຕາເວັນ 127 ຊຸດ ແລະ ປູກຕົ້ນໄມ້ປະດັບສອງຂ້າງທາງທັງໝົດ 486 ຕົ້ນ.
ມາຮອດປັດຈຸບັນ ການກໍ່ສ້າງຖືວ່າສຳເລັດຕາມແຜນການ ແລະ ທາງບໍລິສັດ ກໍໄດ້ມອບໂຄງການດັ່ງກ່າວ ໃຫ້ແກ່ພາກລັດ ເພື່ອປົກປັກຮັກສາ ແລະ ນຳໃຊ້ຕໍ່ໄປ.
ແຫຼ່ງຂໍ້ມູນ: Medialaos
