ມີ​ສອງ​ເສັ້ນທາງ​ໄປ​ຫາ​ສະຖານ ທີ່​ທ່ອງ​ທ່ຽວ​ນີ້​ຄື​​ໜ່ຶງ​ຈາກ​ແຂວງ​ເຊ​ກອງ​ມຸ່ງ​ໜ້າ​ສູ່​ບ້ານ​ຫລັກ 52 ເມືອງ​ໄຊ​ເສດ​ຖາ ແຂວງ​ອັດ​ຕະ​​ປື​ ແລ້ວ​ລ້ຽວ​ຂວາ​ໄປ​ກວ່າ 50 ກິໂລແມັດ ແລະ ອີກ​ເສັ້ນທາງ​ໜຶ່ງຈາກ​ນະ ຄອນປາກ​ເຊ​ ສູ່​ເມືອງ​ປາກ​ຊ່ອງ ເຊິ່ງ​ຈະ​ມີ 3 ເສັ້ນ​ຄື​ເສັ້ນທາງ​ຊ້າຍ​ໄປ​ແຂວງ​ເຊ​ກອງ.

ສ່ວນ​ເສັ້ນທາງ​ຂວາ​ກະ​ບໍ່​ຮູ້​ວ່າ​ໄປ​ເຖິງ​ເຂດ​ໃດ ແລະ ເສັ້ນ​ກາງ​ມຸ່ງ​ໜ້າ​ໄປ​ສູ່​ຫ້ວຍ​ກອງ​ອອກ​ສູ່​ບ້ານ​ຫລັກ 52 ແຂວງ​ອັດ​ຕະ​​ປື​ ໂດຍ​ຈາກ​ປາກ​ຊ່ອງ ​ກວ່າ 30 ກິໂລແມັດ ກໍ​ໄປ​ເຖິງ​ບ້ານ​ໜອງ​ອີ​ໂອຍ ​ແລ້ວ​ລ້ຽວ​ຂວາ​ໄປ​ສູ່​ບ້ານ​ອຸປະຊາ ເຊິ່ງ​ເປັນ​ທີ່​​ຕັ້ງ​ຂອງ​ສະຖານ ທີ່​ທ່ອງ​ທ່ຽວ ຕາດ​ຄູ່.

ຕາດ​ນີ້​ຄົ້ນ​ພົບ​ເຫັນ​ດົນ​ແລ້ວ, ແຕ່​ຫາ​ກໍ​ປັບປຸງ ຈັດ​ສັນ​ໃຫ້​ເປັນ​ແຫລ່ງ​ທ່ອງ​ທ່ຽວ​ເມື່ອ​ສອງ​ສາມ​ປີ​ຫລັງ​ຜ່ານ​ມາ ເຊິ່ງ​ມື້​ນັ້ນ​ພົບ​ຄວາມ​ລຳບາກ​ບໍ່​ໜ້ອຍ​ຍ້ອນ​ຟ້າ​ຝົນ-ຕົກ​ລັດ​ທາງ ທາງກໍ​ເປັນ​ທາງ​ດິນ​ແດງ​ແດ່​ຈຶ່ງ​ບໍ່​ແປກ ​ທີ່​ຫລາຍ​ຍ່ານ​ຂອງ​ເສັ້ນທາງ​ນີ້​ມີ​ຂຸມ​ນ້ອຍ​ຂຸມ​ໃຫຍ່​ພໍ​ໃຫ້​ໄດ້​ຫວນ​ຄືນ​ເຖິງ​ອະດີດ​ທີ່​ເຄີຍ​ກິນ​ເຂົ້າ​ລີງ​ຕອນ​ລົດ​ຄາ.

ຕາດ​ຄູ່ ບ້ານ​ອຸປະຊາ ເມືອງປາກຊ່ອງ ແຂວງ​​ຈໍາ​ປາ​ສັກ ເຊິ່ງ​ນອກ ຈາກ​ເປັນ​​ນໍ້າ​ໂຕນ​ຕາດ ​ທີ່​ເກີດ​ຈາກ​ທຳ​ມະ​ຊາດ ບໍ່​ສູງ​ພໍ​ເທົ່າໃດ​ກໍ​ດີ, ​ຜູ້​ສຳ​ປະທານ ໄດ້​ຕົກແຕ່ງ​ຫລາຍ​ສິ່ງ​ຫລາຍ​ຢ່າງ​ ເພື່ອ​ອຳນວຍ​ຄວາມ​ສະດວກ​ໃຫ້​ແກ່​ນັກ​ທ່ອງ​ທ່ຽວ​ທີ່​ມາ​ຮອດ​ຈອດ​ເຖິງ​ບໍ່​ວ່າ​ຈະ​ເປັນ​ການ​ປຸກ​ຕູບ​ຖາວອນ ແລະ ຕູບ​ຊາມຊາ​​ຕັ້ງ​ຢູ່​ແຄມ​ໜອງ ແລະ ກາງ​​ນໍ້າ​ໂຕນ ອ່າງ​ລອຍ​​ນໍ້າ​ສຳລັບ​ເດັກນ້ອຍ ຫ້ອງນໍ້າ ​ທີ່​ສະອາດ ບ່ອນ​ຖ່າຍຮູບ ແລະ ອື່ນໆ ເຊິ່ງ​ຕ້ອງ​ບອກວ່າ​ງາມ​ສົມຈິງ​ ດັ່ງ​ທຳ​ມະ​ຊາດ.

ສ່ວນ​ອາຫານ​ການ​ກິນ​ກໍ​ພໍ​ຮັບ​ໄດ້​ບໍ່​​ແ​ແພງ​ເກີນ​ໄປ ຄ່າ​ນັ່ງ​ຕູບ ສາມ​ສິບພັນກີບ ຄ່າ​​ຜ່ານ​ປະຕູ​ເຂົ້າ​ແຫ​ລ່ວງ​ທ່ອງ​ທ່ຽວ ຫ້າ​ພັນ​ກີບ​ຕໍ່​ຄົນ ແລະ ​​ທີີ່​ປະທັບ​ໃຈ​ທີ່​ພາກພູມ​ໃຈ​ທັງ​ໄດ້​ບຸນ​ຕື່ມ​ອີກ​ຄື​ການ​ໄດ້​​ນໍາ​ເອົາ​ເສດ​ອາຫານ ຫລື ຂະໜົມ ເກືອ​ປາ​ນ້ອຍ​ປາ​ໃຫຍ່​ທີ່​ລອຍ​ລ່ອງ​ໄປ​ມາ​ໃນ​ໜອງ​ຢ່າງ​ຫລວງ​ຫລາຍ. ເຖິງວ່າ​ໄລຍະນີ້ເປັນ ​ຍາມ​ຝົນ​ກໍ​ດີ, ແຕ່​ການ​ໄດ້​ມາ​ສຳຜັດ ມາ​ສູບ​ດົມ​ເອົາ​ອາກາດ​ທີ່ແສນ​ບໍລິສຸດ ມາ​ເຫັນ​ວິຖີ​ຊີວິດ​ຂອງ​ປະຊາ ຊົນບັນດາເຜົ່າ​ຢູ່​ອ້ອມແອ້ມ​ສະຖານ ທີ່​ທ່ອງ​ທ່ຽວ​ແຫ່ງ​ນີ້​ນັບ​ວ່າ​ມ່ວນ ມີ​ຄວາມສຸກ​ຢ່າງ​ແທ້​ຈິງ.

ແຫຼ່ງຂໍ້ມູນ: ສຳນັກຂ່າວສານປະເທດລາວ ບົດຄວາມຖືກຮຽບຮຽງຂຶ້ນໃໝ່

LEAVE A REPLY

Please enter your comment!
Please enter your name here