ວັນທີ 11 ຕຸລາ 2019 ນີ້, ສູນກາງແນວລາວສ້າງຊາດ ຮ່ວມກັບອົງການພຸດທະສາສະໜາສຳພັນລາວ ຈັດພິທີຖະແຫຼງຂ່າວການດຳເນີນໂຄງການທຳມະຍາດຕາ 5 ແຜ່ນດິນ ແຫ່ງລຸ່ມແມ່ນ້ຳຂອງ ຄັ້ງທີ 2 ຂຶ້ນຢູ່ທີ່ຫໍທຳມະສະພາ, ໂດຍເປັນກຽດຖະແຫຼງຂອງທ່ານ ຄະນອງລິດ ສີສົມບູນ ຄະນະປະຈຳ, ຫົວໜ້າກົມສາສະໜາ ສູນກາງແນວລາວສ້າງຊາດ, ເປັນກຽດເຂົ້າຮ່ວມ ມີທ່ານ ແກ້ວຈະເລີນ ເຊ່ຍຢີ້ງຢ່າງ ຄະນະພັກ, ຄະນະປະຈຳ, ຫົວໜ້າກົມໂຄສະນາ-ອົບຮົມ ສູນກາງແນວລາວສ້າງຊາດ, ພະອາຈານໃຫຍ່ ດຳຣົງ ພົມມະຈັກ ຫົວໜ້າບໍລິຫານງານຫ້ອງການ ສູນກາງອົງການພຸດທະສາສະໜາ ແລະ ທ່ານ ສຸລະພົນ ມະນີພົງ ຮອງເລຂາທິການສະຖານບັນໂພທິຄະຍາວິດຊາໄລ 980.

ສຳລັບປີນີ້ໂຄງການທຳມະຍາດຕາ 5 ແຜ່ນດິນ ແຫ່ງລຸ່ມແມ່ນ້ຳຂອງ ແມ່ນຈັດຂຶ້ນເປັນຄັ້ງທີ 2 ເຊິ່ງຈະໄດ້ດຳເນີນກິດຈະກຳທາງພຸດທະສາສະໜາ ເປັນເວລາ 18 ວັນ ນັບແຕ່ວັນທີ 14-23 ຕຸລາ 2019, ພິທີເປີດເປັນທາງການແມ່ນຈັດຂຶ້ນທີ່ແຂວງຊຽງລາຍ ປະເທດໄທ ໂດຍມີພະສົງ, ພາກສ່ວນທີ່ກ່ຽວຂ້ອງ ແລະ ສາສະນິກະຊົນ ຂອງປະເທດລາວ, ໄທ, ຫວຽດນາມ, ກຳປູເຈຍ ແລະ ປະເທດມຽນມາ ເຂົ້າຮ່ວມ. ໂຄງການດັ່ງກ່າວ, ຄະນະຜູ້ແທນຈະເດີນທາງມາ ສປປ ລາວ,  ເດີນທາງໄປ ສສ ຫວຽດນາມ ແລະ ໄປປິດພິທີທາງການຢູ່ແຂວງຊຽມລຽບ ປະເທດກຳປູເຈຍ. ກິດຈະກຳຂອງໂຄງການ ທີ່ຈະຈັດຕັ້ງປະຕິບັດ ຢູ່ ສປປ ລາວ ແມ່ນມີພິທີໃສ່ບາດພະສົງ 5 ປະເທດ, ຈັດຕັ້ງເທດສະໜາທຳ ແລະ ການປະຕິບັດກຳມະຖານ, ທ່ຽວຊົມສະຖານທີ່ສຳຄັນທາງພຸດທະສາສະໜາ ແລະວັດທະນະທຳຂອງ 3 ແຂວງ ຄື: ແຂວງອຸດົມໄຊ, ຫຼວງພະບາງ ແລະ ນະຄອນຫຼວງວຽງຈັນ. ຊຶ່ງຢູ່ນະຄອນຫຼວງວຽງຈັນຈະມີພິທີຕ້ອນຮັບທາງການ ແລະ ພິທີໃສ່ບາດພະສົງ 5 ປະເທດ ຈຳນວນ 50 ອົງ ຮ່ວມກັບພະສົງນະຄອນຫຼວງວຽງຈັນ ຈຳນວນ 250 ອົງ ລວມທັງໝົດພະສົງ 300 ອົງ ທີ່ເດີ່ນພະທາດຫຼວງວຽງຈັນ ໃນເວລາ 6:30 ໂມງ ຂອງວັນທີ 26 ຕຸລາ 2019 ນີ້.

ການດຳເນີນໂຄງການທຳມະຍາດຕາ 5 ແຜ່ນດິນ ແຫ່ງລຸ່ມແມ່ນ້ຳຂອງ ແມ່ນເພື່ອປະກອບສ່ວນເສີມຂະຫຍາຍການພົວພັນຮ່ວມມື ຂອງ 5 ປະເທດລຸ່ມແມ່ນ້ຳຂອງ, ເປັນການເຜີຍແຜ່ຮີດຄອງປະເພນີ ວັດທະນະທຳອັນດີງາມ ແລະ ສົ່ງເສີມການທ່ອງທ່ຽວ ຂອງແຕ່ລະປະເທດ ເວົ້າລວມ, ເວົ້າສະເພາະ ເປັນການສົ່ງເສີມການທ່ອງທ່ຽວຂອງ ສປປ ລາວ.

ຂໍ້ມູນ​ໂດຍ​: ກົມໂຄສະນາ-ອົບຮົມ​ ສນຊ

LEAVE A REPLY

Please enter your comment!
Please enter your name here