ໂດຍຕອບສະໜອງຕາມການເຊື້ອເຊີນຂອງ ສະຫາຍ ຫງວຽນ ຊັວນ ຟຸກ ນາຍົກລັດຖະມົນຕີ ແຫ່ງ ສາທາ ລະນະລັດ ສັງຄົມນິຍົມ ຫວຽດນາມ ພ້ອມດ້ວຍພັນລະຍາ, ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຂອງ ສາທາລະນະລັດ ປະຊາທິປະໄຕ ປະຊາຊົນລາວ ດໍາເນີນການຢ້ຽມຢາມ ສາທາລະນະລັດ ສັງຄົມນິຍົມ ຫວຽດນາມ ຢ່າງເປັນທາງການ ແຕ່ວັນທີ 01 – 03 ຕຸລາ 2019.

ໃນໄລຍະຢ້ຽມຢາມ, ນາຍົກລັດຖະມົນຕີ ທອງລຸນ ສີສຸລິດ ໄດ້ເຂົ້າຮ່ວມພິທີຕ້ອນຮັບຢ່າງເປັນທາງການ. ພົບປະສອງຝ່າຍ ແລະ ເຂົ້າຮ່ວມງານລ້ຽງ ເຊິ່ງເປັນກຽດຈັດໂດຍ ນາຍົກລັດຖະມົນຕີ ຫງວຽນ ຊັວນ ຟຸກ. ເຂົ້າຢ້ຽມຂໍ່ານັບ ເລຂາທິການໃຫຍ່. ປະທານປະເທດ ຫງວຽນ ຝູ້ ຈ໋ອງ. ພົບປະກັບ ປະທານສະພາແຫ່ງຊາດ ຫງວຽນ ທິ ກິມ ເງິນ. ວາງພວງມະລາ ຢູ່ ສຸສານປະທານ ໂຮ່ຈີມິນ ແລະ ອານຸສອນສະຖານນັກຮົບວິລະຊົນ. ຢ້ຽມຢາມ ແລະ ເຮັດວຽກ ຢູ່ບັນດາພື້ນຖານເສດຖະກິດ ແລະ ວັດທະນະທຳ ຈຳນວນໜຶ່ງ ທີ່ ນະຄອນດານັງ.

ໃນໂອກາດຢ້ຽມຢາມຄັ້ງນີ້, ນາຍົກລັດຖະມົນຕີທັງສອງ ໄດ້ຮ່ວມລົງນາມ ແລະ ເປັນສັກຂີພິຍານໃນການລົງນາມເອກະສານຮ່ວມມືສອງຝ່າຍ ຈຳນວນ 08 ສະບັບ ຄື:

  1. ອະນຸສັນຍາວ່າດ້ວຍ ການດັດແກ້ສັນຍາ ລະຫວ່າງລັດຖະບານແຫ່ງ ສປປລາວ ແລະ ລັດຖະບານແຫ່ງ ສສຫວຽດນາມ ວ່າດ້ວຍ ໂຄງການກໍ່ສ້າງຫໍສະພາແຫ່ງຊາດລາວ
  2. ຂໍ້ຕົກລົງ ລະຫວ່າງ ກະຊວງແຜນການ ແລະ ການລົງທຶນແຫ່ງ ສປປລາວ ແລະ ກະຊວງແຜນການ ແລະ ການລົງທຶນແຫ່ງ ສສຫວຽດນາມ ວ່າດ້ວຍການສ້າງຍຸດທະສາດການຮ່ວມມື ເສດຖະກິດ, ວັດທະນະທຳ, ສຶກສາ, ວິທະຍາສາດ ເຕັກໂນໂລຊີ ລະຫວ່າງ ລາວ – ຫວຽດນາມ ໄລຍະ 2021-2030 ແລະ ສັນຍາວ່າດ້ວຍການຮ່ວມມື ໄລຍະ 5 ປີ ( 2021-2025)
  3. ບົດບັນທຶກຄວາມເຂົ້າໃຈລະຫວ່າງ ກະຊວງການເງິນແຫ່ງ ສປປລາວ ແລະ ກະຊວງການເງິນ ແຫ່ງ ສສຫວຽດນາມ ກ່ຽວກັບການສະໜອງເງິນກູ້ ໃຫ້ໂຄງການລົງທຶນກໍ່ສ້າງເສັ້ນທາງ ແຕ່ພູທິດເຜີ້ງ, ແຂວງຫຼວງພະບາງ ສປປລາວ ຫາຊາຍແດນ ນາຊອນ ໃຫ້ເມືອງດ້ຽນບຽນດົງ ແຂວງດ້ຽນບຽນ, ສສຫວຽດນາມ,
  4. ບົດບັນທຶກຄວາມເຂົ້າໃຈ ລະຫວ່າງ ທະນາຄານແຫ່ງ ສປປລາວ ແລະ ທະນາຄານແຫ່ງຊາດ ຫວຽດນາມ ວ່າດ້ວຍການຮ່ວມມືເຄື່ອນໄຫວຈຸດສຸມດ້ານທະນາຄານ ໄລຍະ 2019-2024,
  5. ແຜນການ ສ້າງແຜນຮ່ວມມື ລາວ-ຫວຽດນາມ ໃນຂົງເຂດການສຶກສາ ແລະ ພັດທະນາຊັບພະຍາກອນມະນຸດ ໄລຍະ 2021-2030 ລະຫວ່າງ ກະຊວງສຶກສາທິການ ແລະ ກິລາແຫ່ງ ສປປລາວ ແລະ ກະຊວງສຶກສາ ແລະ ກໍ່ສ້າງແຫ່ງ ສສຫວຽດນາມ,
  6. ບົດບັນທຶກຄວາມເຂົ້າໃຈ ລະຫວ່າງ ກະຊວງພະລັງງານ ແລະ ບໍ່ແຮ່ແຫ່ງ ສປປລາວ ແລະ ກະຊວງອຸດສາຫະກຳການຄ້າແຫ່ງ ສສຫວຽດນາມ ວ່າດ້ວຍການຮ່ວມມືຊຸກຍູ້ ຊື້-ຂາຍ ໄຟ ພະລັງງານລົມ,
  7. ມອບຮັບໃບຢັ້ງຢືນນຳເຂົ້າໄຟຟ້າຈາກເຂື່ອນ ນໍ້າກົງ, ນໍ້າອີມູນ ແລະ ນໍ້າອາງ ຂອງບໍລິສັດຈະເລີນເຊກອງແຫ່ງ ສປປລາວ ແລະ ບໍລິສັດຫຸ້ນສ່ວນໂຊງດາ 05 ສສຫວຽດນາມ,
  8. ບົດບັນທຶກຄວາມເຂົ້າໃຈ ລະຫວ່າງ ກະຊວງໂຍທາທິການ ແລະ ຂົນສົ່ງແຫ່ງ ສປປລາວ ແລະ ບໍລິສັດ ຫຸ້ນສ່ວນເດີນອາກາດຫວຽດແຈັດ (Viet Jet) ວ່າດ້ວຍການຮ່ວມມືພັດທະນາການບິນພົນລະເຮືອນ.

ຂໍ້ມູນ ແລະ ຮູບພາ:

LEAVE A REPLY

Please enter your comment!
Please enter your name here