ເຈົ້າໜ້າທີ່ ປກສ ກຸ່ມບ້ານແສນຈະເລີນ ເມືອງຊະນະຄາມ ແຂວງວຽງຈັນ.ໄດ້ຮັບແຈ້ງຂ່າວຈາກພົນລະເມືອງດີ ວ່າຈະມີການຊື້-ຂາຍ ແລະ ຂົນສົ່ງຢາເສບຕິດຢູ່ຂອບເຂດກຸ່ມບ້ານແສນຈະເລີນ, ຈາກນັ້ນ ເຈົ້າໜ້າທີ່ ປກສ ກຸ່ມບ້ານແສນຈະເລີນ ຈຶ່ງໄດ້ຈັດຕັ້ງກໍາລັງລົງຕິດຕາມ.

ຮອດເວລາ 5:30 ນາທີ ວັນທີ 27 ກັນຍາ 2019. ເຈົ້າໜ້າທີ່ໄດ້ພົບກັບທ້າວ ແທ່ນ ດວງມາລາ ອາຍຸ 40 ປີ ອາຊີບຊາວນາ ປະຈຸບັນຢູ່ບ້ານນາໝໍ້ ເມືອງໝື່ນ ແຂວງວຽງຈັນ ຂັບຂີ່ລົດຈັກຍີ່ຫຍໍ້ເວບ 100 ຊີໆ ສີແດງ- ດໍາ- ນໍ້າເງິນ ປ້າຍທະບຽນ: ວຽງຈັນ ຈສ 4981 ຂຶ້ນໄປຕາມເສັ້ນທາງຂອບເຂດບ້ານນາສົມບູນ ເມືອງຊະນະຄາມ ແຂວງວຽງຈັນ ຈາກນັ້ນ ເຈົ້າໜ້າທີ່ຈຶ່ງໄດ້ຂໍກວດຄົ້ນບຸກຄົນດັ່ງກ່າວ.

ຜ່ານການກວດຄົ້ນພົບເຫັນສິ່ງທີ່ຜິດກົດໝາຍຄື: ພົບເຫັນຢາເສບຕິດປະ ເພດຢາບ້າຈໍານວນ 5 ມັດ ເທົ່າກັບ 10.000 ເມັດ, ຢາໄອຊ໌ ຈໍານວນ 2 ກິໂລ ແລະ ໂທລະສັບມືຖືຈໍານວນ 01 ໜ່ວຍ, ຈາກນັ້ນ ເຈົ້າໜ້າທີ່ ປກສ ກຸ່ມບ້ານແສນຈະເລີນຈຶ່ງໄດ້ກັກຕົວທ້າວ ແທ່ນ ດວງມາລາ ພ້ອມດ້ວຍຂອງກາງ ແລະ ໄດ້ສົ່ງມອບໃຫ້ເຈົ້າໜ້າທີ່ ປກສ ເມືອງຊະນະຄາມ ເພື່ອດໍາເນີນການສອບສວນຕາມຂັ້ນຕອນຂອງກົດໝາຍ.

 ຜ່ານການສອບສວນໃນເບື້ອງຕົ້ນ ທ້າວແທ່ນ ດວງມາລາ ໃຫ້ການສາລະພາບ ວ່າຂອງກາງທັງໝົດເປັນຂອງຕົນເອງ ເຊິ່ງທ້າວແທ່ນ ດວງມາລາ ໄດ້ເດີນທາງດ້ວຍລົດຈັກອອກມາຈາກບ້ານນາໝໍ້ ເມືອງໝື່ນ ແຂວງວຽງຈັນ ໃນວັນທີ 26 ກັນຍາ 2019 ເວລາປະມານ 08 ໂມງ, ເພື່ອມາຊື້ຢາເສບຕິດຈໍານວນດັ່ງກ່າວ,  ພໍມາຮອດບ້ານນາກາງ ເມືອງຊະນະຄາມ ແຂວງວຽງຈັນ,  ທ້າວແທ່ນ ດວງມາລາ ໄດ້ໂທລະສັບຕິດຕໍ່ຫາທ້າວ ໃຈເຮີ ປະຊາຊົນບ້ານນາກາງ ໃຫ້ມາຫາຕົນເອງຢູ່ບໍລິເວນໃກ້ກັບເຮືອນພັກ ເພື່ອຕິດຕໍ່ການຊື້-ຂາຍຢາເສບຕິດ ແລ້ວຈາກນັ້ນທ້າວ ແທ່ນ ດວງມາລາ ກໍ່ໄດ້ມອບເງີນຈໍານວນ 180.000 ບາດໃຫ້ທ້າວ ໃຈເຮີ ເພື່ອຢາເສບຕິດຈໍານວນດັ່ງກ່າວ.

ມາຮອດຕອນເຊົ້າ ເວລາ 04:00 ໂມງ ຂອງວັນທີ 27 ກັນຍາ 2019 ທ້າວ ໃຈເຮີ ກໍ່ໄດ້ນໍາເອົາຢາເສບຕິດປະເພດຢາບ້າຈໍານວນ 5 ມັດ ເທົ່າກັບ 10.000 ເມັດ, ຢາໄອຊ໌ ຈໍານວນ 2 ກິໂລມາໃຫ້ທ້າວ ແທ່ນ ດວງມາລາ, ຈາກນັ້ນທັງສອງກໍ່ໄດ້ແຢກຈາກກັນ ຈົນທ້າວ ແທ່ນ ດວງມາລາ ເດີນທາງກັບໄປຕາມເສັ້້ນທາງຈຶ່ງຖືກເຈົ້າໜ້າທີ່ ປກສ ຈັບຕົວມາສອບສວນ ແລະ ດໍາເນີນຄະດີຕາມຂັ້ນຕອນຂອງກົດໝາຍ.

ປະຈຸບັນ, ເຈົ້າໜ້າທີ່ ປກສ ເມືອງຊະນະຄາມ ແຂວງວຽງຈັນ ຈະໄດ້ດໍາເນີນການສຶບສວນ-ສອບສວນຜູ່ກ່ຽວເພີ່ມຕື່ມອີກ, ເພື່ອຂະຫຍາຍຄວາມຫາກຸ່ມແກ້ງ, ເຄື່ອຂ່າຍ ແລະເປົ້າໝາຍ ເພື່ອນໍາມາລົງໂທດຕາມກົດໝາຍ.

ຂ່າວ: ເມືອງຊະນະຄາມ

LEAVE A REPLY

Please enter your comment!
Please enter your name here