ໝູສາມຊັ້ນທອດນ້ຳປາ​ ເປັນເມນູທີ່ຫລາຍໆຄົນມັກ.​ ເພາະບໍ່ວ່າຈະກິນຫຼີ້ນ ກິນຊຸມແຊວກັບໝູ່ ຫຼື​ ກິນເຂົ້າກັບຄອບຄົວ​ ກໍ່ຮູ້ສຶກ​ຟິນ​ຕະຫຼອດ​. ມື້ນີ້ແອັດມິນໄດ້ເອົາສູດ ໝູສາມຊັ້ນທອດນ້ຳປາ​ ມາໃຫ້ທຸກຄົນໄດ້ໄປລອງເຮັດກິນແບບງ່າຍໆ. ສູດນີ້ເປັນສູດທີ່ໃສ່ແປ້ງໜ້ອຍ ແຕ່ກອບດົນ ພ້ອມກັບເຄັດລັບບໍ່ໃຫ້ນໍ້າມັນເຕັ້ນໃສ່ ແລະ​ ບໍ່ໃຫ້ໝູຕິດໝໍ້

ສ່ວນປະກອບ:

  • ໝູສາມຊັ້ນ 500 ກຣັມ
  • ນໍ້າປາ 3 ບ່ວງແກງ
  • ແປ້ງຊຸບທອດ
  • ພິກໄທ (ໜ້ອຍໜື່ງ)
  • ນໍ້າເຢັນ
  • ນໍ້າມັນພືດ
  • ນໍ້າສົ້ມສາຍຊູ ½ ບ່ວງແກງ
  • ເກືອ (ໜ້ອຍໜື່ງ)

ວິທີເຮັດ

  • ຕັດສາມຊັ້ນ ເປັນຕ່ອນບໍ່ເກີນ 1 ຊມ ກ່ອນນໍາໄປໝັກກັບ ນໍ້າປາ,​ພິກໄທ​ ຫລັງຈາກນັ້ນຕື່ມແປ້ງຊຸບທອດ​ ນໍ້າເຢັນ ແລະ​ ໄຂ່ໄກ່​ລົງໄປ​ ນວດໃຫ້ເຂົ້າກັນ ແລ້ວພັກໄວ້ 15 ນາທີ

  • ໃສ່ນໍ້າມັນພືດລົງໄປໃນໝໍ້ຂາງ (ກະໃຫ້ຖ້ວມຊີ້ນ)​ ໃສ່ນໍ້າສົ້ມສາຍຊູ ແລະ​ ເກືອ​ ລົງໃນນໍ້າມັນເລັກນ້ອຍ ເພື່ອປ້ອງກັນບໍ່ໃຫ້ນໍ້າມັນເຕັ້ນ ແລະ​ ບໍ່ໃຫ້ໝູຕິດໝໍ້ໃນເວລາທອດ
  • ເປິດໄຟລະດັບກາງ ໃຫ້ໝໍ້ນໍ້າມັນຮ້ອນ ແລ້ວເອົາຊີ້ນໝູລົງໄປທອດ ຈົນເປັນສີນໍ້າຕານ ຕັກຂຶ້ນມາພັກໃຫ້ສະເດັດນໍ້າມັນ.​ ຈາກນັ້ນກຽມເສີບໄດ້ເລີຍ.​

ສູດແມ່ນສາມາດປັບໄດ້ ຕາມປະລິມານຂອງຊີ້ນສາມຊັ້ນ

LEAVE A REPLY

Please enter your comment!
Please enter your name here