ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນສູນກາງ, ຂັ້ນແຂວງ, ຂັ້ນເມືອງ ຕະຫຼອດຮອດທຸກພາກສ່ວນໃນສັງຄົມໄດ້ເອົາໃຈໃສ່ສຸມກຳລັງເຂົ້າຊ່ວຍເຫຼືອຢ່າງຮີບດ່ວນ ໃນນັ້ນສູນກາງຊາວໜຸ່ມປະຊາຊົນປະຕິວັດ ໃນຖານະເປັນກຳລັງແຮງທີ່ສຳຄັນຂອງຊາດໄດ້ຕະລຸມບອນເຂົ້າຊ່ວຍເຫຼືອປະຊາຊົນຜູ້ທີ່ປະສົບໄພນໍ້າຖ້ວມຢູ່ພື້ນທີ່ດັ່ງກ່າວຢ່າງຮີບດ່ວນ, ມາໃນລະຫວ່າງວັນທີ 7 ຫາ 11 ກັນຍາ 2019 ນີ້ ສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ສະມາຊິກສະພາແຫ່ງຊາດຊຸດທີ 8, ໄດ້ນຳພາຄະນະນຳເອົາເຫື່ອແຮງ, ນໍ້າຈິດນໍ້າໃຈ, ວັດຖະປັດໄຈຈຳນວນໜຶ່ງ, ປະກອບມີ ເຂົ້າສານຈຳນວນ 6 ໂຕນ, ເຮືອພາຍ 6 ລຳ, ນໍ້າດື່ມ, ໝີ່, ປອງປາ, ເສື້ອຊູຊີບ, ເຄື່ອງນຸ່ງຫົ່ມ ແລະ ອື່ນໆ…ຈຳນວນໜຶ່ງລວມມູນຄ່າທັງໝົດ 108.000.000 ກີບ (ໃນນີ້ມີເງິນສົດ18.000.000 ກີບ) ພ້ອມດ້ວຍກຳລັງອາສາສະໝັກຊາວໜຸ່ມຕະລຸມບອນທັງໝົດຈຳນວນ 10.554 ຄົນ

ໃນນັ້ນອາສາສະໝັກຊາວໜຸ່ມຕະລຸມບອນຂອງແຂວງຄຳມ່ວນ ຈຳນວນ 3.892 ຄົນ, ອາສາສະໝັກຊາວໜຸ່ມຕະລຸມບອນແຂວງສະຫວັນນະເຂດ ຈຳນວນ 1.050 ຄົນ, ອາສາສະໝັກຊາວໜຸ່ມຕະລຸມບອນແຂວງສາລະວັນ 2.286 ຄົນ, ອາສາສະໝັກຊາວໜຸ່ມຕະລຸມບອນແຂວງເຊກອງ ຈຳນວນ 595 ຄົນ, ອາສາສະໝັກຊາວໜຸ່ມຕະລຸມບອນແຂວງອັດຕະປື ຈຳນວນ 931 ຄົນ ແລະ ແຂວງຈຳປາສັກ ມີຈຳນວນ1.800 ຄົນ. ໃນນັ້ນຍັງມີອາສາສະໝັກຊາວໜຸ່ມຕະລຸມບອນທີ່ມາຈາກບັນດາຂົງເຂດກຳລັງປ້ອງກັນຊາດ, ປ້ອງກັນຄວາມສະຫງົບ, ບັນດາອາສາສະໝັກຊາວໜຸ່ມທີ່ຢູ່ໃນບັນດາກະຊວງ, ອົງການ, ຕະຫຼອດຮອດຊາວໜຸ່ມທີ່ຢູ່ສູນກາງຊາວໜຸ່ມ ແລະ ຢູ່ຕາມໜ່ວຍງານກອງອາສາສະໝັກທາງສັງຄົມ, ທຸກຂົງເຂດສາຂາຂະແໜງການຕ່າງໆໄດ້ສຸມກຳລັງເຂົ້າໃສ່ໃນຂະບວນດັງກ່າວດ້ວຍຄວາມບໍ່ຮູ້ອິດຮູ້ເມື່ອຍ, ເຊິ່ງຢູ່ໃນການລວບລວມເກັບກຳຂໍ້ມູນຢູ່.

ຂໍ້ມູນ ແລະ ຮູບພາບ: Lao Youth Union

LEAVE A REPLY

Please enter your comment!
Please enter your name here