ໂຄງການກໍ່ສ້າງ ອາຄານປະສູດ ແມ່-ເດັກໂຮງຫມໍນ້ອຍເຂດພູແຊ ເມືອງຮຸນ ແຂວງອຸດົມໄຊ ເຊິ່ງໄດ້ຮັບກາສະຫນັບສະຫນູນໂດຍ ອົງການແພລນສາກົນປະຈຳລາວ ໄດ້ເລີ່ມກໍ່ສ້າງມາແຕ່ເດືອນມັງກອນ ມາຮອດເດືອນກໍລະ ກົດຜ່ານມາ ການກໍ່ສ້າງແມ່ນສຳເລັດ 100% ລວມມູນຄ່າການກໍ່ສ້າງທັງໝົດ ເກືອບ 300 ລ້ານກີບ ໂດຍແມ່ນບໍລິສັດສົມປະສົງກໍ່ສ້າງເຄຫາສະຖານແລະຊົນລະປະທານແຂວງອຸດົມໄຊເປັນຜູ້ຮັບເໝົາກໍ່ສ້າງ.

ລັກສະນະຂອງອາຄານດັ່ງກ່າວ ເປັນອາຄານຊັ້ນດຽວ ມີລວງຍາວທັງໝົດ 11,6 ແມັດ ແລະ ກວ້າງ 8 ແມັດ ປະກອບມີ 4 ຫ້ອງບໍລິການຄື: ຫ້ອງກ່ອນເກີດ, ຫ້ອງເກີດ,ຫ້ອງຫລັງເກີດ ແລະ ຫ້ອງ ກວດທ້ອງແມ່ມານ, ມີຫ້ອງນ້ຳ ພ້ອມທັງ ໄດ້ຕິດຕັ້ງລະບົບໄຟຟ້າຄົບຊຸດ ແລະ ເຄື່ອງເຟີນີເຈີຕ່າງໆ.

ເພື່ອເຮັດໃຫ້ໂຄງການດັ່ງກ່າວໄດ້ເປີດນຳໃຊ້ ບໍລິການພໍ່ແມ່ປະຊາຊົນ ມາໃນວັນທີ 14 ສິງຫານີ້ ກໍໄດ້ມີພິທີມອບ-ຮັບຂື້ນຢ່າງເປັນທາງການ. 

ພິທີ ໄດ້ລົງນາມເຊັນບົດບັນທຶກມອບ-ຮັບອາຄານຫລັງດັ່ງກ່າວໂດຍຜູ້ຕາງຫນ້າຈາກອົງການແພລນສາກົນປະຈຳ ສປປລາວ ມອບໃຫ້ແກ່ ພະແນກສາທາລະນະສຸກແຂວງອຸດົມໄຊ ຈາກນັ້ນກໍໄດ້ມອບຕໍ່ໃຫ້ຫ້ອງການສາທາລະ ນະສຸກເມືອງຮຸນ ແລ້ວມອບຕໍ່ໃຫ້ແກ່ອົງການປົກຄອງບ້ານ, ປະຊາຊົນ ກໍຄືໂຮງໝໍນ້ອຍເຂດດັ່ງກ່າວເປັນຜູ້ປົກປັກຮັກສາ,ຄຸ້ມຄອງ ນຳໃຊ້ເພື່ອອຳນວຍຄວາມສະດວກເຂົ້າໃນການບໍລິການວຽກງານແມ່-ເດັກ ໂດຍສະເພາະແມ່ນ ແນໃສ່ຫລີກລ່ຽງອັດຕາການຕາຍຂອງແມ່ແລະເດັກລຸດລົງເທື່ອລະກ້າວ ແລະ ຕອບສະຫນອງການບໍລິການສຸຂະພາບຕາມຄວາມຕ້ອງການຂອງພໍ່ແມ່ປະຊາຊົນໃຫ້ນັບມຶ້ດີຂຶ້ນ.

ໂດຍມີການນຳພັກລັດ ແລະພາກສ່ວນທີ່ກ່ຽວຂ້ອງແຕ່ລະຂັ້ນ ພ້ອມດ້ວຍຄະນະພັກເຂດ,ອົງການປົກບ້ານ ແລະພໍ່ແມ່ປະຊາຊົນເຂົ້າຮ່ວມເປັນສັກຂີພິຍານ.

ອກາດດັ່ງກ່າວ ທ່ານ ສົມພອນ ຊາວມົງວື ຮອງຫົວຫນ້າພະແນກສາທາລະນະສຸກແຂວງ ແລະ ທ່ານ ຄຳຟອງ ພັດທາມະວົງ ຮອງເລຂາພັກເມືອງ ຮຸນ ໄດ້ເນັ້ນໃຫ້ຄະນະພັກເຂດ ,ອົງການປົກຄອງແຕ່ລະບ້ານ ຕະຫລອດຮອດພໍ່ແມ່ປະຊາຊົນຈົ່ງພ້ອມກັນເອົາໃຈໃສ່ປົກປັກຮັກສາ ແລະນຳໃຊ້ອາຄານໃຫ້ມີປະສິດທິພາບ ແລະ ຍາວນານ ເພື່ອສ້າງໃຫ້ສະຖານທີ່ດັ່ງກ່າວ ກາຍເປັນບ່ອນບໍລິການໃຫ້ແກ່ພໍ່ແມ່ປະຊາຊົນມີສຸຂະພາບແຂງແຮງ.

ແຫຼ່ງຂໍ້ມູນ: ຂ່າວ ໄມພອນ Midia Laos

LEAVE A REPLY

Please enter your comment!
Please enter your name here