ໃນຕອນບ່າຍຂອງມື້ນີ້. ທີ່ ຫໍວັດທະນະທໍາແຫ່ງຊາດ​ ໄດ້ຈັດພິທີໂຮມຊຸມນຸມສະເຫຼີມສະຫຼອງ ວັນສື່ມວນຊົນແຫ່ງຊາດລາວ ແລະ ວັນພິມຈໍາໜ່າຍຄົບຮອບ 69 ປີ (13 ສິງຫາ 1950 -13 ສິງຫາ 2019) ໂດຍໄດ້ຮັບກຽດເຂົ້າຮ່ວມ ແລະ ໂອ້ລົມຂອງທ່ານ ສຈ. ດຣ. ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ມີບັນດາຮອງລັດຖະມົນຕີ, ​ພະນັກງານ​ອາວຸ​ໂສ, ພ້ອມ​ດ້ວຍ ​ສື່ມວນຊົນທຸກຂະແໜງການເຂົ້າຮ່ວມ

ທ່ານ ສຈ. ດຣ. ບໍ່ແສງຄໍາ ວົງດາລາ​ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ​ ໄດ້ກ່າວວ່າ​: ປັດຈຸບັນ ​ສື່​ມວນ​ຊົນໃນທົ່ວ​ໂລກ ມີ​ການ​ຂະຫຍາຍຕົວ​ຢ່າງ​ວ່ອງ​ໄວ ​ໃນ​ການ​ເຊື່ອມ​ຕົວ​ເຂົ້າ​ສູ່​ລະບົບ​ທັນ​ສະ​ໄໝ ​ເຊິ່ງ​ເປັນ​ການ​ຊຸກຍູ້​ໃຫ້​ສື່​ມວນ​ຊົນ​ລາວ ​ຕ້ອງ​ໄດ້​ບຸກບືນ ​ແລະ ປັບປຸງ​ຕົນ​ເອງ​ໃຫ້​ຫັນຈາກລະບົບອະນາລອກ ເປັນລະບົບດີຈີຕ້ອນ​ ທີ່ທັນສະໄໝ​ ແລະ​ ຫຼຸດຜ່ອນຂ່າວພິທີການ ຫັນມາຜະລິດຂ່າວທີ່ຕິດພັນກັບການສ້າງສາພັດທະນາ ການຜະລິດ​ ທີ່ຕິດພັນກັບການດໍາລົງຊີວິດ, ວຽກດີຄົນເດັ່ນ ທີ່ເປັນບົດຮຽນໃຫ້ແກ່ສັງຄົມ ຄຽງຄູ່ກັນນັ້ນກໍ່ໃຫ້ມີຂ່າວຕໍານິວິຈານ

 ​ທ່ານຍັງໄດ້ກ່າວຕື່ມອີກວ່າ: ໃນ​ນັ້ນ ການ​ນໍາພາ​ແນວ​ຄິດ​ການ​ເມືອງ ກໍ​ເປັນ​ບັນຫາ​ສໍາຄັນ​​​ທີ່​ຈະ​ຕ້ອງ​ໄດ້​ເອົາ​ໃຈ​ໃສ່ ​ໂດຍ​ສະ​ເພາະ ​ພະນັກງານ​ທີ່​ເຮັດ​ໜ້າ​ທີ່​ການ​ເມືອງ ຈະ​ເປັນ​ນັກ​ຂ່າວ, ການ​ພິ​ມຈໍາໜ່າຍ ​ທັງ​ພາກ​ລັດ-ພາກ​ເອກະ​ຊົນ ຖ້າ​ບໍ່​ເອົາ​ໃຈ​ໃສ່​ ກໍຈະ​ນໍາ​ໃຊ້​ໄປ​ໃນ​ທາງ​ທີ່​ຜິດ ​ແລະ ບໍ່​ມີ​ປະສິດທິ​ຜົນ ​​ຕ້ອງ​ໄດ້​ມີ​ການ​ຫຼີກ​ເວັ້ນ ​ແລະ ຈໍາ​ແນ​ກ​ໃຫ້​ຖືກຕ້ອງ. ດັ່ງນັ້ນ​ ຕ້ອງ​ເຊີດ​ຊູຄວາມ​ຮັບຜິດຊອບ​ທາງ​ດ້ານ​ການ​ເມືອງ​​ໃຫ້ສູງ ຕ້ອງ​ຍືດໝັ້ນ​ຕາມ​ກົດໝາຍ​ວ່າ​ດ້ວຍ​ສື່​ມວນ​ຊົນ ​ເພາະ​ສື່​ມວນ​ຊົນ​ເປັນ​ກະບອກ​ສຽງ ​​ໃນ​ການ​ໂຄ​ສະນາ​ແນວທາງ​ນະ​ໂຍບາຍ​ຂອງ​ ພັກ – ລັດ

ທ່ານ ສະຫວັນຄອນ ລາຊະມົນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ກ່າວຕື່ມອີກວ່າ: ໃນຕະຫລອດຊຸມປີຜ່ານມາ ສື່ມວນຊົນລາວໄດ້ເພີ່ມທະວີຄວາມຮັບຜິດຊອບໃນການເຄື່ອນໄຫວປະຕິບັດໜ້າທີ່ຂອງຕົນ ເຊິ່ງໜ້າທີ່ຂອງສື່ມວນຊົນຕ້ອງສະໜອງຂ່າວທີ່ວ່ອງໄວ ຖືກຕ້ອງ ຈະແຈ້ງ ແລະ​ ຮັບປະກັນໃຫ້ຜູ້ບໍລິໂພກຂໍ້ມູນຂ່າວສານໄດ້ຮັບຂ້ໍມູນທີ່ຖືກຕ້ອງກັບຄວາມເປັນຈິງ. ສື່ມວນຊົນລາວ ແລະ ການພິມຈຳໜ່າຍຂອງລາວເຮົາໄດ້ມີການເຕີບໃຫຍ່ເຂັ້ມແຂງທັງປະລິມານ ແລະ ຄຸນະພາບຢ່າງຕໍ່ເນື່ອງຄຽງຄູ່ກັບການຂະຫຍາຍຕົວທາງດ້ານເສດຖະກິດ-ສັງຄົມ.​

​ນອກຈາກນີ້. ທ່ານ ລັດຖະມົນຕີ ແລະ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ​ ຍັງໄດ້ເລາະຊົມການວາງສະແດງ ສື່ສິ່ງພີມຕ່າງໆ ແລະ ໄດ້ອຸດໜຸນປື້ມຈາກບັນດາຮາ້ນວາງສະແດງອີກດ້ວຍ.

LEAVE A REPLY

Please enter your comment!
Please enter your name here