ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ທ່ານ ກຸ ສຸວັນນະເມທີ ລັດຖະມົນຕີກະຊວງຍຸຕິທຳ ຄົນທຳອິດ ຂອງ ສປປ ລາວ ນອກຈາກທ່ານຈະຊີ້ນຳກະຊວງຍຸຕິທຳແລ້ວຍັງໄດ້ຮັບຄວາມໄວ້ວາງໃຈຈາກ ຄະນະປະຈຳສະພາປະຊາຊົນສູງສຸດຊຸດທີ 1 (ສະພາແຫ່ງຊາດ) ແຕ່ງຕັ້ງໃຫ້ທ່ານເປັນ ປະທານສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ອີກດ້ວຍ.

ດັ່ງທີ່ຮູ້ແລ້ວວ່າ ວັນທີ 15 ສິງຫາ 1982 ເປັນວັນສ້າງຕັ້ງສານປະຊາຊົນ ແຫ່ງ ສປປ ລາວ ຊຶ່ງປີ 2018 ນີ້ໄດ້ໝູນວຽນມາຄົບຮອບ 36 ປີ ບົນເສັ້ນທາງແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງສານປະຊາຊົນ ແມ່ນໄດ້ຜ່ານຜ່າຄວາມຫຍຸ້ງຍາກ, ສັບສົນ, ລະອິດລະອ້ຽວ ແລະ ສິ່ງທົດສອບທ້າທາຍຫລາຍປະການ ໃນການປະຕິບັດໜ້າທີ່ວຽກງານ ເພື່ອປະກອບສ່ວນເຂົ້າໃນການຄຸ້ມຄອງລັດ ຄຸ້ມຄອງສັງຄົມດ້ວຍລະບຽບກົດໝາຍ, ເຮັດໃຫ້ປະເທດຊາດ ມີສະຖຽນລະພາບທາງດ້ານການເມືອງ, ເສດຖະກິດມີການຂະຫຍາຍຕົວ, ສັງຄົມມີຄວາມສາມັກຄີປອງດອງ ແລະ ຍຸຕິທຳ.

ເນື່ອງໃນໂອກາດອັນສະຫງ່າລາສີ ແລະ ວັນທີ່ມີຄວາມໝາຍສຳຄັນນີ້, ພວກເຮົາຈະໄດ້ທົບທວນຫວນຄືນເຖິງມູນເຊື້ອ ແລະ ຜົນງານການເຄື່ອນໄຫວຂອງສານປະຊາຊົນ ດັ່ງຄຳເວົ້າທີ່ວ່າ: ມີອະດີດຈຶ່ງມີປະຈຸບັນ ມີປະຈຸບັນຈຶ່ງມີອະນາຄົດ ອະດີດແມ່ນໜ້າທີ່ຂອງບັນພະບູລຸດ ເພິ່ນໄດ້ເຮັດສຳເລັດໜ້າທີ່ແລ້ວ ປະຈຸບັນແມ່ນໜ້າທີ່ຂອງພວກເຮົາທຸກຄົນ ສ່ວນອານາຄົດແມ່ນໜ້າທີ່ຂອງລູກຫຼານຮຸ່ນຕໍ່ໄປ. ກິນເຂົ້າຢ່າລືມນາ ກິນປາຢ່າລືມນໍ້າ ກິນນໍ້າຢ່າລືມບໍ່ນໍ້າ.

ບ່ອນສະແດງໂຄສະນາ

ກົດທີ່ພາບນີ້ ເພື່ອເບິ່ງຂໍ້ມູນເພິ່ມເຕິມ

ພາຍຫຼັງປະເທດຊາດໄດ້ຮັບການປົດປ່ອຍ ແລະ ສະຖາປະນາປະເທດເປັນ ສປປ ລາວ ໃນປີ 1975 ພັກ-ລັດຖະບານ ໄດ້ຫັນເອົາການຄຸ້ມຄອງລັດ ຄຸ້ມຄອງສັງຄົມດ້ວຍມະຕິຄຳສັ່ງ ອີງໃສ່ຄວາມຮຽກຮ້ອງຕ້ອງການດັ່ງກ່າວ ໂດຍການຊີ້ນຳຂອງສູນກາງພັກປະຊາຊົນປະຕິວັດລາວ, ສະພາລັດຖະມົນຕີ ແລະ ສະພາປະຊາຊົນສູງສຸດ ທ່ານ ກຸ ສຸວັນນະເມທີ ໄດ້ນຳພາບັນດານັກວິຊາການຮ່າງລະບຽບການກ່ຽວກັບວຽກງານກົດໝາຍ ແລະ ຍຸຕິທຳ ຈຳນວນໜຶ່ງທີ່ຈຳເປັນເພື່ອຮັບໃຊ້ໃຫ້ແກ່ລະບອບໃໝ່ ຮ່າງລະບຽບດັ່ງກ່າວໄດ້ຖືກຮັບຮອງເອົາ ແລະ ກາຍເປັນຄຳສັ່ງເລກທີ 53/ນຍ ລົງວັນທີ 15 ຕຸລາ 1976 ກ່ຽວກັບການຈັບຕົວ, ການສືບສວນ ແລະ ການຕັດສິນຜູ້ກະທຳຜິດ.

ເອກະສານດັ່ງກ່າວໄດ້ຮັບການຜັນຂະຫຍາຍເປັນຫຼາຍນິຕິກຳເຊັ່ນ: ທີ່ຕັ້ງແລະພາລະບົດບາດຂອງພະແນກຍຸຕິທຳແຂວງ ກຳແພງນະຄອນ, ພາລະບົດບາດຂອງອົງການໄອຍະການ, ພາລະບົດບາດຂອງສານແຕ່ລະຂັ້ນ, ເອກະສານກ່ຽວກັບການສືບສວນ-ສອບສວນ, ເອກະສານກ່ຽວກັບບັນດາອົງປະກອບຂອງການກະທຳຜິດທາງອາຍາ, ເອກະສານກ່ຽວກັບການເປີດກອງປະຊຸມສານ ແລະ ການແຕ່ງຄຳຕັດສິນ; ຫຼັງຈາກນັ້ນກໍໄດ້ເປີດກອງປະຊຸມສຳມະນາຢູ່ຂັ້ນສູນກາງ ແລະ ທ້ອງຖິ່ນ ເພື່ອຜັນຂະຫຍາຍໃນການຈັດຕັ້ງປະຕິບັດໃຫ້ມີຄວາມສັກສິດ ແລະ ເປັນເອກະພາບກັນໃນຂອບເຂດທົ່ວປະເທດ. ຄຳສັ່ງດັ່ງກ່າວໄດ້ເປັນບ່ອນອີງພື້ນຖານໃນການພິຈາລະນາຕັດສິນຄະດີ.

ປີ 1975-1982 ໃນເບື້ອງຕົ້ນບໍ່ມີການຈັດຕັ້ງຂອງສານປະຊາຊົນ ແຕ່ການເຄື່ອນໄຫວດຳເນີນຕັດສິນຄະດີ ແມ່ນຂຶ້ນກັບກະຊວງຍຸຕິທຳ ໂດຍແມ່ນກົມພິພາກສາ ຂອງກະຊວງຍຸຕິທຳ ເຮັດໜ້າທີ່ໃນການຊີ້ນຳ ການພິຈາ ລະນາຕັດສິນຄະດີ ຢູ່ໃນແຕ່ລະທ້ອງຖິ່ນ ໂດຍອີງໃສ່ຄຳສັ່ງຂອງ ສຳນັກງານນາຍົກລັດຖະມົນຕີ ສະບັບເລກທີ 53/ນຍ ລົງວັນທີ 15 ຕຸລາ 1976 ກ່ຽວກັບການຈັບຕົວ, ການສືບສວນ ແລະ ການຕັດສິນຜູ້ກະທຳຜິດ ເປັນພື້ນຖານໃນການພິຈາລະນາຕັດສິນຄະດີ ຊຶ່ງແບ່ງອອກເປັນ 3 ຂັ້ນຄື:

– ຢູ່ຂັ້ນເມືອງ ແມ່ນຂະແໜງຍຸຕິທຳຂອງເມືອງ ເຮັດໜ້າທີ່ເປັນສານຕັດສິນ.
– ຢູ່ຂັ້ນແຂວງ ຫລື ກຳແພງນະຄອນ ແມ່ນ ພະແນກຍຸຕິທຳແຂວງ, ກຳແພງນະຄອນ ຮັບຜິດຊອບເປັນ ສານຕັດສິນເມື່ອມີຄະດີເກີດຂຶ້ນ ຄະນະປົກຄອງແຂວງ, ກຳແພງນະຄອນ ຈະສະເໜີຕໍ່ ລັດຖະມົນຕີກະຊວງຍຸຕິທຳ ເພື່ອແຕ່ງຕັ້ງເອົາຮອງຫົວໜ້າພະແນກຍຸຕິທຳ ເປັນຫົວໜ້າສານຕັດສິນ ພ້ອມດ້ວຍຕຸລາການ ປະຊາຊົນສອງຄົນເປັນຄະນະ ແລະ ແຕ່ງຕັ້ງເອົາຄະນະ ປກສ ເປັນໄອຍະການ.
– ຢູ່ຂັ້ນສູນກາງ ແມ່ນກົມຜູ້ພິພາກສາ ຮັບຜິດຊອບພິຈາລະນາຕັດສິນຄະດີໃນລະດັບສູນກາງ ເມື່ອມີຄະດີເກີດຂຶ້ນ ລັດຖະມົນຕີກະຊວງຍຸຕິທຳ ຈະແຕ່ງຕັ້ງສານເພື່ອຕັດສິນຄະດີ.

ສັງລວມແລ້ວໃນໄລຍະນີ້ ບໍ່ມີການຈັດຕັ້ງທີ່ຖາວອນຂອງສານ ແຕ່ເມື່ອມີຄະດີເກີດຂຶ້ນ ຈະແຕ່ງຕັ້ງສານ ຂຶ້ນເພື່ອພິຈາລະນາຕັດສິນຄະດີ ເມື່ອຕັດສິນສຳເລັດ ການຈັດຕັ້ງຂອງສານກໍ່ຈະສິ້ນສຸດໄປ ແລະ ເມື່ອມີຄະດີໃໝ່ ເກີດຂຶ້ນ ກໍ່ແຕ່ງຕັ້ງຂຶ້ນໃໝ່ຕາມຕົວຈິງ ຊຶ່ງການຕັດສິນຄະດີສ່ວນໃຫຍ່ແມ່ນຄະດີອາຍາທີ່ພົວພັນກັບ ພວກທີ່ທໍລະຍົດຕໍ່ການປະຕິວັດ ແລະ ພວກທີ່ມີໂທດກຳຮ້າຍແຮງ ຕໍ່ສິດຜົນປະໂຫຍດຂອງປະຊາຊົນຜູ້ອອກແຮງງານ. ແຕ່ເຖິງຢ່າງໃດກໍຕາມ ກໍຖືວ່າເປັນບາດກ້າວ ແຫ່ງການກຳເນີດຂອງລະບົບການຈັດຕັ້ງສານປະຊາຊົນ.

ປີ 1982 ໂດຍອີງໃສ່ສະພາບການຂະຫຍາຍຕົວທາງດ້ານເສດຖະກິດ ແລະ ສັງຄົມ ທີ່ຕ້ອງເພີ່ມທະວີການຄຸ້ມຄອງລັດ ຄຸ້ມຄອງສັງຄົມດ້ວຍລະບຽບກົດໝາຍ ໃຫ້ມີຄວາມໜັກແໜ້ນ ແລະ ເຂັ້ມແຂງຂຶ້ນເທື່ອລະກ້າວ. ຄະນະຄົ້ນຄວ້າວຽກງານວິຊາສະເພາະຂອງກະຊວງຍຸຕິທຳ ຈຶ່ງໄດ້ສະເໜີລາຍງານຕໍ່ສູນກາງພັກ ກ່ຽວກັບການຈັດຕັ້ງຂອງສານ. ຕໍ່ມາພັກແລະລັດ ກໍໄດ້ຕົກລົງສ້າງຕັ້ງສານປະຊາຊົນຂຶ້ນ ຢ່າງເປັນຮູບປະທຳ ໃນວັນທີ 15 ສິງຫາ 1982 ຕາມມະຕິຕົກລົງຂອງຄະນະປະຈຳສະພາປະຊາຊົນສູງສຸດຊຸດທີ 1, ໃນເບື້ອງຕົ້ນເອີ້ນວ່າ “ ສານສູງສຸດ ” ຊຶ່ງການສ້າງຕັ້ງສານປະຊາຊົນສູງສຸດນັ້ນ ແມ່ນໄດ້ແຍກກົມພິພາກສາ ທີ່ຂຶ້ນກັບກະຊວງຍຸຕິທຳ ມາສ້າງເປັນສານປະຊາຊົນສູງສຸດ ອັນເຮັດໃຫ້ການຈັດຕັ້ງ ຂອງສານຢູ່ສູນກາງໃນເມື່ອກ່ອນ ແມ່ນກົມພິພາກສາເຮັດໜ້າທີ່ຕັດສິນຄະດີນັ້ນ ໄດ້ຕົກມາຢູ່ໃນຄວາມຮັບຜິດຊອບຂອງ ສານປະຊາຊົນສູງສຸດ; ນອກຈາກນີ້ສານປະຊາຊົນສູງສຸດຍັງໄດ້ຄຸ້ມຄອງການເຄື່ອນໄຫວຂອງອົງການໄອຍະການເປັນການຊົ່ວຄາວໃນໄລຍະທີ່ບໍ່ທັນມີການສ້າງຕັ້ງອົງການໄອຍະການຂຶ້ນ; ສ່ວນຢູ່ຂັ້ນທ້ອງຖິ່ນ ກໍໄດ້ສ້າງຕັ້ງສານປະຊາຊົນ ໃຫ້ຂຶ້ນກັບ ພະແນກຍຸຕິທຳ ແຂວງ, ກຳແພງນະຄອນ ແລະ ເມືອງ ຊຶ່ງທັງໝົດແມ່ນຢູ່ພາຍໃຕ້ການຄຸ້ມຄອງຂອງກະຊວງຍຸຕິທຳ. ໜ້າທີ່ຕົ້ນຕໍ ຂອງສານປະຊາຊົນໃນເວລານັ້ນ ແມ່ນພິຈາລະນາຕັດສິນຄະດີ ໃຫ້ມີຄວາມຖືກຕ້ອງ ແລະ ເປັນທຳ ແນໃສ່ປົກປັກຮັກສາໝາກຜົນຂອງການປະຕິວັດ, ປົກປັກຮັກສາສິດຜົນປະໂຫຍດອັນຊອບທຳຂອງລັດ ແລະ ປະຊາຊົນລາວບັນດາເຜົ່າ.

ປີ 1984 ອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານ ນອກຈາກຈະຊີ້ນຳກະຊວງຍຸຕິທຳ ທ່ານ ກຸ ສຸວັນນະເມທີ ຍັງໄດ້ຮັບການແຕ່ງຕັ້ງໃຫ້ເປັນ ປະທານສານປະຊາຊົນສູງສຸດ ອີກໜຶ່ງຕຳແໜ່ງ. ໃນເບື້ອງຕົ້ນການຈັດຕັ້ງ ແລະ ການເຄື່ອນໄຫວຂອງສານປະຊາຊົນແມ່ນພົບຫຼາຍບັນຫາ, ມີສິ່ງທ້າທາຍ, ທົດສອບຫລາຍປະການເຊັ່ນ: ສຳນັກງານບ່ອນເຮັດວຽກບໍ່ທັນມີຕ້ອງໄດ້ອາໄສພຽງແຕ່ 1/3 ຂອງຕຶກອາຄານ ກະຊວງຍຸຕິທຳ ເປັນບ່ອນເຮັດວຽກ, ມີຄວາມແອອັດ, ພະນັກງານບໍ່ພຽງພໍ, ຂາດພາຫະນະ, ອຸປະກອນ, ງົບປະມານ ຕອບສະໜອງມີໜ້ອຍ, ບໍ່ທັນມີກົດໝາຍເປັນບ່ອນອີງ ແລະ ອື່ນໆ. ເຖິງແມ່ນວ່າຈະພົບຄວາມຫຍຸ້ງຍາກຫລາຍດ້ານດັ່ງທີ່ກ່າວມານັ້ນກໍຕາມ ແຕ່ຍ້ອນມີແນວທາງນະໂຍບາຍອັນຖືກຕ້ອງ ແລະ ສະຫຼາດສ່ອງໃສຂອງພັກ, ມີການຊີ້ນຳ-ນຳພາຂອງ ຄະນະພັກ ຄະນະນຳ ສານປະຊາຊົນສູງສຸດ ໂດຍສະເພາະການຊີ້ນຳຢ່າງໃກ້ຊິດຂອງ ທ່ານ ກຸ ສຸວັນນະເມທີ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ຂອງພະນັກງານສານປະຊາຊົນ ໃຫ້ເພີ່ມທະວີ ແລະ ຍົກສູງຄວາມຮັບຜິດຊອບ, ຄວາມສາມັກຄີເປັນຈິດໜຶ່ງໃຈດຽວ, ຍົກສູງຈິດໃຈຮັກຊາດ, ຮັກລະບອບປະຊາທິປະໄຕປະຊາຊົນອັນເຮັດໃຫ້ສານປະຊາຊົນຜ່ານຜ່າຂໍ້ຫຍຸ້ງຍາກຕ່າງໆ ແລະ ໄດ້ເຄື່ອນໄຫວຢ່າງຕັ້ງໜ້າປະກອບສ່ວນໃນການປະຕິບັດສອງໜ້າທີ່ຍຸດທະສາດເຮັດໃຫ້ບັນດາຂໍ້ຂັດແຍ່ງ, ການລະເມີດກົດໝາຍແລະບັນຫາຕ່າງໆ ທີ່ເກີດຂຶ້ນ ຖືກແກ້ໄຂ ແລະ ລຸດໜ້ອຍ ຖອຍລົງເທື່ອລະກ້າວ, ເຮັດໃຫ້ສັງຄົມມີຄວາມສະຫງົບ ໂດຍພື້ນຖານ.

ປີ 1986 ພັກ ແລະ ລັດຖະບານ ໄດ້ປະຕິບັດແນວທາງປ່ຽນແປງໃໝ່ຮອບດ້ານ ອັນໄດ້ເຮັດໃຫ້ການພັດທະນາເສດຖະກິດ-ສັງຄົມຂອງປະເທດ ມີການຂະຫຍາຍຕົວຢ່າງວ່ອງໄວ, ບັນດາສິ່ງຫຍໍ້ທໍ້, ຂໍ້ຂັດແຍ່ງເກີດຂຶ້ນໃນສັງຄົມເປັນຈຳນວນຫຼາຍ. ດັ່ງນັ້ນ, ເພື່ອເຮັດໃຫ້ລະບົບສານປະຊາຊົນໄດ້ຮັບການປັບປຸງໃຫ້ມີປະສິດທິພາບສູງຂຶ້ນນັ້ນ ໃນກອງປະຊຸມຄະນະບໍລິຫານງານສູນກາງພັກເປີດກ້ວາງ ທ່ານ ກຸ ສຸວັນນະເມທີ ຈຶ່ງໄດ້ລາຍງານຕໍ່ສູນກາງພັກດັ່ງນີ້ ເຖິງແມ່ນວ່າພວກເຮົາຈະອີງໃສ່ມະຕິຄຳສັ່ງຂອງພັກແຕ່ການດຳເນີນຄະດີຢູ່ສານແມ່ນມີຄວາມຫຍຸ້ງຍາກເນື່ອງຈາກຮູບການກະທຳຜິດທີ່ເກີດຂຶ້ນກໍສັບສົນມັນຮຽກຮ້ອງໃຫ້ມີລະບຽບກົດໝາຍເປັນບ່ອນອີງໃນການແກ້ໄຂ ແລະ ພິຈາລະນາຕັດສິນຄະດີ. ໂດຍອີງໃສ່ຄວາມຮຽກຕ້ອງການອັນຈຳເປັນຮີບດ່ວນ ໃນການເຮັດໃຫ້ລັດ ສປປ ລາວ ເປັນລັດທີ່ຄຸ້ມຄອງສັງຄົມດ້ວຍລັດຖະທຳມະນູນ ແລະ ກົດໝາຍນັ້ນ ໂດຍເຫັນໄດ້ຄວາມໝາຍສຳຄັນດັ່ງກ່າວ ສູນກາງພັກ ໄດ້ຊີ້ນຳໃຫ້ ທ່ານ ກຸ ສຸວັນນະເມທີ ນຳພາບັນດານັກວິຊາການ ຮ່າງກົດໝາຍຈຳນວນ 4 ສະບັບຄື: ກົດໝາຍອາຍາ, ກົດໝາຍວ່າດ້ວຍການດຳເນີນຄະດີອາຍາ, ກົດໝາຍວ່າດ້ວຍສານປະຊາຊົນ ແລະ ກົດໝາຍວ່າດ້ວຍອົງການໄອຍະການປະຊາຊົນ. ວັນທີ 20-24 ທັນວາ 1989 ກອງປະຊຸມສະໄໝສາມັນຄົບຄະນະເທື່ອທີ 2 ຂອງສະພາປະຊາຊົນສູງສຸດຊຸດທີ 2 ໄດ້ໄຂຂຶ້ນຢ່າງສະຫງ່າຜາເຜີຍ ທີ່ນະຄອນຫຼວງວຽງຈັນ. ເປັນກອງປະຊຸມ ຄັ້ງທໍາອິດ ທີ່ໄດ້ປຶກສາຫາລືຮ່າງກົດໝາຍຍຸຕິທຳຈຳນວນ 4 ສະບັບ ກອງປະຊຸມໄດ້ຮັບຟັງ ທ່ານ ກຸ ສຸວັນນະເມທີ ລັດຖະມົນຕີກະຊວງຍຸຕິທຳ ອະພິປາຍ 4 ຮ່າງກົດໝາຍດັ່ງທີ່ໄດ້ກ່າວມານັ້ນ ເຊິ່ງກໍ່ໄດ້ຮັບການລົງຄະແນນສຽງໂດຍມະຕິເອກະສັນ ແລະ ໄດ້ຮັບຜົນສຳເລັດອັນຈົບງາມ. ພາຍຫຼັງກົດໝາຍວ່າດ້ວຍສານປະຊາຊົນສະບັບທຳອິດ ໄດ້ຖືກຮັບຮອງເອົາໃນກອງປະຊຸມສະໄໝສາມັນ ຄົບຄະນະເທື່ອທີ 2 ຂອງສະພາປະຊາຊົນຊຸດທີ 2 ວັນທີ 23 ທັນວາ 1989 ແລະ ປະກາດໃຊ້ຢ່າງເປັນທາງການຕາມລັດຖະດຳລັດຂອງປະທານປະເທດ ລົງວັນທີ 09 ມັງກອນ 1990 ນັບແຕ່ນັ້ນມາບໍ່ວ່າຢູ່ຂັ້ນສູນກາງແລະທ້ອງຖິ່ນ ການຈັດຕັ້ງຂອງສານປະຊາຊົນໄດ້ສ້າງຕັ້ງຂຶ້ນຢ່າງເປັນຮູບປະທຳ. ໄປພ້ອມດຽວກັນນັ້ນ, ມັນໄດ້ກາຍເປັນບ່ອນອີງທີ່ສຳຄັນໃນການແກ້ໄຂ ແລະ ພິຈາລະນາຕັດສິນຄະດີໃຫ້ມີລະບົບຄົບຊຸດ, ມີລະບຽບຂັ້ນຕອນທີ່ຊັດເຈນ, ຮັດກຸມ ແລະ ມີປະສິດທິພາບຂຶ້ນເທື່ອລະກ້າວ.

ຕະຫຼອດໄລຍະການຊີ້ນຳນຳພາກະຊວງຍຸຕິທຳ ແລະ ອົງການຕຸລາການ ໂດຍສະເພາະສານປະຊາຊົນສູງສຸດ ທ່ານ ກຸ ສຸວັນນະເມທີ ໄດ້ຝາກຜົນງານປະໄວ້ໃຫ້ປະເທດຊາດດັ່ງນີ້:
– ເປັນຜູ່ລິເລີ່ມບູລະນະກົງຈັກສານ, ໄອຍະການ ໃນທົ່ວປະເທດ ໃຫ້ເປັນຮູບປະທຳຂື້ນເທື່ອລະກ້າວ.
– ປະກອບສ່ວນສ້າງຮ່າງກົດໝາຍຕ່າງໆ ໃນຖານະທີ່ເປັນເສນາທິການໃຫ້ລັດຖະບານຄື: ລັດຖະທຳມະນູນ, ກົດໝາຍອາຍາ, ກົດໝາຍແພ່ງ, ກົດໝາຍວ່າດ້ວຍສານປະຊາຊົນ, ກົດໝາຍວ່າດ້ວຍອົງການໄອຍະການປະຊາຊົນ ແລະ ອື່ນໆ 
– ໄດ້ສ້າງໂຮງຮຽນກົດໝາຍຊັ້ນກາງຂື້ນເພື່ອສ້າງພະນັກງານວິຊາການໃຫ້ມີຄວາມຮູ້ທາງດ້ານກົດໝາຍຢູ່ສານປະຊາຊົນ ແລະ ອົງການໄອຍະການປະຊາຊົນ 
– ໄດ້ເຕົ້າໂຮມຄວາມສາມັກຄີພະນັກງານລັດຖະກອນກະຊວງຍຸຕິທຳ ແລະ ອົງການຕຸລາການ ໂດຍສະເພາະແມ່ນ ສານປະຊາຊົນສູງສຸດ ໃຫ້ຍຶດໝັ້ນໃນແນວທາງຂອງພັກ ແລະ ລະບຽບກົດໝາຍຂອງລັດຢ່າງເຂັ້ມງວດ, ຕ້ອງມີຄວາມຊື່ສັດສຸດຈະລິດ, ເຮັດໜ້າທີ່ຢ່າງເປັນກາງ ແລະ ທ່ຽງທຳ ອັນໄດ້ເຮັດໃຫ້ຄະດີຢູ່ສານໄດ້ຮັບການພິຈາລະນາແກ້ໄຂ ຕັດສິນຄະດີຢ່າງຖືກຕ້ອງ ແລະ ເປັນທຳຕະຫຼອດມາ.

ຮຽບຮຽງໂດຍ: ເລ້ ສຸວັນນະເມທີ 
ແຫຼ່ງຂໍ້ມູນ: 1. ຊີວະປະຫວັດຫຍໍ້ ທ່ານ ກຸ ສຸວັນນະເມທີ 2. ປະຫວັດການກຳເນີດ ແລະ ເຕີບໃຫຍ່ຂະຫຍາຍຕົວຂອງສານປະຊາຊົນ (ເວບໄຊສານປະຊາຊົນສູງສຸດ) 3. ບົດປາຖະກະຖາມູນເຊື້ອ 36 ປີສານປະຊາຊົນ ແຫ່ງ ສປປ ລາວ 
ຂໍຂອບໃຈບັນດາທ່ານທີ່ຈະໄດ້ສະຫຼະເວລາອັນມີຄຸນຄ່າອ່ານແຕ່ຕົ້ນຈົນຈົບ ແລະ ຕິດຕາມຕະຫຼອດມາ.

LEAVE A REPLY

Please enter your comment!
Please enter your name here