ຮ້ານຄາເຟ່ແມວ ແມ່ນຫຍັງ? ແຕ່ສຳລັບສາຍຮັກແມວ ຈະຮູ້ດີວ່າເປັນຄາເຟ່ແນວໃດ ເພາະທຸລະກິດນີ້ເກິດຂື້ນມາໄດ້ຫຼາຍປີແລ້ວຢູ່ຕ່າງປະເທດ ແຕ່ສຳລັບບ້ານເຮົາ ຫາກໍເກິດຂຶ້ນຫວ່າງບໍ່ດົນມານີ້.

ຮ້ານ Le Cattitude Cafe ຕັ້ງຢູ່ບ້ານ ສີຫອມ ເມືອງ ຈັນທະບູລີ ນະຄອນຫຼວງວຽງຈັນ ເປັນຄາເຟ່ແມວ ທີ່ເຈົ້າຂອງຮ້ານບອກວ່າ ເປັນຮ້ານທຳອິດຂອງນະຄອນຫຼວງວຽງຈັນເລີຍກະວ່າໄດ້ ຮ້ານນີ້ເກິດຂື້ນໄດ້ຍ້ອນຄວາມມັກຮັກແມວຂອງເຈົ້າຂອງຮ້ານ ແລະ ຈາກປະສົບການ ການໄປໃຊ້ບໍລິການຂອງຮ້ານຄາເຟ່ແມວໃນຕ່າງປະເທດ ມາແລ້ວຫຼາຍໆແຫ່ງ ເລີຍເຫັນວ່າເປັນໂອກາດທີ່ດີ ເພາະປັດຈຸບັນນີ້ໃນປະເທດລາວ ກໍຍັງບໍ່ເຄີຍເຫັນເທື່ອ ເລີຍປືກສາກັບທາງຄອບຄົວວ່າ ເຮົາໜ້າຈະເຮັດທຸລະກິດນີ້ ເຊິ່ງວ່າທຸກຄົນກໍເຫັນດີນໍາ ເລີຍເກີດເປັນຮ້ານ Le Cattitude Cafe ໃນເດືອນ ມັງກອນ 2019

ສຳລັບຈຸດເດັ່ນຂອງຄາເຟ່ນີ້ ແມ່ນນ້ອງແມວທີ່ມີຫຼາຍສາຍພັນ ໂດຍສະເພາະສາຍພັນທີ່ຫາຍາກໃນລາວ ເປັນຕົ້ນແມ່ນ: ສາຍພັນ Bengal ແລະ American Curl ແຕ່ໂຕເດັ່ນຂອງຮ້ານທີ່ລູກຄ້າມັກມາຫລິ້ນນຳ ກໍຈະມີຫຼາຍໂຕ ແຕກຕ່າງກັນໄປ ເຊັ່ນ: Mckinsey ແມວສາຍພັນ Persian ທີ່ເຂົ້າໄດ້ກັບທຸກຄົນ ຫຼືລູກຄ້າບາງຄົນກໍມັກມາເບິ່ງແມວສາຍພັນ Bengal ເຊິ່ງທຳມະຊາດຂອງສາຍພັນນີ້ແມ່ນຈະບໍ່ໃຫ້ຈັບງ່າຍໆ ແຕ່ຢູ່ຮ້ານນີ້ມີ Captain ເຊິ່ງສຸພາບ ແລະ ປ່ອຍໃຫ້ເຮົາຫຼິ້ນນຳໄດ້ແບບງ່າຍໆເລີຍ.

ທ່ານ ນາງ ນິນນະພາ ພຸດສະຫວັນ ກ່າວວ່າ: ຄາເຟ່ແມວທີ່ເຮົາເຫັນຢູ່ຕ່າງປະເທດ ສ່ວນຫຼາຍແມ່ນຈະມີຫຼາຍແບບ ທັ້ງເລື່ອງການຕົບແຕ່ງຮ້ານໃຫ້ເປັນລວດລາຍເປັນຕາຮັກ, ບາງບ່ອນແມ່ນມີການແບ່ງເຂດ ລະຫວ່າງ ຄົນກັບແມວ ຫຼື ການໃຫ້ພະນັກງານແຕ່ງຊຸດແຟນຊີອອກມາຮັບຕ້ອນ ແຕ່ທີ່ Le Cattitude Cafe ໃຊ້ການຕົກແຕ່ງຮ້ານແບບລຽບໆ ໃຫ້ມີບ່ອນນັ່ງຂອງລູກຄ້າ ແລະ ພື້ນທີ່ຂອງແມວຢູ່ນຳກັນ ຍ້ອນວ່າຮ້ານນີ້ບໍ່ໄດ້ເປັນພຽງທຸລະກິດ ທີ່ເລັ່ງໃສ່ແຕ່ຜົນກຳໄລເທົ່ານັ້ນ ແຕ່ເຂົ້າໃຈໃນທຳມະຊາດຂອງນ້ອງແມວອິກດ້ວຍ ເຊິ່ງແນ່ນອນວ່າ ທັງໝົດມີຄ່າໃຊ້ຈ່າຍໃນການດູແລທີ່ຂ້ອນຂ້າງສູງ.

“ຄືທີ່ຮູ້ເນາະວ່າ ຄາເຟ່ແມວ ບໍ່ໄດ້ເປັນຄາເຟ່ທົ່ວໄປ ຄື ເຮົາມີ ແມວ ເຊິ່ງນ້ອງແມວ ກໍຕ້ອງໄດ້ກີນ ໄດ້ໃຊ້ ກວດສຸຂະພາບ ແລະ ນອກຈາກນີ້ກໍຍັງເລື່ອງຂອງເຟີນີເຈີຕົບແຕ່ງຮ້ານ ແມ່ນຂອງນ້ອງແມວຈະມີເກືອບເທົ່າໆ ກັບຂອງລູກຄ້າເລີຍ ຄ່າໃຊ້ຈ່າຍກໍຈະຄູນສອງຂຶ້ນຈາກຄາເຟ່ທຳມະດາທົ່ວໄປ.“ ທ່ານ ນາງ ນິນນະພາ ກ່າວ.

ບໍ່ພຽງເທົ່ານັ້ນ Le Cattitude Cafe ຍັງໃຫ້ລູກຄ້າສາມາດນັ່ງຊິວໆ ຖ່າຍຮູບກັບນ້ອງແມວ ໂດຍບໍ່ໄດ້ໄລ່ຄ່າທຳນຽມເຂົ້າຮ້ານ ແລະ ບໍ່ໄດ້ຈຳກັດເວລາຫຼິ້ນກັບແມວ ມີພຽງເງື່ອນໄຂເລັກນ້ອຍຄື ຕ້ອງໄດ້ສັ່ງອາຫານ 1 ຢ່າງ ແລະ ເຄື່ອງດື່ມ 1 ຢ່າງ ເຊິ່ງທາງຮ້ານມີອາຫານຫຼາກຫຼາຍເມນູມາໄວ້ບໍລິການ ເປັນຕົ້ນແມ່ນ: ເຂົ້າຊອຍຫຼວງພະບາງ, ເຂົ້າມັນໄກ່, ວິເຈ ແພນິນິ, ເຄັກ, ເບິເກິຣີ ແລະ ເຄື່ອງດື່ມຫຼາຍຊະນິດ ໃນລາຄາທີ່ບໍ່ໄດ້ຫຼາຍກວ່າຮ້ານອາຫານໃຈກາງເມືອງທົ່ວໄປ ຫຼື ຄິດໄລ່ປະມານ 40,000 – 50,000 ກີບຕໍ່ຄົນ ສຳລັບກາເຟແລະເບີເກີຣີ ກົງກັນຂ້າມເມື່ອທຽບກັບຮ້ານຄາເຟ່ແມວໃນໄທ ຈະມີຄ່າໃຊ້ຈ່າຍປະມານ 80,000-150,000 ກີບຕໍ່ຄົນ.

ເມນູພາຍໃນຮ້ານ

ທ່ານ ນາງ ອານາລິນ ພຸດສະຫວັນ ເຈົ້າຂອງຮ້ານອີກຄົນໜຶ່ງ ໄດ້ກ່າວກັບເຮົາຕື່ມອີກວ່າ: ສຳລັບເງື່ອນໄຂຂອງການມາໃຊ້ບໍລິການຂອງຮ້ານຄາເຟ່ແມວ ແມ່ນຈະບໍ່ຄືຮ້ານຄາເຟ່ທົ່ວໄປ ເພາະມີແມວຢູ່ໃນນີ້ ກໍຈະມີກົດລະບຽບໃນການຫຼິ້ນກັບແມວ ເພື່ອຄວາມສະອາດ ແລະ ຄວາມປອດໄພຂອງລູກຄ້າ ດັງນັ້ນ ລູກຄ້າທີ່ມາເຂົ້າໄປໃຊ້ບໍລິການຂອງຄາເຟ່ແມວ ຈະຕ້ອງປະຕິບັດຕາມກົດຂອງຮ້ານຄື:

  1. ຖ່າຍຮູບກັບນ້ອງແມວໄດ້ ແຕ່ຫ້າມເປິດແຟລສ
  2. ລູບໄດ້, ນວດໄດ້ ແຕ່ຫ້າມ ດຶງຫາງ,ຫນວດ, ຫູ ແລະ ຂົນ
  3. ຫ້າມລົບກວນແມວເວລາກິນອາຫານ,ດື່ມນ້ຳ ແລະ ນອນພັກຜ່ອນ
  4. ຫ້າມແບ່ງອາຫານຂອງລູກຄ້າໃຫ້ແມວກິນ
  5. ເດັກນ້ອຍອາຍຸຕໍ່າກວ່າ 12 ປີ ຄວນຢູ່ໃນການດູແລຂອງຜູ້ປົກຄອງ
  6. ຫ້າມລູກຄ້າອຸ້ມແມວເອງ, ຖ້າຢາກອຸ້ມແມ່ນໃຫ້ບອກພະນັກງານໃນຮ້ານ
  7. ສຳລັບລູກຄ້າ ແມ່ນໃຫ້ຮັກສາສິ່ງຂອງຂອງລູກຄ້າໃຫ້ດີ.

ທ່ານ ນາງ ນິນນະພາ ກ່າວຕື່ມອີກວ່າ: ຕໍ່ໄປໃນອະນາຄົດ ຈະພະຍາຍາມຫາກິດຈະກຳ ທີ່ໃຫ້ລູກຄ້າມີສ່ວນຮ່ວມໃນການຫລິ້ນກັບແມວໃຫ້ຫຼາຍຂຶ້ນ ແລະ ອາດຈະມີການເພີ່ມເມນູອາຫານຕ່າງໆ ພວກເຮົາຍັງມີຄວາມຍິນດີໃຫ້ຄຳປືກສາ ສຳລັບທ່ານໃດທີ່ຢາກລ້ຽງແມວ ແຕ່ຍັງບໍ່ຮູ້ວ່າຕ້ອງເຮັດຫຍັງກ່ອນ ອີກດ້ວຍ.

LEAVE A REPLY

Please enter your comment!
Please enter your name here