ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອລ້າເພື່ອກໍ່ສ້າງໂຮງໝໍນ້ອຍ ແລະ ກໍ່ສ້າງລະບົບນ້ຳລິນ ໂດຍພາຍໃຕ້ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ ຊຶ່ງລວມມູນຄ່າທັງໝົດ 4,14 ແສນໂດລາສາຫະລັດ ເທົ່າກັບ 3,5 ຕື້ກວ່າກີບ ພິທີເຊັນສັນຍາໄດ້ຈັດຂຶ້ນວັນທີ 27 ມີນາ 2019 ທີ່ສະຖານທູດຍີ່ປຸ່ນ ໂດຍຕາງໜ້າຂອງທ່ານ ຄຸໂນະ ຄາຊຶຮິໂຣະ ອຸປະທູດຍີ່ປຸ່ນປະຈຳລາວ ແລະ ທ່ານ ດຣ ເນົາ ບຸດຕາ ຫົວໜ້າຫ້ອງການ,ກະຊວງສາທາລະນະສຸກ ບັນດາທ່ານຫົວໜ້າພະແນກ,ຫົວໜ້າຫ້ອງການ ແລະພາກສ່ວນກ່ຽວຂ້ອງເຂົ້າຮ່ວມ.

ສຳລັບໂຄງສ້າງໂຮງໝໍນ້ອຍແມ່ນມີ 3 ໂຄງການ ໂດຍມີເປົ້າໝາຍກໍ່ສ້າງໃຫ້ເຂດທີ່ຍັງມີຄວາມຊຸບໂຊມ,ບໍ່ທັນມີອຳນວຍຄວາມສະດວກ ແລະຈຳເປັນຕ້ອງໄດ້ຮັບການຊ້ອມແປງຈາກໂຄງການດັ່ງກ່າວເພື່ອຍົກລະດັບເຂົ້າເຖິງການບໍລິການທາງດ້ານສາທະລະນະສຸກ ໃນນັ້ນເຂດທີ່ໄດ້ຮັບໂຄງການນີ້ມີເມືອງແບງ ແຂວງອຸດົມໄຊ,ເມືອງສາລະວັນ ແຂວງສາລະວັນ ແລະ ເມືອງໂພນທອງ ແຂວງຈຳປາສັກ ໂດຍເປັນໂຄງການກໍ່ສ້າງໂຮງໝໍຂະໜາດນ້ອຍທີ່ມີ 5-10 ຫ້ອງພ້ອມກັບອຸປະກອນການແພດ.

ສ່ວນໂຄງການກໍ່ສ້າງລະບົບນ້ຳລິນແມ່ນມີ 4 ໂຄງການແມ່ນຈັດຕັ້ງຂຶ້ນທີ່ເມືອງໄຊ ແຂວງອຸດົມໄຊ,ເມືອງໄຊຍະບູລີ ແຂວງໄຊຍະບູລີ,ເມືອງຊຳເໜືອ ແຂວງຫົວພັນ ແລະ ເມືອງຄຳ ແຂວງຊຽງຂວາງ ຊຶ່ງເປັນເຂດທີ່ມີລະບົບນ້ຳລິນຢູ່ແລ້ວແຕ່ການເຂົ້າເຖິງນ້ຳສະອາດນັ້ນແມ່ນຍັງບໍ່ທັນທົ່ວເຖິງເນື່ອງຈາກຂະໜາດມີຂີດຈຳກັດ ສ່ວນລະບົບນ້ຳລິນບາງໝູ່ບ້ານກໍ່ໄດ້ຖືກທຳລາຍຈາກນ້ຳຖ້ວມກະທັນຫັນ ແລະ ຖືກຜົນກະທົບຈາກດິນເຈື່ອນໃນປີຜ່ານມາຈົນເຮັດໃຫ້ເຂດປະຊາຊົນດັ່ງກ່າວໄດ້ໃຊ້ນ້ຳຈາກໝູ່ບ້ານທີ່ໃກ້ຄຽງມາລ້ຽງຊີບປະຈຳວັນ ສະນັ້ນໂຄງການເຫຼົ່ານີ້ຈະຊ່ວຍຍົກລະດັບການເຂົ້າເຖິງນ້ຳສະອາດໂດຍການສ້າງລະບົບນ້ຳລິນໃໝ່ທີ່ມີຖັງດູດນ້ຳ,ຖັງບີບອັດນ້ຳ,ຖັງເກັບນ້ຳ,ທໍ່ສົ່ງນ້ຳ ແລະ ຫົວກ໋ອກນ້ຳທີ່ໄດ້ມາຕະຖານ ສຳລັບໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານທີ່ໄດ້ຮັບການຊ່ວຍເຫຼືອລ້າຈາລັດຖະບານຍີ່ປຸ່ນຄັ້ງນີ້ທັງໝົດແມ່ນ 7 ໂຄງການຊຶ່ງລວມມູນຄ່າ 4,14 ແສນໂດລາສາຫະລັດ ເທົ່າກັບ 3,5 ຕື້ກວ່າກີບ.

LEAVE A REPLY

Please enter your comment!
Please enter your name here