​ຮູບ​ປະ​ກອບ

ການສໍ້ລາດບັງຫຼວງ ແມ່ນບັນຫາທີ່ສຳຄັນລັດຖະບານເຮົາກຳລັງເອົາໃຈໃສ່ຢ່າງຈິງຈັງ ແຕ່ເຖິງປານນັ້ນກໍຕາມ ການຈັດລຳດັບຂອງ 180 ປະເທດທົ່ວໂລກ ກ່ຽວກັບການສໍ້ລາດບັງຫຼວງນັ້ນເຫັນວ່າ ສປປລາວ ເຮົາຍັງມີລຳດັບທີ່ບໍ່ດີຂຶ້ນພໍເທົ່າໃດ ເມື່ອທຽບໃສ່ປີຜ່ານມາ.

ພວກເຮົາຍອມຮັບວ່າ ບັນຫາການສໍລາດບັງຫຼວງແມ່ນໄດ້ແຜ່ກະຈາຍໄປທົ່ວທຸກຫົນແຫ່ງຂອງໂລກ ທີ່ບໍ່ສະເພາະແຕ່ ສປປລາວ ເຊິ່ງສະແດງອອກຈະແຈ້ງວ່າ ໃນປີນີ້ ບັນດາປະເທດທີ່ໄດ້ຮັບການສຳຫຼວດນັ້ນ ແມ່ນບໍ່ມີປະເທດໃດເລີຍທີ່ປອດຈາກການສໍ້ລາດບັງຫຼວງ.

ອີງຕາມຂໍ້ມູນຂອງອົງການ ການສົ່ງເສີມ ຄວາມໂປ່ງໃສສາກົນ ໃຫ້ຮູ້ວ່າ ໃນປີ 2018 ປະເທດທີ່ໄດ້ຮັບຄະແນນສູງສຸດແມ່ນ ປະເທດເດັນມາກ (ຄະແນນ 88/100) ແລະ ປະເທດນິວຊີແລນ (ຄະແນນ 87/100) ແລະປະເທດທີ່ມີຄະແນນຕໍ່າສຸດກໍແມ່ນ ໂຊມາລີ (10/100), ຊູດັ່ງໃຕ້ ແລະ ຊີຣີ (ຄະແນນເທົ່າກັນ 13/100) ແລະຄະແນນສະເລ່ຍທົ່ວໂລກ ແມ່ນ 43/100 ເຊິ່ງອີກ 7 ຄະແນນພວກເຮົາກໍພາກັນເສັງຜ່ານແລ້ວ.

ສຳລັບ ສປປລາວ ແມ່ນໄດ້ຄະແນນ 29/100 ແລະຖືກຈັດຢູ່ລຳດັບທີ 132 ໃນຈໍານວນ 180 ຂອງໂລກ ເຊິ່ງລຳດັບນັ້ນເຫັນວ່າ ສປປລາວ ດີຂຶ້ນມາ 2 ລຳດັບ ຖ້າທຽບໃສ່ ເມື່ອປີຜ່ານມາ (2017) ຄືໄດ້ຄະແນນ 29/100 ແຕ່ລຳດັບ ແມ່ນທີ 135 ໂລກ. ໃນພາກພື້ນນີ້ ລາວເຮົາມີຄະແນນຫຼາຍກວ່າ ປະເທດກຳປູເຈຍ ແລະ ເທົ່າກັນກັບ ມຽນມາ ເຊິ່ງເຫັນວ່າຄະແນນທີ່ໄດ້ຂອງ ສປປລາວ ແມ່ນຕໍ່າກວ່າຄ່າສະເລ່ຍ ຂອງໂລກຫຼາຍ.

ຮູບ​ປະ​ກອບ

ພວກເຮົາຍອມຮັບວ່າ ບັນຫາການສໍ້ລາດບັງຫຼວງໃນ ສປປລາວ ຍັງແຜ່ຫຼາຍ, ເມື່ອປີຜ່ານມາ ອົງການກວດສອບ ສາມາດພົບເຫັນບັນຫາການສໍ້ລາດບັງຫຼວງຫຼາຍຕື້ກີບ, ພ້ອມນັ້ນ ພວກເຮົາກໍຍັງຍອມຮັບອີກວ່າ ການຈັດຕັ້ງປະຕິບັດໜ້າທີ່ຂອງ ອົງການດັ່ງກ່າວຍັງມີສິ່ງທ້າທາຍຫຼາຍອັນ ໂດຍສະເພາະ ຂາດການຮ່ວມມືທີ່ດີຈາກພາກສ່ວນທີ່ກ່ຽວຂ້ອງ ໂດຍສະເພາະ ບັນດາພາກສ່ວນທີ່ເປັນເປົ້າໝາຍການກວດສອບ. ໃນຂໍ້ຈຳກັດດ້ານນີ້ ພວກເຮົາກໍເຫັນວ່າ ການປາບປາມ ການສໍ້ລາດບັງຫຼວງ ຍັງບໍ່ງ່າຍໃນປະເທດເຮົາ.

ແຕ່ເຖິງຢ່າງໃດກໍຕາມ, ເມື່ອປີຜ່ານມາ ລັດຖະບານ ກໍໄດ້ເລີ່ມມີການໃສ່ລະບຽບວິໄນ ແກ່ຜູ້ທີ່ມີສ່ວນພົວພັນກັບການສໍ້ລາດບັງຫຼວງຫຼາຍຂຶ້ນ ໂດສະເພາະ ບັນດາພະນັກງານລັດ ທີ່ສວຍໃຊ້ສິດໜ້າທີ່ຂອງຕົນໄປໃນທາງທີ່ຜິດ ເຊັ່ນ ເມື່ອເດືອນ ກັນຍາ 2018 ກະຊວງການເງິນໄດ້ປະກາດລາຍຊື່ ບັນດາຜູ້ທີ່ມີສ່ວນພົວພັນ ກັບການສໍ້ລາດບັງຫຼວງ 8 ຄົນ ໂດຍຖືກລຶບຊື່ອອກຈາກ ການເປັນລັດຖະກອນ ຢ່າງຖາວອນ.

ຈາກຄຳເຫັນຂອງຊ່ຽວຊານອົງການສົ່ງເສີມຄວາມໂປ່ງໃສສາກົນໃຫ້ ຮູ້ວ່າ ການຈຳກັດການ ສໍ້ລາດບັງຫຼວງໄດ້ດີແມ່ນ ປະກອບໄປດ້ວຍ ປັດໄຈ ສາມຢ່າງຄື, 1 ສະຖາບັນ ທີ່ກ່ຽວຂ້ອງ ຕ້ອງມີຄວາມເຂັ້ມແຂງ ແລະເປັນອິດສະຫຼະ (ເຊັ່ນ ອົງການກວດສອບ), 2 ຄວາມເປັນອິດສະຫຼະຂອງສື່ ແລະ ການມີສ່ວນຮ່ວມຂອງ ປວງຊົນ ໃນບັນດາກິດຈະກຳ ຫຼື ໂຄງການໃດໜຶ່ງຂອງລັດຖະບານ.

ເຖິງຢ່າງໃດກໍດີ, ເຊື່ອໝັ້ນວ່າ ລັດຖະບານເຮົາ ເພິ່ນອາດມີຍຸດທະສາດໃນການຕີຖອຍບັນຫານີ້ໃຫ້ຫຼຸດໜ້ອຍຖອຍລົງເທື່ອລະກ້າວແລ້ວ ເຊິ່ງພວກເຮົາຍັງມີຫຼາຍຢ່າງທີ່ຈະຕ້ອງປັບປຸງ ເພື່ອໃຫ້ແນ່ໃຈວ່າ ພວກເຮົາບໍ່ນອນໃນກຸ່ມບັນດາປະເທດທີ່ມີການສໍ້ລາດບັງຫຼວງຫຼາຍທີ່ສຸດຂອງໂລກ ຮອດປີ 2030.

ທີ່​ມາ: ໜັງ​ສື​ພິມ​ລາວ​ພັດ​ທະ​ນາ

LEAVE A REPLY

Please enter your comment!
Please enter your name here