ກົມສົ່ງເສີມການຄ້າລະຫວ່າງປະເທດ ກະຊວງ ພານິດ (ໄທ) ສົມທົບກັບ ສະພາອຸດສາຫະກຳແຫ່ງປະເທດໄທ ຈັດທັບໃຫຍ່ປະຊາສຳພັນ 3 ປະເທດເພື່ອນບ້ານ ລາວ, ກຳປູເຈຍ, ຫວຽດນາມ ເພື່ອເຊີນຊວນໄປຮ່ວມງານລະດັບອາຊຽນ 2 ງານ ແມ່ນງານວາງສະແດງສິນຄ້າເຄື່ອງປັບອາກາດ ແລະເຄື່ອງເຮັດຄວາມເຢັນ 2562 (Bangkok RHVAC 2019) ແລະງານສະແດງສິນຄ້າເຄື່ອງໃຊ້ໄຟຟ້າ ແລະອີເລັກໂຕຣນິກ 2562 (Bangkok E&E 2019) ທີ່ຈະຈັດຂຶ້ນໃນລະຫວ່າງວັນທີ 25-28 ກັນຍາ 2019 ທີ່ສູນນິທັດສະການ ແລະການປະຊຸມໄບເທັກ ບາງນາ ປະເທດໄທ ເຊິ່ງຄາດວ່າຈະມີນັກທຸລະກິດ ແລະຜູ້ຊື້ຈາກອາຊຽນ ແລະທົ່ວໂລກເຂົ້າຮ່ວມຫຼາຍກວ່າ 10 ພັນຄົນ.

ສຳຫຼັບ ສປປ ລາວ ມີການຈັດງານຖະແຫຼງຂ່າວຢູ່ນະຄອນຫຼວງວຽງຈັນ ໃນວັນທີ 14 ມັງກອນ ທີ່ຜ່ານມາ ເພື່ອເຊີນຊວນຜູ້ປະກອບການຂອງ ສປປ ລາວ ເຂົ້າຮ່ວມງານ ແລະຖືເປັນຊ່ອງທາງໃນການເຮັດທຸລະກິດ ແລະພົບປະຜູ້ຜະລິດສິນຄ້າໃນລາຄາໂຮງງານໂດຍກົງ ໂດຍໃຫ້ກຽດເຂົ້າຮ່ວມ ຂອງທ່ານ ນາງ ຍານີ ສີມີໄຊ ຜູ້ອໍານວຍການສໍານັກງານສົ່ງເສີມການຄ້າໃນຕ່າງປະເທດ ປະຈໍາລາວ

ທ່ານ ວິທະຍາກອນ ມະນີເນດ ຮອງອະທິການບໍດີ ກົມສົ່ງເສີມການຄ້າລະຫວ່າງປະເທດ ຜູ້ນຳພາຄະນະປະຊາສຳພັນ ແລະຈັດງານຄັ້ງນີ້ກ່າວວ່າ: ງານ Bangkok RHVAC 2019 ແລະງານ Bangkok E&E 2019 ເປັນງານວາງສະແດງສັກກະຍະພາບຂອງອຸດສາຫະກໍາສອງຂະແໜງຄື: ສິນຄ້າອຸດສາຫະກຳເຄື່ອງປັບອາກາດ ແລະເຄື່ອງເຮັດຄວາມເຢັນ ແລະອຸດສາຫະກຳເຄື່ອງໃຊ້ໄຟຟ້າ ແລະອີເລັກໂຕຣນິກ ທີ່ໃຫຍ່ຕິດອັນດັບ 1 ໃນ 5 ຂອງໂລກ, ງານໃນປີນີ້ ຈະຈັດຂຶ້ນພາຍໃຕ້ແນວຄິດ “ONE STOP SOLUTION” ເຊິ່ງໄດ້ຮວບຮວມສິນຄ້າຂະແໜງອຸດສາຫະກຳ ຕັ້ງແຕ່ຕົ້ນນ້ຳຈົນເຖິງປາຍນ້ຳເຊັ່ນ: ຊິ້ນສ່ວນທີ່ເຮັດຈາກພລາສຕິກ, ເຫຼັກ ແລະຢາງ, ມໍເຕີ້, ຄອມເພລສເຊີ, ຄອບສ໌ ໄປຈົນເຖິງເຄື່ອງປັບອາກາດ, ເຄື່ອງເຮັດຄວາມເຢັນ ແລະເຄື່ອງໃຊ້ໄຟຟ້າ ເຊິ່ງມີສິນຄ້າຫຼາກຫຼາຍແບບໃຫ້ເລືອກຊື້ ໄປຈົນຮອດສິນຄ້ານະວັດຕະກຳ.

ທ່ານ ອະທິດ ຖຽນລິຂິດ ຕົວແທນກຸ່ມອຸດສາຫະກໍາເຄື່ອງປັບອາກາດ ແລະເຄື່ອງເຮັດຄວາມເຢັນ ສະພາອຸດສາຫະກຳແຫ່ງປະເທດໄທ ກ່າວວ່າ: ປະເທດໄທ ມີໂຮງງານຜະລິດສິນຄ້າເຄື່ອງປັບອາກາດ ທີ່ມີຊື່ສຽງຈາກຕ່າງປະເທດ ແລະໄທ ທີ່ໄດ້ມາດຕະຖານສາກົນຢ່າງຫຼວງຫຼາຍ, ທັງເປັນສູນລວມ Supply Chain ຂອງອຸດສະຫະກໍາເຄື່ອງປັບອາກາດ ເຊັ່ນ: ລວດທອງແດງ, ຄອມເພຣດເຊີ PCB ເທີໂມສະແຕັດ ແລະມໍເຕີເປັນຕົ້ນ, ໂດຍສິນຄ້າເຫຼົ່ານີ້ ມີການສົ່ງອອກເປັນອັນດັບ 2 ຂອງໂລກ ຫຼື ຫຼາຍກວ່າ 5 ພັນລ້ານໂດລາໃນປີ 2018. ສໍາລັບສິນຄ້າເຄື່ອງໃຊ້ໄຟຟ້າ ແລະອີເລັກໂຕຣນິກ ໄດ້ສົ່ງອອກສູ່ຕະຫຼາດອາຊຽນ ແລະຕາເວັນອອກກາງກວມ 63,20% ໃນນັ້ນ ສປປ ລາວ ມີການນໍາເຂົ້າຈາກໄທເປັນຫຼັກ ສະເລ່ຍ 60% ເຊິ່ງປະກອບມີ ວົງຈອນພິມ, ອຸປະກອນສື່ສານໄຮ້ສາຍ, ໂທລະພາບ ແລະເຄື່ອງປັບອາກາດ.

ນອກຈາກນີ້, ງານ Bangkok RHVAC ແລະ Bangkok E&E 2019 ຍັງມີເນື້ອທີ່ຫລາຍຂຶ້ນກວ່າປີທໍາອິດ ທີ່ມີເນື້ອທີ່ເປີດງານພຽງ 19 ພັນຕາລາງແມັດ ແຕ່ໃນປີນີ້ມີເນື້ອທີ່ຈັດງານເຖິງ 23 ພັນ ຕາລາງແມັດ ແລະຄິດວ່າຈະມີຜູ້ປະກອບການເຂົ້າຮ່ວມທັງໝົດ 400 ບໍລິສັດ, ມີ 1.000 ຫ້ອງວາງສະແດງ ໃນນີ້ ສິນຄ້າຂອງລາວຈະມີ 10 ຫ້ອງ ແລະຄາດວ່າ ຈະມີຄົນເຂົ້າຮ່ວມຊົມບໍ່ຕ່ຳກວ່າ 14 ພັນຄົນຈາກທົ່ວໂລກ.

LEAVE A REPLY

Please enter your comment!
Please enter your name here