ໂຈໂຈ້ ມິຣາໂຄ້ ວາງໄມ ໄປນັ່ງບັນລັງເປັນຜູ້ກຳກັບຈັບໂຟໂນຄັ້ງທີ່ສອງ ເຊື່ອໝັ້ນວ່າ “ສຽງສຸດທ້າຍ” ຈະໄດ້ຮັບການຕ້ອນຮັບບໍ່ແພ້ “ວັນຄົບຮອບ” ພ້ອມເຜີຍແຜນເລື່ອງທີ່ສາມ ແລະຄວາມຝັນໃນການວາງໄມ ຜັນຕົວໄປເປັນຜູ້ກຳກັບຢ່າງເຕັມຕົວ.

ທ່ານ ຈິລະສັກ ສາຍສະໜິດ ຫຼື ໂຈໂຈ້ ມິຣາໂຄ້ ນັບເປັນໜຶ່ງໃນນັກແຕ່ງເພງ ແລະນັກຮ້ອງດາວຮຸ່ງໃນ ສປປລາວ ທີ່ມີຊື່ສຽງ ແລະມີແຟນຄລັບຕິດຕາມຈຳນວນຫຼາຍ ໂດຍຕະຫຼອດ 5 ປີທີ່ຜ່ານມາ, ໂຈໂຈ້ ມີຊິງເກິ້ນທີ່ໄດ້ຮັບຄວາມນິຍົມຢ່າງຫຼວງຫຼາຍ ເຊັ່ນ ເພາະເຫງົາຄຳດຽວ ແລະຮັກກັນວັນນີ້. ລວມເຖິງຜົນງານຮ່ວມກັບສິນລະປິນໄທອີກ 2 ຄົນ ຄືເພງຊົ່ວນິລັນດອນ ກັບຕ່າຍ ອໍລະໄທ ແລະເພງ ຢືມ ກັບໂກ້ ມິສເຕີແຊກແມນ.

ໂຈໂຈ້ ມິຣາໂຄ້ ໃຫ້ສັມພາດນຳອິນໄຊລາວ

ໃນອີກມຸມໜຶ່ງ ໂຈໂຈ້ ຍັງເປັນນັກເວົ້າເພື່ອສ້າງແຮງບັນດານໃຈ ແລະບົດບາດໃໝ່ລ່າສຸດ ທີ່ເລີ່ມເປັນທີ່ຮູ້ຈັກກັນຫຼາຍຂຶ້ນ ຄືການເປັນຜູ້ກຳກັບຮູບເງົາ ໂດຍໜັງເລື່ອງທຳອິດຄື “ວັນຄົບຮອບ” ເຊິ່ງອອກສາຍໃນປີ 2016 ແລະໄດ້ຮັບສຽງຕອບຮັບຈາກຜູ້ຊົມເປັນຢ່າງດີ ເຖິງວ່າເຈົ້າຂອງຈະເວົ້າໃນທຳນອງທີ່ວ່າ ບໍ່ມັກໜັງທີ່ເຮັດອອກມາພໍເທົ່າໃດ? ແຕ່ວ່າຜູ້ຊົມຄົນລາວ ຍັງໃຫ້ໂອກາດກັບໜັງທີ່ຜະລິດໂດຍຄົນລາວ ແລະຕອບຮັບໃນທຳນອງໃຫ້ກຳລັງໃຈຫຼາຍກວ່າຕິຕຽນ.

ດ້ວຍເຫດນີ້, ບົດຮຽນຫຼາຍຢ່າງຈຶ່ງຖືກຖອດຈາກໜັງເລື່ອງທຳອິດ ມາເປັນ “ສຽງສຸດທ້າຍ” ເຊິ່ງມີກຳໜົດເປີດສາຍໃນວັນທີ່ 22 ພະຈິກນີ້, ໂດຍໂຈໂຈ້ກ່າວວ່າ ໜັງເລື່ອງນີ້ເໝາະສຳລັບຜູ້ຊົມທຸກໄວ ແລະນັບເປັນໜັງທີ່ຄົບອັດຖະລົດທີ່ສຸດ ຄືມີທັງ ຕະຫຼົກ, ຄວາມສຸກ, ຄວາມຮັກ, ຄວາມໜ້າຮັກຂອງໜັງ ລວມໄປດ້ວຍຄວາມຊຶ້ງໃນອາລົມທີ່ຕົວລະຄອນຖ່າຍທອດອອກມາ.

“ຄົນສົງໄສຫຼາຍວ່າ ເປັນຫຍັງໃສ່ຊື່ ສຽງສຸດທ້າຍ ມີໃຜຕາຍຫຼືບໍ່? ອັນນີ້ຕ້ອງໄປເບິ່ງໜັງຕົວຈິງ ຂ້ອຍບອກບໍ່ໄດ້ ແຕ່ຂ້ອຍບອກໄດ້ວ່າ ສິ່ງທີ່ຄົນໄປເບິ່ງຈະໄດ້ກັບບ້ານຄືຄວາມສຸກ ເຈົ້າຈະໄດ້ຄວາມປະທັບໃຈເຕັມໆ ແລ້ວເຈົ້າຈະຮູ້ສຶກວ່າ ການເບິ່ງໜັງ 1 ຊົ່ວໂມງ 45 ນາທີນີ້, ເຮັດໃຫ້ເຈົ້າຮູ້ສຶກວ່າ ເຈົ້າລືມມັນບໍ່ລົງ” ໂຈໂຈ້ ກ່າວ.

ລົງທຶນແລະລົງແຮງກວ່າເດີມ

ໜັງເລື່ອງນີ້, ມີນັກສະແດງຈາກວົງການບັນເທີງຢ່າງຫຼວງຫຼາຍ ລວມເຖິງອະດີດນັກຮ້ອງ ແລະມີສຢູນິເວີສລາວ ມາຮ່ວມສະແດງດ້ວຍ ໂດຍໂຈໂຈ້ກ່າວວ່າ ທຸກຄົນຜ່ານຂັ້ນຕອນການຄັດເລືອກນັກສະແດງປົກກະຕິ ແລະໃຊ້ເວລາກຽມການທັງໝົດຢູ່ດົນນັບປີ ກ່ອນທີ່ຈະເລີ່ມລົງມືຖ່າຍທຳໃນນະຄອນຫຼວງວຽງຈັນທັງໝົດ ຈົນແລ້ວຮຽບຮ້ອຍໃນໄລຍະເວລາພຽງ 20 ມື້, ເຊິ່ງໄລຍະເວລາຖ່າຍທຳທີ່ສັ້ນນີ້, ເນື່ອງຈາກມີການເພີ່ມທີມງານໃນກອງຖ່າຍຫຼາຍເຖິງ 50 ຄົນ ລວມເຖິງເທັກໂນໂລຢີ ແລະອຸປະກອນຖ່າຍທຳ ທີ່ໃຊ້ຫຼາຍຂຶ້ນກວ່າໜັງເລື່ອງທີ່ແລ້ວ ທັງໄຟ ແລະກ້ອງ.

ສຳລັບແຮງບັນດານໃຈຂອງໜັງເລື່ອງນີ້, ມາຈາກຄວາມມັກໃນການຮ້ອງເພງເປັນຫຼັກ ໂດຍເນື້ອໃນກ່ຽວຂ້ອງກັບການແຂ່ງຂັນເພງ ແລະການຕາມຫາຄວາມຝັນ ເຊິ່ງແນ່ນອນວ່າ ຈະມີເພງທີ່ໂຈໂຈ້ແຕ່ງ ປາກົດຢູ່ໃນໜັງເລື່ອງນີ້ດ້ວຍ ເປັນຕົ້ນວ່າ “ຄວາມຝັນ” ເຊິ່ງໄດ້ປ່ອຍເພງຂຶ້ນ Youtube ໄປແລ້ວເມື່ອເດືອນທີ່ຜ່ານມາ.

ຄວາມມຸ່ງໝັ້ນສູ່ບັນລັງຜູ້ກຳກັບເຕັມຕົວ

ເຖິງວ່າໂຈໂຈ້ ຈະມີຜົນງານການສະແດງໃນມິວສິກວີດີໂອຂອງຕົນເອງຢູ່ຫຼາຍຄັ້ງ, ແຕ່ກັບໜັງທີ່ຕົນເອງກຳກັບ ໂຈໂຈ້ປະຕິເສດຢ່າງຊັດເຈນວ່າ ຜູ້ກຳກັບບໍ່ຄວນເປັນ “ນັກສະແດງ” ໃນໜັງຂອງຕົນເອງ ເຖິງວ່າຈະມີສະປອນເຊີສະເໜີໃຫ້ເຂົ້າຮ່ວມສະແດງກໍຕາມ.

“ຂ້ອຍວ່າຫຼິ້ນເອງຫັ້ນມັນງ່າຍ ແຕ່ຫຼິ້ນເອງກຳກັບເອງນະ ມັນນາຮົກ” ໂຈໂຈ້ກ່າວກັບອິນໄຊລາວຕົງໆ “ຄືແທ້ໆແລ້ວ! ຂ້ອຍວ່າ ຜູ້ກຳກັບບໍ່ໜ້າຈະຫຼິ້ນ ນັກສະແດງບໍ່ໜ້າຈະເປັນຜູ້ກຳກັບ ມັນບໍ່ເມັກເຊັ້ນ ເວັ້ນແຕ່ເຈົ້າມີຜູ້ຊ່ວຍທີ່ເກັ່ງແທ້ໆ! ແລ້ວເຈົ້າເຊື່ອໃຈເຂົາໄດ້ ອັນນັ້ນໂອເຄ ເອົາຢູ່! ແຕ່ຖ້າບໍ່ແມ່ນ ອັນນັ້ນຈົ້າສ່ຽງ ເຈົ້າຈະຫ່ວງໜ້າພະວົງຫຼັງ ແລ້ວເຈົ້າຈະເຮັດວຽກໄດ້ບໍ່ແຮັບປີ້”.

ຈັ່ງໃດກໍຕາມ, ຜູ້ຊົມຈະຍັງຄົງໄດ້ເຫັນໂຈໂຈ້ປາກົດຢູ່ໃນໜັງເລື່ອງນີ້ຢູ່ເປັນຊ່ວງສັ້ນໆ ເຊິ່ງເຂົາເອງຍັງບໍ່ຍອມບອກ (ແລະແນ່ນອນວ່າ ຄົງບໍ່ຢາກໃຫ້ທາງອິນໄຊລາວບອກ) ວ່າປາກົດຕົວຢູ່ໃນຊີນໃດ?.

ແນ່ນອນ, ການເປັນຜູ້ກຳກັບເຕັມຕົວ ອາດຈະບໍ່ແມ່ນບົດບາດທີ່ໂຈໂຈ້ສຳເລັດໄດ້ໂດຍງ່າຍ ເພາະນອກຈາກການຮ້ອງເພງ ແລະງານເວົ້າເພື່ອສ້າງແຮງບັນດານໃຈແລ້ວ ກໍຍັງມີບົດບາດຂອງນັກທຸລະກິດ ເຊິ່ງເຂົາຍອມຮັບວ່າ ສົ່ງຜົນຕໍ່ວຽກກຳກັບຂອງລາວຢ່າງຫຼາຍເລີຍ ເພາະວ່າເປັນງານທີ່ເຮັດໃຫ້ຄວາມຝັນຂອງເຂົາຕ້ອງຢຸດຢູ່ເລື້ອຍໆ ແຕ່ຖ້າມີຜູ້ຊ່ວຍເຂົ້າມາໄດ້ຄົບທຸກດ້ານ ບັນຫານີ້, ໜ້າຈະຄ່ອຍໆໝົດໄປ.

ເຄີຍມີຄົນຖາມຂ້ອຍວ່າ ເຈົ້າຫວ່າງເວລາໃດ? ຂ້ອຍບອກຊ່ວງເວລານອນ ກໍເຫັນເຂົາງຽບໄປບຶດໜຶ່ງ ແລ້ວຂ້ອຍກໍ ທໍ່ນີ້ລະ! ຄາວຽກຢູ່ ເປັນຕາຫົວຫຼາຍເລື່ອງນີ້

– ໂຈໂຈ້ ມິລາໂຄ້  –

ໃນລະຫວ່າງນີ້, ໂຈໂຈ້ຍອມຮັບວ່າ ບໍ່ສາມາດແບ່ງເວລາມາເປັນຜູ້ກຳກັບໄດ້ຢ່າງເຕັມຕົວ ເນື່ອງຈາກບໍ່ມີເວລາໃຫ້ ແບ່ງ “ມັນແບ່ງບໍ່ໄດ້ດອກ! ມີທໍ່ໃດກໍໃຫ້ເທົ່ານັ້ນ ມີເວລາດຽວທີ່ຂ້ອຍຫວ່າງຄື ເວລານອນ… ເຄີຍມີຄົນຖາມຂ້ອຍວ່າ ເຈົ້າຫວ່າງເວລາໃດ? ຂ້ອຍບອກຊ່ວງເວລານອນ ກໍເຫັນເຂົາງຽບໄປບຶດໜຶ່ງ ແລ້ວຂ້ອຍກໍ ທໍ່ນີ້ລະ! ຄາວຽກຢູ່ ເປັນຕາຫົວຫຼາຍເລື່ອງນີ້, ຄືຖາມຂ້ອຍວ່າຫວ່າງເວລາໃດ? ຂ້ອຍບໍ່ເຄີຍຫວ່າງ”.

ສຳລັບເວລາສ່ວນຕົວ, ໂຈໂຈ້ເປີດໃຈເລົ່າໃຫ້ຟັງວ່າ ເລີ່ມຕັ້ງແຕ່ເວລາປະມານ 8 ໂມງເຊົ້າ “ຂ້ອຍເປັນຄົນຕື່ນປະມານແປດໂມງເຊົ້າ ຂ້ອນຈະເບິ່ງຂ່າວໃນໂທລະສັບ ອ່ານໄປເລື້ອຍໆ ກ່ຽວກັບເລື່ອງສະຖານະການບ້ານເມືອງ ແລ້ວກໍມີເມສເຊສທີ່ຖືກຖິ້ມໄວ້ໃນວ໋ອດແອັບ ໃຫ້ເຮົາມາຕອບຕອນເຊົ້າ ກໍເຂົ້າມາເຄຍແຕ່ລະເລື່ອງໄປກ່ອນ ໃຊ້ເວລາປະມານສອງຊົ່ວໂມງ ເຖິງປະມານສິບໂມງເຊົ້າ ແລ້ວແຕ່ຈັງຫວະ ແລ້ວແຕ່ວ່າຂ້ອຍມີວຽກບໍ່? ຖ້າບໍ່ມີກໍຈະຕິດຕາມຂ່າວໄປເລື້ອຍໆ ແຕ່ພວກນີ້, ພໍອອກຈາກຫ້ອງມັນຈົບແລ້ວ ວຽກກໍຈະຕາມມາ”.

“ຫຼັກໆຂ້ອຍກຳລັງເຮັດບໍລິສັດໃໝ່ ແລ້ວກໍມີບໍລິສັດໂປຣດັກຊັ່ນ ທີ່ກຳລັງເຮັດຢູ່ຕອນນີ້ ແລ້ວກໍມີວຽກເລັກໆນ້ອຍໆເຕັມໄປໝົດ ເພາະວ່າຂ້ອຍຕ້ອງເບິ່ງ 4-5 ບໍລິສັດ ຕອນນີ້ມັນກໍຈະຫຍຸ້ງຍາກໄປໝົດທຸກເລື່ອງ ໂດຍສະເພາະເລື່ອງຂອງມີເດຍ ເລື່ອງຂອງເພຈ ເລື່ອງຂອງວົງການບັນເທີງ ຢ່າງເຊັ່ນໜັງໃນຕອນນີ້ ຂ້ອຍມີໂປຣເຈັກ 5-6 ໂປຣເຈັກແລ້ວ, ບໍ່ນັບທຸລະກິດສ່ວນຕົວ ມື້ໆໜຶ່ງກໍບໍ່ໄດ້ເຮັດອິຫຍັງຫຼາຍ ກໍເຮັດວຽກຫັ້ນລະ!” ໂຈໂຈ້ສະຫຼຸບ.

ວັດຜົນຄວາມສຳເລັດດ້ວຍລາຍໄດ້

JoJo Miracle

ເມື່ອຖາມວ່າ ໜັງເລື່ອງນີ້ຄາດຫວັງລາຍໄດ້ ຫຼືລາງວັນສ່ຳໃດ? ໂຈໂຈ້ຕອບກົງໆວ່າ ລາຍໄດ້ຄືສິ່ງທີ່ສຳຄັນກວ່າລາງວັນ ເພາະສະແດງໃຫ້ເຫັນວ່າ ມີຄົນຊື່ນຊອບໜັງເລື່ອງນີ້ຫຼາຍສ່ຳໃດ? ດັ່ງນັ້ນ, ຈຶ່ງຫຼີກບໍ່ໄດ້ທີ່ “ສຽງສຸດທ້າຍ” ຈະເປັນເໝືອນຕົວວັດໃຈແຟນຄລັບນັບແສນຂອງໂຈໂຈ້ ວ່າຈະໃຫ້ການຕ້ອນຮັບໜັງຂອງໂຈໂຈ້ຍິ່ງກວ່າເກົ່າຫຼືບໍ່? ລວມເຖິງຄວາມເພິ່ງພໍໃຈຈາກໜັງ ຈະສ້າງກະແສບອກຕໍ່ໃຫ້ເກີດຈຳນວນຜູ້ຊົມ ຫຼາຍກວ່າ 53,000 ຄົນ ດັ່ງທີ່ເຄີຍເຮັດສະຖິຕິໄວ້ຈາກໜັງເລື່ອງ “ວັນຄົບຮອບ” ໄດ້ເທົ່າໃດ?.

“ຂ້ອຍບໍ່ແມ່ນຄົນເຮັດໜັງທີ່ຂ້ອນຂ້າງເປັນອາຕີສ ຫຼືອິນດີ້ຂິໜາດນັ້ນ ຂ້ອຍຂ້ອນຈະເປັນຄົນທີ່ ໜັງດີບໍ່ດີນັ້ນ! ໃຫ້ຜູ້ຊົມເປັນຄົນບອກດີກວ່າ” ໂຈໂຈ້ກ່າວ “ຂ້ອຍກໍຫວັງວ່າ ລາຍໄດ້ເປັນສິ່ງສຳຄັນ ເພາະຢືນຢັນໄດ້ຄືຢ່າບອກເອງ ຢ່າເອົາລາງວັນມາເປັນຕົວກາລັນຕີ ຂ້ອຍບໍ່ສົນໃຈລາງວັນ , ຂ້ອຍບໍ່ເຄີຍລ່າລາງວັນ ແຕ່ຂ້ອຍຢາກໃຫ້ຄົນເບິ່ງມີຄວາມສຸກ, ແຮັບປີ້ ໄປເບິ່ງແລ້ວ ຄຸ້ມ, ພໍ ນັ້ນແຫລະ! ຄືສິ່ງທີ່ສຳຄັນທີ່ສຸດ”.

ສ່ວນຄວາມຄາດຫວັງໃນການນຳໜັງເລື່ອງ ສຽງສຸດທ້າຍ ໄປສາຍໃນຕ່າງປະເທດ ໂຈໂຈ້ຍອມຮັບວ່າ ຖ້ານຳໜັງເລື່ອງນີ້ໄປສາຍໃນພາກອິສານຂອງໄທໄດ້ຈະດີຫຼາຍ ແຕ່ກໍເປັນພຽງຄວາມຫວັງຂອງປີໜ້າ ເພາະວ່າປີນີ້, ມີແຜນສະເພາະການພາຍໃນ 3 ແຂວງ ຂອງ ສປປລາວ ເທົ່ານັ້ນ. ນອກຈາກນີ້, ເຂົາຍັງຄິດວ່າການນຳໜັງໄປຕິດຕໍ່ໃນໂຮງສາຍໃນໄທ ບໍ່ແມ່ນຄວາມຄິດທີ່ດີ ເພາະການເຮັດແບບນັ້ນ ຈະຕາມມາດ້ວຍການຕັ້ງເງື່ອນໄຂຕ່າງໆ ເຊິ່ງລາວບໍ່ຕ້ອງການແບບນັ້ນ.

ເສັ້ນທາງວາງໄມ ໄປສູ່ສຽງສຸດທ້າຍຂອງໂຈໂຈ້

“ຍ້ອນວ່າບາງເທື່ອຄົນມັນສັບສົນກັບຕົວເຮົາຫຼາຍໂພດນະ! ວ່າເຮັດອິຫຍັງຢູ່ກັນແທ້! ກໍເລີຍຄິດວ່າ ຄົນທີ່ຕິດຕາມເຮົາກໍສັບສົນ ບໍ່ຮູ້ຕົວຕົນທີ່ແທ້ຈິງຂອງຕົວເອງ ອີກຢ່າງໜຶ່ງ ກໍເຮັດເພງມາຕັ້ງ 5 ປີແລ້ວ, ຮູ້ສຶກວ່າ ມັນອີ່ມຕົວບໍ່” ໂຈໂຈ້ບອກກົງໆ ເມື່ອເຮົາຖາມວ່າ ເປັນຜູ້ກຳກັບແລ້ວຈະເຊົາຮ້ອງເພງເລີຍຫຼືບໍ່? ແຕ່ໂຈໂຈ້ຍັງຢືນຢັນວ່າ ຈະບໍ່ຢຸດການເລື່ອງເພງແບບປຸບປັບ ແລະເມື່ອເຖິງມື້ນັ້ນ, ການຢຸດຮ້ອງເພງຂອງໂຈໂຈ້ ຈະຕ້ອງມີທາງລົງຢ່າງສວຍງາມດ້ວຍ.

ໃນທາງກັບກັນ ໂຈໂຈ້ເຫັນວ່າ ເຂົາສາມາດສົ່ງເສີມວົງການຮູບເງົາໄປຢ່າງຍາວນານອີກກວ່າ 20 ປີ ເພາະວ່າອຸດສາຫະກຳນີ້ ຍັງຂາດບຸກຄະລາກອນຢູ່.

“ໜັງລາວ ເປັນອິຫຍັງທີ່ຄົນລາວໃຫ້ຄວາມສົນໃຈພໍສົມຄວນ ແລ້ວຖ້າເຈົ້າເຮັດເປັນ ເຮັດຈິງຈັງ ຄົນກໍພາກັນໄປເບິ່ງ” ໂຈໂຈ້ເວົ້າ ເຖິງວ່າເຂົາຈະວັດຜົນຄວາມສຳເລັດຂອງໜັງຈາກລາຍໄດ້ ແຕ່ໃນມຸມຂອງການສ້າງໜັງຂອງເຂົາ ລາຍໄດ້ບໍ່ແມ່ນຄຳຕອບຂອງທັງໝົດ.


“ໜັງລາວ ເປັນອິຫຍັງທີ່ຄົນລາວໃຫ້ຄວາມສົນໃຈພໍສົມຄວນ ແລ້ວຖ້າເຈົ້າເຮັດເປັນ ເຮັດຈິງຈັງ ຄົນກໍພາກັນໄປເບິ່ງ”

– ໂຈໂຈ້ ມິລາໂຄ້ –

ໂຈໂຈ້ຢ້ຳວ່າ “ຢ່າເບິ່ງຂ້າມວ່າ ຄົນເບິ່ງຕ້ອງການຫຍັງ? ເບິ່ງວ່າເຮົາຕ້ອງການເຮັດຫຍັງ? ເຮົາຕ້ອງການເຮັດໃຫ້ມັນດີຂຶ້ນ ຫຼືບໍ່ ຢ່າຄິດແຕ່ເບິ່ງວ່າ ເຮັດໜັງເພື່ອຈະເອົາເງິນຢ່າງດຽວ ເພາະວ່າການເຮັດໜັງເອົາເງິນທີ່ລາວເຮົານີ້ ບໍ່ແມ່ນທາງອອກທີ່ດີ ແຕ່ຖ້າໜັງຂອງເຈົ້າຕີຕະຫຼາດອິສານ (ຂອງໄທ) ໄດ້ ເຖິງໜ້າຈະລວຍ ແຕ່ສຸດທ້າຍ ເຈົ້າກໍບໍ່ມີໂນຮາວ ທີ່ຈະໄປຫາເຂົາຢູ່ດີ ຖ້າເຈົ້າບໍ່ມີຄອນເນັກຊັ່ນແທ້ໆ! ຂ້ອຍເລີຍເບິ່ງວ່າ ຂ້ອຍມີງົບທີ່ຈະສ້າງໜັງຫຼາຍໆເລື່ອງ ແຕ່ວ່າຜູ້ກຳກັບຂ້ອຍຂາດ ທີ່ສຳຄັນຄືການເຮັດໜັງເປັນອິຫຍັງທີ່ຍາກ!”.

ຈັ່ງໃດກໍຕາມ ເຂົາຍອມຮັບວ່າ ອຸດສາຫະກຳໜັງຂອງລາວ ຍັງຢູ່ໃນລະດັບທີ່ບໍ່ດີພໍເທົ່າໃດ? “ຄືຂ້ອຍມອງວ່າ ເລື່ອງເງິນເຮັດໜັງນີ້ ຖ້າຄົນລາວຈະເຮັດໜັງຈິງໆ ມັນຕ້ອງສົ່ງເສີມຄົນຫຼາຍອີຫຼີ ຄືຖ້າຂ້ອຍຈະໃຫ້ໃຜມາເຮັດໜັງນີ້ ຂ້ອຍຕ້ອງເອີ້ນມາລົມກັນ ວ່າເປັນແນວໃດ? ບາງເທື່ອ, ຄົນເຮັດໜັງກໍເຮັດໜັງແຕ່ຢ່າງດຽວ ມາເກັດຕິ້ງ, ໂປຣໂມດ ກໍບໍ່ໃສ່ໃຈ ໂຮງໜັງກໍບໍ່ໄປດິວນຳເຂົາ ກໍມີບັນຫາອີກ ຂ້ອຍວ່າມັນຂີ້ຮ້າຍຫຼາຍທີ່ບໍ່ມີຄົນເຮັດຫຼາຍກວ່າ ຕອນນີ້ກໍເຫຼືອແຕ່ຂ້ອຍກັບອ້າຍເຈ້ຍ (ພູມຊະນະ ສິຣິວົງສາ) ສອງຄົນທີ່ເຮັດໜັງ”.

“ຖ້າໜັງເຈົ້າບໍ່ໄດ້ລະດັບພັນລ້ານຂຶ້ນໄປ ກໍແທບຈະບໍ່ມີອິຫຍັງເລີຍທີ່ລາວ ຍິ່ງໜັງເຈົ້າບໍ່ມີສະປອນເຊີ ໜັງເຈົ້າຍິ່ງເຈັ້ງໃຍຫຍ່ເລີຍ, ບໍ່ເຫຼືອເລີຍ ອັນນີ້ຂ້ອຍບໍ່ໄດ້ເວົ້າຫຼິ້ນ” ໂຈໂຈ້ກ່າວ.

ສຸດທ້າຍ, ໂຈໂຈ້ເຜີຍຄວາມຝັນທີ່ຈະກຳກັບໜັງເລື່ອງຕໍ່ໄປກັບອິນໄຊລາວວ່າ ເຂົາຢາກກຳກັບໜັງແນວແອັກຊັ່ນ ເຖິງວ່າໃນຄວາມຄິດຕອນນີ້ ຈະຍັງບໍ່ແມ່ນໜັງທີ່ຕ້ອງໃຊ້ເອັບເຟັກລະເບີດໃຫຍ່ໂຕ ແຕ່ກໍນັບເປັນຄວາມທ້າທາຍໃນວົງການອຸດສາຫະກຳໜັງລາວ ທີ່ອາດຈະເຮັດໃຫ້ໂຈໂຈ້ເຂົ້າເຖິງ “ຄວາມຝັນ” ຂອງເຂົາໄດ້ ເຖິງວ່າຈະຕ້ອງວາງໄມໄປຈັບໂຟໂນເທິງບັນລັງຜູ້ກຳກັບຢ່າງເຕັມຕົວກໍຕາມ.

LEAVE A REPLY

Please enter your comment!
Please enter your name here