ແຂວງ ຈຳປາສັກ ມີທັງໝົດ 77 ໂຄງການໃນຂົງເຂດເສດຖະກິດ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ປີ 2018 ລວມມູນຄ່າເສຍຫາຍທັງໝົດ ຫລາຍກວ່າ 84 ຕື້ກີບ.
ອີງຕາມບົດລາຍງານ ຂອງພະແນກແຜນການ ແລະ ການລົງທຶນ ແຂວງຈຳປາສັກ ສະບັບລົງວັນທີ 4 ກັນຍາ 2018 ລະບຸວ່າ: ບັນດາໂຄງການທີ່ໄດ້ຮັບຜົນກະທົບປະກອບມີ ຂະແໜງໂຍທາທິການ ແລະ ຂົນສົ່ງ ຈຳນວນ 69 ໂຄງການ ລວມມູນຄ່າຄວາມເສຍຫາຍ 76,4 ຕື້ກວ່າກີບ ແລະ ຂະແໜງກະສິກຳ ແລະ ປ່າໄມ້ ຈຳນວນ 8 ໂຄງການ ລວມມູນຄ່າ 8,3 ຕື້ກວ່າກີບ.
ສໍາລັບຂະແໜງໂຍທາທິການ ແລະ ຂົນສົ່ງ ລວມມີທາງຫລວງແຂວງ ຈຳນວນ 5 ໂຄງການ, ທາງຫລວງເມືອງ ມີ 6 ໂຄງການ, ທາງຊົນນະບົດ ມີ 52 ໂຄງການ ແລະ ທາງເທດສະບານມີ 6 ໂຄງການ, ໃນນັ້ນ ໂຄງການ ສ້ອມແປງເສັ້ນທາງແຕ່ແຍກທາງ 16 ບ້ານວັງເຕົ່າ-ບ້ານເວີນໄຊ ເມືອງ ໂພນທອງ ໄດ້ຮັບຄວາມເສຍຫາຍຫລາຍກວ່າໝູ່ ມູນຄ່າ 6 ຕື້ກວ່າກີບ, ຮອງລົງມາແມ່ນ ໂຄງການສ້ອມແປງເສັ້ນທາງແຕ່ແຍກທາງ 7818 ບ້ານ ວັງຫລວງເກົ່າ ເມືອງຈຳປາສັກ-ບ້ານຫ້ວບເລກ-ບ້ານທ່າຄໍ້-ບ້ານທ່າບັກ ເມືອງມູນລະປະໂມກ ມູນຄ່າ 3 ຕື້ກວ່າກີບ ແລະ ໂຄງການສ້ອມແປງເສັ້ນທາງ ແຕ່ແຍກທາງ 13 ບ້ານບຸ່ງຄ້າ-ບ້ານໃໝ່ ສິງສໍາພັນ ເມືອງ ຊະນະສົມບູນ ມູນຄ່າ 3 ຕື້ກວ່າກີບ.
ເມືອງທີ່ໄດ້ຮັບຜົນກະທົບຫລາຍກວ່າໝູ່ແມ່ນ ເມືອງປະທຸມພອນມີ 15 ໂຄງ ການ, ຮອງລົງມາແມ່ນ ເມືອງ ຈຳປາສັກ ມີ 14 ໂຄງການ, ເມືອງ ໂພນທອງ ມີ 13 ໂຄງການ, ເມືອງ ໂຂງມີ 9 ໂຄງການ, ເມືອງ ຊະນະສົມບູນ ມີ 7 ໂຄງການ, ນະຄອນປາກເຊ ມີ 6 ໂຄງການ, ເມືອງ ປາກຊ່ອງ ມີ 5 ໂຄງການ, ເມືອງ ມູນລະປະໂມກ ມີ 3 ໂຄງການ, ເມືອງ ບາຈຽງ ມີ 3 ໂຄງການ, ເມືອງ ສຸຂຸມມາ ມີ 1 ໂຄງການ ແລະ ອີກ 1 ໂຄງການ ແມ່ນຢູ່ເມືອງ ຈຳປາສັກ-ເມືອງສຸຂຸມມາ-ເມືອງມູນລະປະໂມກ.
ທີ່ມາ: ຂປລ
